ބަންގްލަދޭޝްގެ ކޮކްސް ބާޒާރުން ފުރައިގެން މެލޭޝިއާއަށް ދަތުރުކުރި ބޯޓެއް, 250 އަށްވުރެ ގިނަ ރޮހިންޖާ އަދި ބަންގްލަދޭޝްގެ ރެފިއުޖީނާއެކު އަންޑަމަން ކަނޑަށް ފެތިއްޖެއެވެ.
މި ހާދިސާ ހިނގާފައިވާކަން ހާމަވީ، އިންޑިއާ ކަނޑުން ބަންގްލަދޭޝްގެ އުޅަނދަކުން ނުވަ މީހަކު ސަލާމަތްކޮށް، މިދިޔަ ބުރާސްފަތި ދުވަހު ބަންގްލަދޭޝްގެ ފުލުހުންނާ ހަވާލުކުރުމާ ގުޅިގެންނެވެ. ޓެކްނާފް ޕޮލިސް ސްޓޭޝަންގެ އޮފިސާ އިން ޗާޖު ސައިފުލް އިސްލާމް ވިދާޅުވި ގޮތުގައި، ސަލާމަތްކުރެވުނު ނުވަ މީހުންގެ ތެރެއިން ހަ މީހަކީ އިންސާނީ ވަގުފާރިކުރާ މީހުން ކަމަށް ތުހުމަތުކުރެވޭ މީހުންނެވެ. އަދި އެ މީހުން މިހާރު ވަނީ ޖަލަށް ލާފައެވެ.
މޫސުން ގޯސްވުމުގެ ސަބަބުން ފެތުނު މި ބޯޓުގައި ގަވާއިދާ ޚިލާފަށް މީހުން އުފުލި މައްސަލަ ޓެކްނާފް މޮޑެލް ޕޮލިސް ސްޓޭޝަނަށް ވަނީ ހުށަހަޅާފައެވެ. ބަންގްލަދޭޝްގެ ކޯސްޓްގާޑުން ކަށަވަރުކޮށްދިން ގޮތުގައި، ސަލާމަތްވި މީހުން ހޯދާފައިވަނީ އަންޑަމަން ޖަޒީރާ ކައިރިންނެވެ.
މި ހިތާމަވެރި ހާދިސާއާ ގުޅިގެން އދ. ގެ ރެފިއުޖީންނާ ބެހޭ އިދާރާ (ޔޫއެންއެޗްސީއާރު) އަދި އިންޓަނޭޝަނަލް އޯގަނައިޒޭޝަން ފޯ މައިގްރޭޝަން (އައިއޯއެމް) އިން ނެރުނު ގުޅިފައިވާ ބަޔާނެއްގައި ބުނެފައިވަނީ، މިއީ ރޮހިންޖާ ދަރިކޮޅުގެ މީހުންނަށް ދިގު މުއްދަތެއްގެ ހައްލެއް ނުލިބި، އެ މީހުން އުފުލަމުންދާ ތަކުލީފުތައް ދައްކުވައިދޭ ކަމެއް ކަމަށެވެ. އަދި ފުރާނަ ސަލާމަތްކުރުމަށް ބޭނުންވާ އެހީތެރިކަން ފޯރުކޮށްދިނުމަށް ބައިނަލްއަޤުވާމީ މުޖުތަމަޢުން ފައިސާގެ އެހީތެރިކަން އިތުރުކުރުމަށް އެ އިދާރާތަކުން ވަނީ ގޮވާލާފައެވެ.
މިޔަންމާގެ އަސްކަރިއްޔާއިން 2017 ވަނަ އަހަރުގެ އޮގަސްޓް މަހު ހިންގި ލާއިންސާނީ އަމަލުތަކުން ސަލާމަތްވުމަށް ފިލައިގެން އައި ގާތްގަނޑަކަށް 1.3 މިލިއަން ރޮހިންޖާ ރެފިއުޖީން ބަންގްލަދޭޝްގައި ދިރިއުޅެމުންދެއެވެ. މިޔަންމާގެ އަސްކަރީ ސަރުކާރުން އެއްބާރުލުން ނުދިނުމުގެ ސަބަބުން އެ މީހުން އަނބުރާ ޤައުމަށް ފޮނުވުމުގެ މަސައްކަތް ހުއްޓިފައިވާއިރު، ގިނަ ބަޔަކު ދަނީ ފުރާނައަށް ނުރައްކާތެރި ކަނޑުދަތުރުތައް ކުރަމުންނެވެ.