އެމެޒޯންގެ ޑެލިވަރީ ޑްރޯންތަކުން މާ މަތިން ޕާރުސަލްތައް ވައްޓާތީ ކަސްޓަމަރުން ރުޅިގަދަވެ ޝަކުވާކުރަން ފަށައިފިއެވެ.
ރިޕޯޓްތައް ބުނާގޮތުން އެމެޒޯންގެ "ޕްރައިމް އެއާ" ޑްރޯން ޑެލިވަރީ ޚިދުމަތުން ޕާރުސަލްތައް ގާތްގަނޑަކަށް 10 ފޫޓު މަތިން ވައްޓާލުމުގެ ސަބުން އޯޑަރުތައް ހަލާކުވެ، ކަސްޓަމަރުން ވަނީ ވަރަށް ބޮޑަށް ޝަކުވާ ކުރަން ފަށައިފައެވެ.
އެމެރިކާގެ އެރިޒޯނާ، ފްލޮރިޑާ، މިޝިގަން، ކަންސަސް އަދި ޓެކްސަސް ފަދަ ބައެއް ސްޓޭޓްތަކުގައި 2024 ވަނަ އަހަރުގެ ފަހުކޮޅުން ފެށިގެން ތަޢާރަފުކުރި އެމްކޭ30 ޑްރޯންތަކީ ފަސް ޕައުންޑަށް ވުރެ ލުއި އައިޓަމްތައް ގަޑިއިރެއްގެ ތެރޭގައި ގެއަށް ގެނެސްދިނުމަށް ފަރުމާކޮށްފައިވާ އުދުހޭ ޑިވައިސްތަކެކެވެ.
ޑްރޯންތަކުގައި މީހުންނާއި ޖަނަވާރުން އަދި މުދަލުން ސަލާމަތްވުމަށް "ސެންސް އެންޑް އެވޮއިޑް" ޓެކްނޮލޮޖީ ހިމަނާފައިވީނަމަވެސް، ޕާރުސަލް ބިންމައްޗަށް ބާލާއިރު "މަޑުމައިތިރި ލޭންޑިންއެއް" ކަށަވަރު ނުކުރެވޭކަމަށް ވެއެވެ.
ޔޫޓިއުބަރު ތަމާރާ ހެންކޮކް ފަދަ ކަސްޓަމަރުން ވަނީ ޑްރޯންތަކުގެ ހާލަތު ޓެސްޓްކުރުމަށް ސިރަޕް ފުޅިއެއް އޯޑަރުކޮށް ވީޑިއޯ ކޮށްފައެވެ. ވީޑިއޯއިން ފެނިގެންދަނީ ޑްރޯން އިން ޕާރުސަލް ވައްޓާލުމުން ފުޅި ފަޅައިގެން ސިރަޕް ފައިބާތަނެވެ.
މީގެ އިތުރުން ވައިގެ ތެރޭގައި މައްސަލަ ދިމާވެ، ވާރޭ ވެހޭ ވަގުތަކުގައި ޑްރޯންތައް ވެއްޓުމާއި، ނުރައްކާތެރި ހާދިސާތައް ހިނގާފައިވާކަމަށްވެސް ރިޕޯޓްތައް ބުނެއެވެ.
ސޯޝަލް މީޑިއާގައި މިފަދަ ވީޑިއޯތައް ގިނައިން ދައުރުވަމުންދާއިރު، ބައެއް މީހުން ބުނަނީ "އެންމެ ރަނގަޅު ގޮތަކީ ބޭރަށް ދުވެފައި ގޮސް ޕެކޭޖް ބިންމައްޗަށް ޖެހުމުގެ ކުރިން ހިފުން" ކަމަށެވެ.
ޑްރޯން ޑެލިވަރީއަކީ މީހުން ކުރާ ޑެލިވަރީއަށް ވުރެ ފަސޭހަ ޚިދުމަތެއްގެ ގޮތުގައި އެމެޒޯން ސިފަކުރިނަމަވެސް، މިހާރު ފެންނަނީ އެއާ ޚިލާފު މަންޒަރުތަކެއް ކަމަށް ކަސްޓަމަރުން ދަނީ ބުނަމުންނެވެ.
އެމެޒޯންގެ "ޕްރައިމް އެއާ" ޑްރޯން ޑެލިވަރީ ޚިދުމަތަކީ 2013 ވަނަ އަހަރު އިއުލާންކުރި މަޝްރޫޢެކެވެ. އެފްއޭއޭގެ ހުއްދަ ނުލިބުމުގެ މައްސަލަތަކާއި ޓެކްނިކަލް ގޮންޖެހުންތަކުގެ ސަބުން ތަޢާރަފުކުރުން ލަސްވުމަށްފަހު، 2022 ވަނަ އަހަރު ކެލިފޯނިއާގެ ލޮކްފޯޑްގައި ފުރަތަމަ ޓެސްޓް ފެށުނެވެ.
މިހާރު ބޭނުންކުރަމުންދާ އެމްކޭ30 ޑްރޯނަކީ 2024 ވަނަ އަހަރުގެ ފަހުކޮޅު އެރިޒޯނާ، ފްލޮރިޑާ، މިޝިގަން، ކަންސަސް އަދި ޓެކްސަސް ފަދަ ސްޓޭޓްތަކުގައި ދޫކުރި އަޕްގްރޭޑް މޮޑެލްއެކެވެ.