ދުނިޔޭގެ އެންމެ ބޮޑު ސޮފްޓްވެއާ ޑިވެލޮޕްމަންޓް ޕްލެޓްފޯމް، ގިޓްހަބްގެ އެތެރޭގެ ނިޒާމަށް ހެކަރުންގެ ގުރޫޕަކުން ވަދެގަނެ، އެ ކުންފުނީގެ އަމިއްލަ 3،800 އަށްވުރެ ގިނަ ކޯޑު ރިޕޮސިޓަރީސް ވަގަށްނަގައި، ސައިބަ ކްރައިމް ފޯރަމެއްގައި ވިއްކާލަން ލިސްޓުކޮށްފިއެވެ.
މި ބޮޑު ސައިބަ ހަމަލާގެ ފަހަތުގައިވަނީ ފާއިތުވި މަސްތަކުގައި ސޮފްޓްވެއާ އުފައްދާ ޑިވެލޮޕަރުން ބޭނުންކުރާ މަގުބޫލު ޓޫލްތަކަށް މެލްވެއާ ފަތުރަމުންދާ "ޓީމްޕީސީޕީ" ނަމަކަށް ކިޔާ ހެކަރުންގެ ގުރޫޕެކެވެ.
މި ހަމަލާދިނުމަށްޓަކައި ހެކަރުން ބޭނުންކޮށްފައިވަނީ ވިޝުއަލް ސްޓޫޑިއޯ ކޯޑް (ވީސީ ކޯޑް) ގެ ނުރައްކާތެރި އެކްސްޓެންޝަނެކެވެ. މި އެކްސްޓެންޝަން މެދުވެރިކޮށް ގިޓްހަބްގެ ޑިވެލޮޕަރެއްގެ ކޮމްޕިއުޓަރަށް ވަދެ، އޭނާގެ ކްރެޑެންޝަލްސް ނުވަތަ ލޮގިން މައުލޫމާތު ވަގަށްނެގުމަށްފަހު، ހެކަރުން ވަނީ ގިޓްހަބްގެ މުޅި ނިޒާމުގެ ތެރެއަށް ފެތުރިގަނެ، އެތައް ހާސް އިންޓާނަލް ރިޕޮސިޓަރީސްތަކެއް ކޮޕީކޮށްފައެވެ.
މި ހާދިސާއާ ގުޅިގެން ގިޓްހަބުން ބުނެފައިވަނީ އެ ކުންފުނީގެ 3،800 އެއްހާ އިންޓާނަލް ރިޕޮސިޓަރީސްއަށް ހެކަރުން ވަދެފައިވާކަން ފާހަގަކުރެވިފައިވާ ކަމަށެވެ. ނަމަވެސް، މީގެ ތެރޭގައި ހިމެނެނީ ހަމައެކަނި ގިޓްހަބްގެ އަމިއްލަ ކޯޑުތައް ކަމަށާއި، އެ ޕްލެޓްފޯމް ބޭނުންކުރާ އެއްވެސް ކަސްޓަމަރެއްގެ މައުލޫމާތެއް ނުވަތަ ޕްރޮޖެކްޓެއް ލީކުވެފައިނުވާ ކަމަށް އެ ކުންފުނިން ބުނެއެވެ. އެހެންނަމަވެސް، ހަމަލާދިން ޓީމްޕީސީޕީ ގުރޫޕުން ބުނަމުންދަނީ ވަގަށްނެގި ރިޕޮސިޓަރީސްގެ އަދަދު 4،000 އާ ގާތްކުރާ ކަމަށެވެ.
ބްރީޗްފޯރަމްސްގައި ހެކަރުން ޖެހި އިޝްތިހާރެއްގައި ބުނެފައިވަނީ، ގިޓްހަބްގެ މައި ޕްލެޓްފޯމްގެ ސޯސް ކޯޑުތައް އެކުލެވޭ ހުރިހާ ފައިލްތަކެއް އެމީހުންގެ އަތުގައި އެބަހުރި ކަމަށާއި، ބޭނުންވާ ބަޔަކަށް އޭގެ ސައްހަކަން ކަށަވަރުކޮށްދިނުމަށް ސާމްޕަލް ފޮނުވަން ތައްޔާރަށް ތިބި ކަމަށެވެ. އަދި މިއީ ބްލެކްމެއިލްކޮށްގެން ފައިސާ ހޯދަން ކުރާ ކަމެއް ނޫން ކަމަށާއި، އެންމެ ފަރާތަކަށް މިއަގުބޮޑު ކޯޑުތައް ވިއްކާލުމަށްފަހު އެމީހުންގެ އަތުގައި ހުރި ޑޭޓާތައް ނައްތާލާނެ ކަމަށްވެސް ހެކަރުން ބުނެފައިވެއެވެ.
ސައިބާ ސެކިއުރިޓީ ދިރާސާކުރާ ފަރާތްތަކުން ހާމަކުރާ ގޮތުގައި މި ގުރޫޕުން ދަނީ އޮޓޮމޭޓެޑް ވޯމް އެއް ބޭނުންކޮށްގެން، އޯޕަން-ސޯސް ޕެކޭޖުތަކާއި ޑިވެލޮޕާ ޓޫލްތަކުގެ ތެރެއަށް ނުރައްކާތެރި ކޯޑުތައް ފަތުރަމުންނެވެ. މިގޮތުން މިހާތަނަށް 500 އަށްވުރެ ގިނަ ޓޫލްތަކަށް މެލްވެއާ ފަތުރާފައިވާއިރު، މީގެ ޝިކާރައަކަށްވީ ކުންފުނިތަކުގެ ތެރޭގައި އާޓިފިޝަލް އިންޓެލިޖެންސްގެ މަޝްހޫރު ކުންފުނި އޯޕެންއޭއައި އާއި މިސްޓްރަލް އޭއައިގެ އިތުރުން ޔޫރަޕިއަން ކޮމިޝަންގެ ރަސްމީ ވެބްސައިޓްވެސް ހިމެނެއެވެ.
ސެކިއުރިޓީ މާހިރުން މިހާރު ޑިވެލޮޕަރުންނަށް އަންގަމުންދަނީ، ގިޓްހަބް، ގިޓްލެބް، އަދި އޭޑަބްލިއުއެސް ފަދަ ކްލައުޑް ޕްލެޓްފޯމްތަކުގައި ބޭނުންކުރާ އެކްސެސް ޓޯކަންތަކާއި ސީކްރެޓް ކީތައް މިހާރުން މިހާރަށް ބަދަލުކުރުމަށެވެ. އަދި އައު އަޕްޑޭޓްތައް އަންނަހާ އަވަހަކަށް އޮޓޯއިން އިންސްޓޯލްވިޔަނުދީ، ކޯޑުތައް ރަނގަޅަށް ޗެކްކުރުމަށްފަހު ނޫނީ ސޮފްޓްވެއާތައް އަޕްޑޭޓް ނުކުރުމަށްވެސް މާހިރުން ވަނީ އިލްތިމާސްކޮށްފައެވެ.