މުމްބާއީގެ ޕައިދޯނީ ސަރަހައްދުގައި އާއިލާއެއްގެ ހަތަރު މީހުން އެއް ދުވަހާ މަރުވި ހާދިސާއަކީ ކާނާ ވިހަވެގެން ހިނގި ހާދިސާއެއް ކަމަށް ނުބެލެވޭ ކަމަށް ބައެއް މީޑިއާ ރިޕޯޓުތައް ބުނެފިއެވެ.
މި ހާދިސާގައި މަރުވެފައިވަނީ އުމުރުން 40 އަހަރުގެ އަބްދުﷲ އަބްދުލްގާދިރާއި އޭނާގެ އަނބިމީހާ ނަސްރީން، 35، އަދި އެ ދެމަފިރިންގެ ދެ އަންހެން ދަރިން ކަމަށްވާ އުމުރުން 16 އަހަރުގެ އައިޝާއާއި 13 އަހަރުގެ ޒައިނަބެވެ.
މުމްބާއީ ޕޮލިހުން ބުނި ގޮތުގައި މި ހާދިސާ ހިނގާފައި ވަނީ އޭޕްރީލް މަހުގެ 25 ވަނަ ދުވަހުގެ ރޭ 10:30 ހާއިރު އެމީހުންގެ ގާތްތިމާގެ ބަޔަކު ހިމެނޭ ގޮތަށް އާއިލާގެ ނުވަ މީހަކު ރޭގަނޑުގެ ކައި ނިންމި ފަހުންނެވެ. އޭގެ ފަހުން ގެއަށް ގޮސް 1 އާއި 1:30 އާ ދެމެދުގެ ވަގުތެއްގައި އެމީހުން ކަރާ ކައިފައިވާ ކަމަށް ފުލުހުން ބުންޏެވެ.
އޭޕްރީލް 26 ވަނަ ދުވަހުގެ ހެނދުނު 5:30 އިން 6 އާއި ދެމެދު ހަތަރު މީހުން ވެސް ހޮޑުލައި ބޭރަށް ހިންގަން ފެށި ކަމަށާއި، އެމީހުންގެ ހާލު ގޯސްވުމުން ހޮސްޕިޓަލަށް ގެންގޮސްފައިވާ ކަމަށް ފުލުހުން ބުންޏެވެ.
ފަރުވާ ދިން ނަމަވެސް، ހަގު އަންހެން ދަރިފުޅު ހެނދުނު 10:15 ހާއިރު މަރުވި ކަމަށާއި، އޭގެ ފަހުން ފަރުވާ ދިނުމުގެ ތެރޭގައި މަންމައާއި ދޮށީ އަންހެން ދަރިފުޅު ވަނީ މަރުވެފައެވެ. ބައްޕަ މަރުވީ އެރޭ 10:30 ހާއިރުއެވެ.
ޕޯސްޓްމޯޓަމް ޓެސްޓްތައް ހެދި ނަމަވެސް މަރުވި ސަބަބު ކަށަވަރު ކުރެވޭނީ ހިސްޓޮޕެތޮލޮޖިކަލް ރިޕޯޓްތައް (ޓިޝޫ އެނަލިސިސް) ލިބުމުންނެވެ.
މިހާތަނަށް ބެލި ބެލުމުން ރޭގަނޑު ކަރާ ކެއުމުގެ ކުރިން އެ މީހުން ކެއީ ބިރިޔާނީކަން އެނގޭ ކަމަށް އޮފިޝަލުން ބުންޏެވެ.
ފުލުހުން ބުނީ ފޮރެންސިކް އަދި ލެބޯޓްރީ ތަހުލީލު ކުރުމަށް ބަޔޮލޮޖިކަލް ސާމްޕަލްތަކާއެކު ކައިފައި އޮތް ކަރާކޮޅެއްގެ ބައެއް ހިމެނޭ ގޮތަށް އެތަކެތީގެ ސާމްޕަލްތައް ފޮނުވާފައިވާ ކަމަށެވެ. ނަމަވެސް އެތަކެތީގައި ވިހައިގެ އަސަރު ހުރިކަން ނުވަތަ ތަޣައްޔަރުވެފައިވާ ކަމަށް އޮފިޝަލުން ބުނެފައިނުވާ ކަމަށް އެންޑީޓީވީން ރިޕޯޓްކޮށްފައިވެއެވެ.
އެ އާއިލާ އެޑްމިޓްކުރި ސާ ޖޭޖޭ ހޮސްޕިޓަލުގެ ޑޮކްޓަރުންނާ ހަވާލާދީ ޓައިމްސް އޮފް އިންޑިއާއިން ބުނެފައިވާ ގޮތުގައި ކަރަލަކީ އަވަހަށް ކުނިވާ އެއްޗެއް ނަމަވެސް ކުނިވުމުގެ ސަބަބުން ހަތަރު މީހުންގެ ސިއްހަތު އެހާ ހަލުއިކަމާއެކު ގޯސްވެގެން ގޮސް މަރުވުމަކީ ވަރަށް ނާދިރު ކަމެކެވެ.
"ކާނާ ވިހަވުމުން އާންމުކޮށް އެހާ ހަލުވިކޮށް އަދި ހާލަތު ވަރަށް ބޮޑަށް ގޯސްވެގެން ނުދާނެ،" ހޮސްޕިޓަލްގެ ޑޮކްޓަރަކު ވިދާޅުވިއެވެ.
"ހާލަތު ގޯސްވުމުގެ ސްޕީޑާއި، ހާލަތުގެ ސީރިއަސްކަމާއި، އެއް އާއިލާއެއްގެ އެތައް ބަޔަކަށް މިކަމުގެ އަސަރު ކުރި ކަމީ ކާނާގެ ސަބަބުން އާންމުކޮށް ދިމާވާ ބައްޔަކާ އެއްގޮތް ކަމެއް ނޫން،"
އޭގެ ބަދަލުގައި ވިހަ ނުވަތަ ކެމިކަލް މާއްދާއެއް އޭގެ ސަބަބަކަށް ވެދާނެ ކަމަށް ވެސް އޭނާ ވިދާޅުވިއެވެ.