އާރީ ސޭންޑަލް ޑައިރެކްޓްކުރާ ނެޓްފްލިކްސްގެ އާ ރޮމޭންޓިކް ކޮމެޑީ ފިލްމެއްގެ މުހިންމު ރޯލަކުން މަޝްހޫރު ލަވަކިޔުންތެރިޔާ އަދި އެކްޓަރު ނިކް ޖޯނަސް ފެންނާނެކަން ހާމަކޮށްފިއެވެ.
މޮނާކް މީޑިއާގެ ސްޓީވް ބާނެޓާއި، ލިންކަން ރޯޑް ފިލްމްސްގެ މާކް ރޮސްގެ އިތުރުން ނިކް ޖޯނަސްގެ އަމިއްލަ ޕްރޮޑަކްޝަން ހައުސް 'ޕަވަޑް ބައި ޖޯނަސް'އިން އުފައްދާ މި ފިލްމުގެ ސްކްރިޕްޓް ތައްޔާރުކުރަނީ ތަމާރާ ޗެސްޓްނާއެވެ.
މި ފިލްމުގެ ވާހަކަ ބިނާވެފައިވަނީ މިނިވަންކޮށް އުޅެމުންދާ، ކައިވެންޏާ ދުރު ހުސްހަށިބައި މީހެއްގެ މައްޗަށެވެ. އޭނާގެ އަމާން ދިރިއުޅުމަށް ބޮޑު ބަދަލެއް އަންނަނީ ކުއްލި ގޮތަކަށް އޭނާގެ ތިމާގެ މީހެއްގެ ތުއްތު ކުއްޖަކު ބަލަން ހަވާލުވުމުންނެވެ.
ނިކް އަނބިމީހާ ޕްރިޔަންކާއާ އެކު--ފޮޓޯ/ޓެލެގްރާފްއިންޑިއާ
ބަފައެއްގެ ޒިންމާތަކަށް އޭނާ ހޭނެމުންދަނިކޮށް، ބަންދު ދުވަސްތަކާ ދިމާކޮށް އެ ކުއްޖާގެ ބެލެނިވެރިކަން ހޯދުމަށް އަންނަ އަންހެނަކާ ދެމެދު އުފެދޭ ލޯބީގެ ގުޅުމުގެ ސަބަބުން ދިރިއުޅުމަށް އަންނަ ބޮޑެތި ބަދަލުތައް ފިލްމުން ދައްކުވައިދޭނެއެވެ.
އިންޑިއާގެ ބަތަލާ ޕްރިޔަންކާ ޗޯޕްރާގެ ފިރިމީހާ ނިކް ޖޯނަސްގެ ކުރިއަށްހުރި ފިލްމުތަކުގެތެރޭ، އަންނަ މެއި މަހުގެ 29ގައި ރިލީޒްކުރާ ކޮމެޑީ މިއުޒިކަލް "ޕަވަ ބެލެޑް" އާއި، ކެތްރިން ނިއުޓަންއާ އެކު ކުޅޭ ބިރުވެރި ފިލްމު "ވައިޓް އެލެފަންޓް" ހިމެނެއެވެ.
މީގެ އިތުރުން، މި އަހަރުގެ ޑިސެމްބަރު މަހު ނެރުމަށް ހަމަޖެހިފައިވާ މަޝްހޫރު "ޖުމާންޖީ" ފްރެންޗައިޒްގެ ތިންވަނަ ފިލްމުންވެސް އޭނާ ފެނިގެންދާނެއެވެ. ނިކް އެންމެ ފަހުން ފެނިގެންދިޔައީ 2025 ވަނަ އަހަރު ރިލީޒްކުރި "އޭ ވެރީ ޖޯނަސް ކްރިސްމަސް މޫވީ"އިންނެވެ.