މާލޭގެ ގެއެއްގައި އަނިޔާވެރި ގޮތަކަށް މަރާލައިފައި އޮއްވާ ފެނުނު ޝިޢާއު މުޙައްމަދު ސަޢީދުގެ މަރުގެ މައްސަލައިގައި ދައުލަތުން ދައުވާކުރާ ފ. ނިލަންދޫ، ފިނިފެންމާގޭ ޢަލީ ޝާހިލް ބޭނުންކުރި ކަމަށް ބުނާ އަންނައުނުތަކާއި ވަޅިތައް، އޭނާ ބޭނުންވެގެން މިއަދު ކޯޓުގައި ދައްކާލައިފިއެވެ.
ފުވައްމުލަކަށް ނިސްބަތްވާ، އުމުރުން 22 އަހަރުގެ ޝިޢާއު މަރައިލުމަށްފަހު އޭނާގެ ހަށިގަނޑަށް ބޮޑެތި އަނިޔާތަކެއް ދީފައި އޮއްވައި ހ. ޝީރީންވިލާ ގޭގައި ފެނުނީ އޮގަސްޓް 6، 2022ގައެވެ. އެ މައްސަލައިގައި ޝާހިލްގެ މައްޗަށް ކުރާ ދައުވާތަކުގެ ތެރެއިން ބައެއް ދައުވާތަކުގެ ބާވަތް އޮތީ ސިއްރުކޮށްފައެވެ.
ކްރިމިނަލް ކޯޓުން ބުނީ، ސިއްރުކޮށްގެން ކުރިއަށް ގެންދާ އެ މައްސަލައިގެ ޝަރީއަތުގެ މިއަދުގެ އަޑުއެހުމުގައި، މައްސަލައާ ގުޅޭ މާއްދީ ހެކިތައް ގެނެސް، ކޯޓުގައި އެއާ ގުޅޭ ވާހަކަ ދައްކައިފައިވާ ކަމަށެވެ. ކްރިމިނަލް ކޯޓުން ބުނީ، ކޯޓަށް ގެނެސް ދެއްކީ ޝާހިލް ބޭނުންކުރި ކަމަށް ބުނާ ތިން ވަޅިއަކާއި، އެ ދުވަހު ޝާހިލް ލައިގެން ހުރި ޓީޝާޓާއި ސޯޓު ކަމަށެވެ.
އޭގެ އިތުރުން ބައެއް އެހެނިހެން މާއްދީ ހެކި ދައްކައިފައިވާ ކަމަށްވެސް، ކޯޓުން ބުންޏެވެ.
ކޯޓުން ބުނީ، ޝާހިލަށް ހެކި ދައްކައި އެކަމާ ގުޅޭ ގޮތުން ވާހަކަ ދައްކައި ނިމުނުއިރު، މައްސަލައިގެ ޚުލާސާ ބަޔާން އިއްވާނެ ވަގުތު ފަހަނައަޅައި ގޮސްފައިވާ ކަމަށެވެ. އެހެންވެ، މައްސަލައިގެ ޚުލާސާ ބަޔާން އިއްވުން އެހެން ދުވަހަކަށް ފަސްކޮށްފައިވާ ކަމަށް، ކޯޓުން ބުންޏެވެ.
ފާހަގަކުރެވޭ ގޮތުގައި މިމަހުގެ 14ވަނަ ދުވަހު ޝާހިލްގެ މައްޗަށް ވަނީ، ޝިޢާއުގެ މަރުގެ މައްސަލައިގައި އުފުލައިފައިވާ ބައެއް ދައުވާ ސާބިތުވެ، ތިން އަހަރުގެ ހުކުމެއް އިއްވައިފައެވެ.
ޝިޢާއުގެ މަރުގެ މައްސަލައިގެ ޝަރީއަތަށް ތިން އަހަރަށް ވުރެ ގިނަ ދުވަސްވެފައިވާއިރު، ޝާހިލް ޝަރީއަތް ނިމެންދެން ބަންދުކުރަން އޮގަސްޓު 7، 2022ގައި ކްރިމިނަލް ކޯޓުން ވަނީ އަމުރުކޮށްފައެވެ.
އެ މައްސަލައިގައި ފުލުހުން ކުރިން ބުނި ގޮތުގައި، ޝިޢާއު މަރާލުމަށް ފަހުގައި ވެސް އޭނާގެ ހަށިގަނޑަށް ބޮޑެތި އަނިޔާތަކެއް ދީފައިވާކަން އޭނާގެ ޕޯސްޓްމޯޓަމް ރިޕޯޓުން ހާމަވެއެވެ. އަދި، ޝިޢާއު މަރަށް ހުށަހެޅުނީ ޝާހިލްގެ ފަރާތުން ލިބުނު އަނިޔާތަކުގެ ސަބަބުންކަން ޕޯސްޓްމޯޓަމް ރިޕޯޓުން އެނގޭ ކަމަށް ވެސް ފުލުހުން މީގެ ކުރިން ވަނީ ބުނެފައެވެ.
މި މައްސަލައިގެ ހުކުމް، މި މަހުގެ ތެރޭގައި ކުރަން މަސައްކަތް ކުރަމުން އަންނަ ކަމަށް ކްރިމިނަލް ކޯޓުން ކުރިން ބުނެފައިވެއެވެ.