އެޕަލް ކުންފުނިން އުފައްދާ އެއާޕޮޑްސްގެ އައު މޮޑެލްތަކުގައި ކެމެރާއާއި އާޓިފިޝަލް އިންޓެލިޖެންސް (އޭއައި) ފީޗާތައް ހިމެނުމަށް ކުރަމުންދާ މަސައްކަތްތައް ނިމުމަކާ ގާތްވެ، އޭގެ އެންމެ ފަހުގެ ޓެސްޓްތައް މިހާރު ފަށާފައިވާ ކަމަށް ރިޕޯޓްތައް ބުނެފިއެވެ.
ބްލޫމްބާގްގެ ރިޕޯޓްތަކާ ހަވާލާދީ މީޑިއާތަކުން ބުނާ ގޮތުގައި، ކެމެރާ ހަރުކޮށްފައިވާ މި އެއާޕޮޑްސް މިހާރު އޮތީ "ޑިޒައިން ވެލިޑޭޝަން ޓެސްޓިން" (ޑީވީޓީ) މަރުހަލާގައެވެ. މިއީ އެއްޗެއް ގަނޑުކޮށް އުފައްދަން ފެށުމުގެ ކުރިން ކުރިއަށްގެންދާ އެންމެ ފަހުގެ އެއް މަރުހަލާއެވެ.
މި އައު އެއާޕޮޑްސްގައި ހިމަނާ ކެމެރާތަކަކީ އާދައިގެ ފޮޓޯ ނެގުމަށް ނުވަތަ ވީޑިއޯ ކުރުމަށް ބޭނުންކުރާނެ ކެމެރާތަކެއް ނޫނެވެ. އޭގެ ބަދަލުގައި މި ކެމެރާތައް މަސައްކަތް ކުރާނީ އެޕަލްގެ ވާޗުއަލް އެސިސްޓެންޓް "ސިރީ" ގެ ލޯ ފަދައިންނެވެ. މީގެ ސަބަބުން ސިރީއަށް ވަށައިގެންވާ މާހައުލު ފެނި، އެ މާހައުލާ ގުޅޭ ތަފާތު މައުލޫމާތުތައް އޭއައި މެދުވެރިކޮށް ބޭނުންކުރާ މީހާއަށް ފޯރުކޮށްދިނުމުގެ ގާބިލުކަން ލިބިގެންދާނެއެވެ.
މި ޓެކްނޮލޮޖީގެ އެހީގައި، ބޭނުންކުރާ މީހާގެ ކުރިމަތީގައި ހުރި އެއްޗެއްގެ މައުލޫމާތު އޮޅުންފިލުވުމަށް ސިރީއާ ސުވާލު ކުރެވޭނެއެވެ. މިސާލަކަށް ކާތަކެތި ތައްޔާރުކުރާ އެއްޗެހި ދައްކާލުމުން އެއިން ތައްޔާރުކުރެވޭނެ ރެސިޕީތައް ކިޔައިދިނުމާއި، މަގުމަތީގައި ހުންނަ އިމާރާތްތަކާއި ބިނާތައް ދެނެގަނެ އެ ތަންތަނުގެ މައުލޫމާތު ފޯރުކޮށްދިނުން ފަދަ ކަންކަން ހިމެނެއެވެ. މީގެ އިތުރުން މާހައުލާ ގުޅޭ ތަފާތު ހަނދާންކޮށްދިނުންތައް (ރިމައިންޑާސް) ވެސް މީގެ އެހީގައި ފޯރުކޮށްދޭނެއެވެ.
ޑިޒައިނަށް ބަލާއިރު، މި އެއާޕޮޑްސް ފެންނާނީ އެއާޕޮޑްސް ޕްރޯ 3 އާ އެއްގޮތަށެވެ. ނަމަވެސް ކެމެރާގެ ހާޑްވެއާ ހިމެނުމަށްޓަކައި މީގެ ތަނޑިކޮޅު ކުޑަކޮށް ދިގުވާނެ ކަމަށް ލަފާކުރެވެއެވެ. އަދި އަމިއްލަ މިނިވަންކަމާއި ރައްކާތެރިކަމަށް އިސްކަންދިނުމުގެ ގޮތުން، ކެމެރާ ބޭނުންކުރާ ވަގުތުތަކުގައި ދިއްލޭނެ ކުޑަ އެލްއީޑީ ލައިޓެއްވެސް މީގައި ހިމެނުމަށް ވަނީ ހަމަޖެހިފައެވެ.
ކުރިން ރޭވިފައި އޮތީ 2026 ވަނަ އަހަރުގެ ކުރީކޮޅު މި އުފެއްދުން ބާޒާރަށް ނެރުމަށެވެ. ނަމަވެސް ސިރީގެ ބައެއް ފަންކްޝަންތަކަށް ގެންނަންޖެހޭ ބަދަލުތަކަކާ ގުޅިގެން މި ތާރީޚަށް ކޮންމެވެސް ވަރެއްގެ ބަދަލެއް އައުމަކީ އެކަށީގެންވާ ކަމެއް ކަމަށް ވެސް ރިޕޯޓްތައް ބުނެއެވެ.
އެޕަލް އިން ދަނީ އެއާޕޮޑްސްގެ އިތުރުން ސްމާޓް ގްލާސް ފަދަ އޭއައި ހިމެނޭ އެހެން އުފެއްދުންތައް ވެސް ތައްޔާރުކުރަމުންނެވެ.