ކޮރަޕްޝަންގެ ކުށުގައި މިހާރު ވެސް 12 އަހަރުގެ ޖަލު ހުކުމެއް ތަންފީޒުކުރަމުން އަންނަ މޯލްޑިވް ގޭސްގެ ކުރީގެ މެނޭޖިން ޑިރެކްޓަރު އަބްދުﷲ މައުމޫންގެ މައްޗަށް ދައުލަތުން އުފުލި ރިޝްވަތުގެ ހިފުމުގެ ހަތް ދައުވާގެ ތެރެއިން ފަސް ދައުވާ ސާބިތުނުވާ ކަމަށް ކްރިމިނަލް ކޯޓުން ކުރި ހުކުމް، ދައުލަތުން ހައިކޯޓުގައި އިސްތިއުނާފުކޮށްފިއެވެ.
ގޭސް މާނުގެ މައްސަލަ ހައިކޯޓަށް ހުށަހަޅާފައި އޮތީ މިދިޔަ ހަފްތާގައެވެ. އެކަމަކު، އެ މައްސަލަ ބަލައިގަތުމާމެދު ހައިކޯޓުން އަދި ގޮތެއް ނިންމާފައެއް ނުވެއެވެ. ހައިކޯޓުގެ ވެބްސައިޓުގައިވާ ގޮތުން، މާނުގެ މައްސަލަ ހުށަހަޅާފައިވަނީ މި މަހުގެ ފަސްވަނަ ދުވަހެވެ.
މައުމޫންގެ މައްޗަށް ދައުވާކުރީ ކުރީގެ ޕީޕީއެމްގެ ވެރިކަމުގައި މޯލްޑިވް ގޭސްގެ މެނޭޖިން ޑިރެކްޓަރަކަށް އޭނާ ހުންނެވިއިރު 2016 ވަނަ އަހަރު ރިޝްވަތުގެ ގޮތުގައި ފައިސާ ނެގިކަމުގެ ތުހުމަތުގައެވެ. އެ މައްސަލައިގައި ރިޝްވަތުގެ ހަތް ދައުވާއެއް އޭނާގެ މައްޗަށް އުފުލިއެވެ.
އޭގެ ތެރެއިން ދެ ދައުވާއެއް ސާބިތުވާ ކަމަށް ކަނޑައަޅައި، 12 އަހަރާއި ނުވަ މަހާއި 18 ދުވަހުގެ ޖަލު ހުކުމެއް ކުރިން އޮތީ އިއްވާފައެވެ. އެކަމަކު، ބާކީ އޮތް ފަސް ދައުވާ ވެސް ސާބިތުނުވާ ކަމަށް ކްރިމިނަލް ކޯޓުން ވަނީ ހުކުމްކޮށްފައެވެ.
ފާހަގަކޮށްލެވޭ ގޮތުގައި މައުމޫންގެ ފަރާތުން ވަނީ އޭނާގެ މައްޗަށް ކުރިން އިއްވާފައ އޮތް 12 އަހަރު ދުވަހުގެ ޖަލު ހުކުމް ވެސް ހައިކޯޓުގައި އިސްތިއުނާފުކޮށްފައެވެ.
މައުމޫން މޯލްޑިވް ގޭސްގެ މެނޭޖިން ޑިރެކްޓަރުގެ މަގާމުގައި ހުންނެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި، ޑިސެންބަރު 2013 އިން ނޮވެމްބަރު 2018 އަށެވެ.