ވީޑިއޯ ހިއްސާކުރާ މަޝްހޫރު މަންސަ "ޓިކްޓޮކް" ހަމައެކަނި ސޯޝަލް މީޑިއާ އެޕްލިކޭޝަނެއްގެ ގޮތުގައި އޮތް އޮތުން ބަދަލުކޮށް، އެންމެ އެޕެއްގެ ތެރެއިން ގިނަ ޚިދުމަތްތަކެއް ލިބޭ "ސުޕަ އެޕް" އަކަށް ބަދަލުކުރުމުގެ މަސައްކަތް ހަލުވިކަމާއެކު ފަށައިފިއެވެ.
ޗައިނާގެ "ވީޗެޓް" ފަދަ އެޕްތަކުގެ މޮޑެލްއަށް ބިނާކޮށް ޓިކްޓޮކުން ދަނީ އޮންލައިން ވިޔަފާރިއާއި، ހޮޓާ ބުކިން އަދި މާލީ ޚިދުމަތްތައް އެއް ފުރާޅެއްގެ ދަށަށް ގެނައުމަށް ގިނަ ފިޔަވަޅުތަކެއް އަޅަމުންނެވެ.
މިގޮތުން ދާދިފަހުން އެ ކުންފުނިން ވަނީ އެމެރިކާގައި "ޓިކްޓޮކް ގޯ" ގެ ނަމުގައި އާ ޚިދުމަތެއް ތައާރަފްކޮށްފައެވެ. މި ޚިދުމަތުގެ އެހީގައި ޔޫޒަރުންނަށް އެޕްލިކޭޝަން ދޫކޮށް ނުގޮސް، ސީދާ ޓިކްޓޮކްގެ ތެރެއިން ހޮޓާތަކާއި، މުނިފޫހިފިލުވުމުގެ ޖަގަހަތަކާއި، އެކި ކަހަލަ ހަރަކާތްތައް ބަލައި ބުކިން ހެދުމުގެ ފުރުސަތު ލިބިގެންދެއެވެ. މިއީ ކުރިން ތިންވަނަ ފަރާތްތަކުގެ ވެބްސައިޓްތަކަށް ރިފާ ކުރަމުން އައި އުސޫލު ދޫކޮށް، ސީދާ އެޕް ތެރެއިން ވިޔަފާރި ނިންމާލެވޭނެ ގޮތް ހެދުމަށް އެޅި ފިޔަވަޅެކެވެ.
މިފީޗާއިން ޔޫޒަރުންނަށް ފައިސާ ރައްކާކުރެވޭނެ ޕްރީޕެއިޑް އެކައުންޓްތައް ވެސް ހުޅުވޭނެ ---
މީގެ އިތުރުން، ޓިކްޓޮކުން ދަނީ މާލީ ޚިދުމަތްތަކުގެ ތެރެއަށް ވަނުމަށްވެސް ބޮޑެތި ތައްޔާރީތަކެއް ވަމުންނެވެ. އެގޮތުން ބްރެޒިލްގެ ސެންޓްރަލް ބޭންކަށް އެ ކުންފުނިން ވަނީ ފައިނޭންޝަލް ޓެކްނޮލޮޖީ (ފިންޓެކް) ލައިސަންސަކަށް އެދި ހުށަހަޅާފައެވެ.
މި ލައިސަންސް ލިބުމުން ޔޫޒަރުންނަށް ފައިސާ ރައްކާކުރެވޭނެ ޕްރީޕެއިޑް އެކައުންޓްތައް ހުޅުވުމާއި، ފައިސާ ފޮނުވުމާއި، ލޯނު ދޫކުރުމުގެ ޚިދުމަތް ސީދާ އެޕް މެދުވެރިކޮށް ދެވޭނެއެވެ.
ޓިކްޓޮކުން މީގެ ކުރިން ފެށި "ޓިކްޓޮކް ޝޮޕް" އަށް ބޮޑު ކާމިޔާބީއެއް ލިބިފައިވާއިރު، އެމެރިކާގެ ބާޒާރުގައި އެމެޒޯން ފަދަ ބޮޑެތި ކުންފުނިތަކާ ވާދަކޮށް، 2025 ވަނަ އަހަރު އެކަނިވެސް 15.82 ބިލިއަން ޑޮލަރުގެ ވިޔަފާރި ވަނީ ކޮށްފައެވެ. އަދި މިހާރު މި ޝޮޕް މެދުވެރިކޮށް ލަގްޒަރީ ބްރޭންޑްތަކުގެ ސާމާނުވެސް ލިބޭ ގޮތް ވަނީ ހަދާފައެވެ.
އެޕްލިކޭޝަންގެ ތެރޭގައި ޔޫޒަރުން ހޭދަކުރާ ވަގުތު އިތުރުކުރުމުގެ ގޮތުން، ޓިކްޓޮކުން ދަނީ ސާޗް އަދި މެޕްގެ ޚިދުމަތްތައްވެސް ވަރުގަދަކުރަމުންނެވެ. މިހާރު ރެސްޓޯރަންޓްތަކުގެ ވަގުތުތަކާއި ރިވިއުތައް އެޕުން ފެންނަން ހުންނައިރު، މިއީ ގޫގުލްގެ ސާޗް ބިޒްނަސްއަށް އޮތް ބޮޑު ގޮންޖެހުމެކެވެ.
މީގެ އިތުރުން ކުރު ޑްރާމާ ސީރީޒްތައް ބެލޭނެ "މިނިސް" ސެކްޝަނަކާއި، މެސެޖުކުރަމުން ކުޅެވޭނެ ކެޝުއަލް ގޭމްތައްވެސް ޓިކްޓޮކްގެ ތެރެއަށް ވަނީ އިތުރުކޮށްފައެވެ.