ސޯޅަ އަހަރުން ދަށުގެ ކުދިން ސޯޝަލް މީޑިއާ ބޭނުންކުރުން މަނާކުރަން ނޯވޭއިން ނިންމައިފިއެވެ.
ސޯޝަލް މީޑިއާ ބޭނުންކުރެވޭ އެންމެ ހަގު އުމުރަކީ 16 އަހަރު ކަމަށް ކަނޑައަޅައި، އެއަށްވުރެ ހަގު ކުދިންނަށް ސޯޝަލް މީޑިއާ ބޭނުންކުރުން މަނާކުރާ ގައުމުތަކުގެ ލިސްޓަށް ނޯވޭ އިތުރުވާއިރު، ނޯވޭގެ ސަރުކާރުން މިހާރު ދަނީ 16 އަހަރުން ދަށުގެ ކުދިން ސޯޝަލް މީޑިއާ ޕްލެޓްފޯމްތަކަށް ވަނުން ހުއްޓުވުމަށް ޓަކައި ޕާލަމަންޓަށް ހުށަހަޅާނެ ބިލެއް ތައްޔާރުކުރަމުންނެވެ.
މި ގާނޫނުގެ ދަށުން، ކުދިންގެ އުމުރު ކަށަވަރުކުރުމަށް ޓަކައި ވަރުގަދަ ނިޒާމުތަކެއް ގާއިމުކުރުމުގެ ޒިންމާ ސޯޝަލް މީޑިއާ ކުންފުނިތަކުން އުފުލަން ޖެހޭނެއެވެ.
ނޯވޭގެ ބޮޑުވަޒީރު ޖޯނަސް ގަހް ސްޓޯރޭ ވިދާޅުވީ، މި ފިޔަވަޅަކީ ކުޑަކުދިންގެ "ޅައުމުރުގެ ދުވަސްތައް" އަލްގޮރިދަމްތަކާއި ސްކްރީންތަކުގެ ނުފޫޒުން ސަލާމަތްކޮށް، އެކުދިންނަށް ރައްކާތެރި މާހައުލެއް ހޯދައިދިނުމަށް އަޅާ މުހިންމު ފިޔަވަޅެއް ކަމަށެވެ. މި ބިލު، މިހިނގާ 2026 ވަނަ އަހަރުގެ ނިޔަލަށް ޕާލަމަންޓަށް ހުށަހެޅުމަށް ވަނީ ތާވަލުކުރެވިފައެވެ.
ކުޑަކުދިންނަށް ސޯޝަލް މީޑިއާ މަނާކުރުމާމެދު ގިނަ ގައުމުތަކުން ދަނީ ވިސްނަމުން ---
ކުޑަކުދިންނަށް ސޯޝަލް މީޑިއާ މަނާކުރުމުގެ ގާނޫނެއް އެންމެ ފުރަތަމަ ފާސްކުރީ މިދިޔަ ޑިސެމްބަރު މަހު އޮސްޓްރޭލިއާއިންނެވެ. އޮސްޓްރޭލިއާގެ ފަހަތުން ފްރާންސް، އިންޑޮނޭޝިއާ، ސްޕެއިން، ތުރުކީ، އަދި ގްރީސް ފަދަ ގައުމުތަކުން ވެސް ދަނީ މިފަދަ ފިޔަވަޅުތަކެއް އެޅުމަށް މަސައްކަތް ކުރަމުންނެވެ.
ކުޑަކުދިންނަށް ސޯޝަލް މީޑިއާ ވަގުތުން މަނާކުރުމަށް ފިޔަވަޅުތައް އަޅަމުން ދިޔަ ނަމަވެސް، އިނގިރޭސިވިލާތުން މިފަދަ ވަގުތީ މަނާކުރުމަކަށް ވޯޓު ނުދީ، އިތުރު މަޝްވަރާތަކެއް ކުރުމަށް ވަނީ ނިންމާފައެވެ. އިނގިރޭސި ސަރުކާރުން ބޭނުންވަނީ ވަގުތުން މަނާކުރުމުގެ ބަދަލުގައި، ސޯޝަލް މީޑިއާ ބޭނުންކުރާ ވަގުތު ކަނޑައެޅުމާއި ބައެއް ޚިދުމަތްތައް ހަނިކުރުން ފަދަ ލުއި ފިޔަވަޅުތަކެއް އެޅުމަށެވެ.
މިފަދަ މަނާކުރުންތަކުގެ ފައިދާއާ މެދު ބައެއް މާހިރުން ސުވާލު އުފައްދައެވެ. އޮސްޓްރޭލިއާގައި ހެދި ދިރާސާއަކުން ދައްކާ ގޮތުގައި، ސޯޝަލް މީޑިއާ މަނާކުރުމަށްފަހު ވެސް 12 އަހަރާއި 15 އަހަރާ ދެމެދުގެ 61 އިންސައްތަ ކުދިން އެކި ގޮތްގޮތުން ސޯޝަލް މީޑިއާ އެކައުންޓްތަކަށް ވަދެ ބޭނުންކުރެއެވެ.
އެމެރިކާގެ ބައެއް ސްޓޭޓްތަކުން ވެސް މިހާރު ވަނީ އުމުރާ ގުޅޭ ހިފޭއްޓުންތައް ގެންނަން ފަށާފައެވެ. އަދި މެޓާ ފަދަ ކުންފުނިތަކާ ދެކޮޅަށް ކުރެވޭ ދައުވާތަކާއެކު، މުޅި އެމެރިކާގައި ވެސް މިފަދަ ގައުމީ ފެންވަރުގެ މަނާކުރުމެއް އައުމަކީ އެކަށީގެންވާ ކަމެއް ކަމަށް ބެލެވެއެވެ.