އީދު ބަންދަށް މެދުކަނޑާލުމަށްފަހު އަލުން ފެށި ކިންގްސް ކަޕް ފުޓްސަލް މުބާރާތުގައި ރޭ ސްޓެލްކޯ ރިކްރިއޭޝަން ކްލަބްގެ މައްޗަށް ކޮންރެޑް މޯލްޑިވްސްއިން ކުރިހޯދުމާއެކު، ގްރޫޕް ސީގެ ފޯރިގަދަވެއްޖެއެވެ.
މިދިޔަ އަހަރުގެ ރިސޯޓް ލީގުގެ ޗެމްޕިއަންކަން ހޯދި ކޮންރެޑުން ސްޓެލްކޯއާ ދެކޮޅަށް ކުޅުނު ފޯރިގަދަ މެޗު ކާމިޔާބުކުރީ 1-2 ގެ ނަތީޖާއަކުންނެވެ.
މި މެޗަށް ނުކުތްއިރު ސްޓެލްކޯ އޮތީ ފުރަތަމަ މެޗުގައި ކްލަބް ބިނާރާ އަތުން 1-4 އިން މޮޅުވެ، ތާވަލްގެ އެއްވަނައިގައެވެ. އަނެއްކޮޅުން ކޮންރެޑް ވަނީ ފުރަތަމަ މެޗުގައި ކޯރާކޯރާ މޯލްޑިވްސް އަތުން 1-2 އިން ބަލިވެފައެވެ.
ރޭގެ މެޗުގެ 7 ވަނަ މިނެޓުގައި ކޮންރެޑަށް ލީޑު ނަގައިދިނީ ޝަނާއު ނަސީރެވެ. ފުރަތަމަ ހާފު ކޮންރެޑް ކުރީގައި އޮވެގެން ނިންމާލި ނަމަވެސް، ދެވަނަ ހާފު ފަށައިގެން 5 ވަނަ މިނެޓުގައި ސްޓެލްކޯގެ މުހައްމަދު ނަޒާމު ވަނީ ލަނޑެއް ޖަހައި ނަތީޖާ ހަމަހަމަކޮށްދީފައެވެ.
ނަމަވެސް، ސްޓެލްކޯއަށް މެޗުގެ ނަތީޖާ އެޓީމު ކޮޅަށް އަނބުރާލެވޭ ގޮތެއް ނުވިއެވެ. އޭގެ ބަދަލުގައި ފެނުނީ ކޮންރެޑްގެ ޝަނާއު އިތުރު ލަނޑެއް ޖަހައި، މުބާރާތުގައި އެޓީމަށް ފުރަތަމަ ތިން ޕޮއިންޓް ކަށަވަރުކޮށްދިން ތަނެވެ.
ކިންގްސް ކަޕުގައި ރޭ ކޯރާ ކޯރާ ބައްދަލުކުރި މެޗުގެ ތެރެއިން-- ފޮޓޯ: ފޮޓޯ މާސްޓާ
މި ގްރޫޕްގައި ރޭ ކުޅުނު އަނެއް މެޗުގައި ކޯރާކޯރާއިން ވަނީ 0-1 އިން ކްލަބް ބިނާރާ ބަލިކޮށްފައެވެ. މިއަހަރުގެ ރާބަދި ޗެލެންޖުގެ ތަށި އުފުލާލި ކޯރާކޯރާއިން މި މެޗުގައި ޖެހި ހަމައެކަނި ލަނޑަކީ، ދެވަނަ ހާފު ފެށުނުތަނާހެން ބިނާރާގެ ކުޅުންތެރިއެއްގެ އަތުން ބައިކޮޅަށް ވަން ލަނޑެކެވެ. މިއީ މުބާރާތުގައި ކޯރާކޯރާއިން ހޯދި ޖެހިޖެހިގެން ދެވަނަ މޮޅެވެ.
ރޭގެ މެޗުތަކަށްފަހު ގްރޫޕް ސީގެ އެއްވަނައިގައި 6 ޕޮއިންޓާއެކު އޮތީ ކޯރާކޯރާއެވެ. ދެވަނައިގައި އޮތް ސްޓެލްކޯއާއި ތިންވަނައިގައި އޮތް ކޮންރެޑަށްވެސް 3 ޕޮއިންޓް ލިބިފައިވާއިރު، ސްޓެލްކޯއަށް ކުރި ލިބެނީ ގޯލުގެ ތަފާތުންނެވެ.
މި ގްރޫޕްގެ ފަހު މެޗުތައް އޮންނާނީ ޖޫން މަހުގެ 5 ވަނަ ދުވަހުގެ ރޭ 10:00 ގައެވެ. މުބާރާތުގެ ކުއާޓާ ފައިނަލުން ޖާގަ ލިބޭނީ ކޮންމެ ގްރޫޕަކުންވެސް އެންމެ ރަނގަޅު ނަތީޖާ ހޯދާ ދެ ޓީމުގެ އިތުރުން، ތިންވަނައަށް ދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެ ޓީމަށެވެ.