އެމްޑީޕީ އަކީ އަބަދުވެސް އެންމެ ލޯބިވާ ޕާޓީ ކަމަށާއި އެމްޑީޕީ ނޫން އެހެން ޕާޓީއެއްގެ މެންބަރެއްގެ ގޮތުގައި މަރުވެދާން ބޭނުންނުވާ ކަމަށް ކުރީގެ ރައީސް މުޙައްމަދު ނަޝީދު މިއަދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ އެމްޑީޕީގެ ޗެއާޕާސަން އިންތިޚާބުގެ ކެމްޕެއިނަށް ފ. ބިލެއްދޫއަށް ވަޑައިގެން އެ ރަށުގެ މެންބަރުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ބިލެއްދޫގައި ބޭއްވި މި ބައްދަލުވުމުގައި، ޗެއާޕާސަންގެ މަގާމަށް ހޮވިވަޑައިނުގެންފި ނަމަ ޕާޓީ ދޫކޮށް ދާނެތޯ މެންބަރަކު ކުރި ސުވާލަށް ޖަވާބު ދެއްވަމުން ނަޝީދު ވިދާޅުވީ، އިންތިޚާބުން ނާކާމިޔާބުވި ނަމަވެސް ޕާޓީ ދޫކޮށް ވަޑައިނުގަންނަވާނޭ ކަމަށެވެ. ނަމަވެސް އެފަދަ ހާލަތެއްގައި ދެން އޮންނަވާނީ ގޭގައި ކަމަށް އެމަނިކުފާނު ފާހަގަކުރެއްވިއެވެ.
ނަޝީދު ވިދާޅުވީ އެމްޑީޕީ އަކީ އެތަކެއް ގުރުބާނީތަކެއްވެގެން ވޫޖޫދުކުރި ޕާޓީއެއް ކަމަށާއި، އެ ޕާޓީން ނެރެ އެއްލާނުލާހާ ހިނދަކު ޕާޓީގައި ދެމިހުންނަވާނޭ ކަމަށެވެ. އެމަނިކުފާނަކީ އެމްޑީޕީ ބޭފުޅެއްކަމާ މެދު އެއްވެސް ފަރާތަކުން ޝައްކު ނުކުރެއްވުމަށް އެދިވަޑައިގަންނަވަމުން ނަޝީދު ވަނީ ވަރުގަދަ މިސާލެއް ޖައްސަވާފައެވެ.
"އަޅުގަނޑު އެންމެ ލޯބިވާ ޕާޓީ އަކީ އެމްޑީޕީ. އެ ޕާޓީން ނެރެ އެއްލާނުލާހާ ހިނދަކު ހުންނާނީ ޕާޓީގަ. އަޅުގަނޑުގެ ގައިން ތަނެއް ކަނޑާލި ނަމަވެސް އަންނާނީ ރީނދޫ ލޭ. އެމްޑީޕީ މީހެއްގެ ގޮތުގައި ނޫނީ މަރުވެގެންދާކަށް ވެސް ބޭނުމެއް ނޫން،" ނަޝީދު ވިދާޅުވިއެވެ.
އެމްޑީޕީގެ ޗެއާޕާސަންކަމުގެ އިންތިޚާބުގެ ކެމްޕެއިންގައި ރާއްޖޭގެ އެކި ކަންކޮޅުތަކަށް ކުރައްވަމުން ގެންދަވާ ދަތުރުފުޅުތަކުގެ ތެރެއިން، މުޙައްމަދު ނަޝީދު ވަނީ އެ ޕާޓީން އެއްވެސް މެންބަރަކު ވަކިވުމަށް އެދިވަޑައިނުގަންނަވާ ކަމަށް ވެސް މީގެ ކުރިން ވިދާޅުވެފައެވެ.
ނަޝީދު ވިދާޅުވެފައިވަނީ އެމަނިކުފާނުގެ އަމާޒަކީ އެމްޑީޕީގެ މެންބަރުންގެ އަދަދު 100,000 އަށްވުރެ މައްޗަށް ގެންދިއުން ކަމަށެވެ.