ފުރަތަމަ ފަހަރަށް ރާއްޖޭގައި އެޕަލް ވޮޗް އަދި ސެމްސަންގް ގެލެކްސީ ވޮޗްތަކަށް އީ ސިމްގެ ޚިދުމަތް ތައާރަފުކުރި ޓެލެކޮމިއުނިކޭޝަން ކުންފުންޏަކަށް އުރީދޫ މޯލްޑިވްސް ވެއްޖެއެވެ.
އުރީދޫން ބުނީ، އެ ޚިދުމަތާ އެކު ކަސްޓަމަރުންނަށް ފޯނު ކައިރީގައި ބެހެއްޓުމަކާ ނުލައި ސީދާ ސްމާޓްވޮޗް މެދުވެރިކޮށް ގުޅިފައި ހުރެވޭނެ ކަމަށެވެ.
އެ ޚިދުމަތުގެ ސަބަބުން އެޕަލް އަދި ސެމްސަން ގަޑި މެދުވެރިކޮށް ފަސޭހަކަމާ އެކު ގުޅުމާއި، މެސެޖު ކުރުމާއި، މިއުޒިކް އަޑުއެހުމާއި، ނޮޓިފިކޭޝަންތައް ލިބުމުގެ އިތުރުން އެޕްތައް ބޭނުންކުރުމުގެ ފުރުސަތު ކަސްޓަމަރުންނަށް ލިބޭނެ ކަމަށް އުރީދޫން ވަނީ ބުނެފައެވެ.
ރާއްޖޭގެ އެންމެ ކުރިއަރާފައިވާ ޑިޖިޓަލް އީޖާދީ ކުންފުނީގެ ހައިސިއްޔަތުން އުރީދޫން އަންނަނީ ދުނިޔޭގެ ފެންވަރުގެ ޓެކްނޮލޮޖީތަކާ ގުޅިފައިވާ ތަޖުރިބާތައް ރާއްޖޭގެ ރައްޔިތުންނަށް ފޯރުކޮށްދެމުންނެވެ. ވޭރަބަލް ޑިވައިސްތަކަށް އީ ސިމްގެ ޚިދުމަތް ތައާރަފުކުރުމަކީ ސްމާޓް އަދި ގުޅިފައިވާ ޑިޖިޓަލް މޯލްޑިވްސްއެއް ބިނާކުރުމަށް އުރީދޫން ކުރަމުން އަންނަ މަސައްކަތުގެ އިތުރު ފިޔަވަޅެއް ކަމަށް އެ ކުންފުނިން ބުނެއެވެ.
އުރީދޫ: ފުރަތަމަ ފަހަރަށް ރާއްޖޭގައި އެޕަލް އަދި ސެމްސަންގް ގަޑިއަށް އީސިމް ޚިދުމަތް ފޯރުކޮށްދިން ކުންފުނި -- ފޮޓޯ: އުރީދޫ
އެ ޚިދުމަތް އެކަށޭނެ އެޕަލް ވޮޗް އަދި ސެމްސަންގް ގެލެކްސީ ވޮޗް މޮޑެލްތަކަށް ލިބޭނެ ކަމަށާއި ކަސްޓަމަރުންނަށް ކަސްރަތު ކުރާއިރު އަދި ދަތުރުމަތީގެ އިތުރުން ބޭރުތެރޭގައި ހަރަކާތްތެރިވާއިރު ނުވަތަ ކޮންމެ ތަނެއްގައި ހުރި ނަމަވެސް، ދުވަހުގެ މަސައްކަތްތަކުގައި އިތުރު ފަސޭހަކަމާއި މިނިވަންކަން ލިބޭނެ ކަމަށް އުރީދޫން ވަނީ ބުނެފައެވެ.
ރާއްޖޭގައި ތްރީޖީ، ފޯޖީ، އަދި ފައިވްޖީގެ ޚިދުމަތް އެންމެ ފުރަތަމަ ތައާރަފުކުރި ކުންފުނީގެ ގޮތުގައި އުރީދޫން އަންނަނީ ޓެލެކޮމިއުނިކޭޝަން ދާއިރާގައި އާ އީޖާދުތަކާ އެކު ކުރި ހޯދަމުންނެވެ.
ވޭރަބަލް އީ-ސިމްގެ ޚިދުމަތް ތައާރަފުކުރުމަކީ ރާއްޖޭގެ ޑިޖިޓަލް އީޖާދުތަކުގެ ކުރީ ސަފުގައި އުރީދޫ އޮތްކަން އިތުރަށް ކަށަވަރުކޮށްދޭ ކަމެއް ކަމަށް އެ ކުންފުނިން ވަނީ ބުނެފައެވެ.