މި ހިނގާ އޭޕްރިލް މަހުގެ ކުރީކޮޅު ސަރުކާރުން މާލޭގައި ފެށި ޓެކްސީ ލައިނުގެ ޚިދުމަތަށް ހަފުތާއެއް ފާއިތުވެގެން ދިޔައިރު، އެ ޚިދުމަތް އަދިވެސް ހިލޭ ދެމުން އަންނަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އިން އެކަމަށް ޚާއްސަކޮށް ހަދާ އެޕް ނުނިމޭތީ ކަމަށް މައުލޫމާތު ލިބިއްޖެއެވެ.
މި ޚިދުމަތް އިފުތިތާހުކުރި ރޭ ވަނީ، ޚިދުމަތް ހޯދުމަށް 1655 ނަންބަރަށް ގުޅޭނެ ކަމަށާއި، އަދި އެ ކަމަށް ޚާއްސަ ވެބް އެޕްލިކޭޝަން maletaxi.web.app އިން ވެސް ޓެކްސީ ނެގޭނެ ކަމަށް ބުނެފައެވެ.
ނަމަވެސް "ސަން"އަށް އެނގިފައިވާ ގޮތުގައި، މި ޚިދުމަތް އެންމެ ފުރަތަމަ ފެށިއިރު ވެސް މި ކަމަށް ޚާއްސަ އެ ވެބް އެޕްލިކޭޝަން ނިމިފައެއް ނުވެއެވެ. އަދި މިހާރު އެ ޚިދުމަތް ފެށިތާ ހަފުތާއަކަށްވުރެ ގިނަ ދުވަސްވެފައިވާއިރު އަދިވެސް އެޕްލިކޭޝަން ނިމޭނެ ތާރީޚެއް ވެސް ނޭނގެއެވެ.
އަދި ހިލޭ ޓެކްސީ ދަތުރުކުރެވޭ އެއް ހަފުތާގެ މުއްދަތު ނިމުނުއިރު އަދިވެސް ހިލޭކޮށްފައި އޮތީ އެހެންވެ ކަމަށް ވެސް މައުލޫމާތު ލިބެއެވެ.
މި ކަމުގައި އެމްޓީސީސީގެ ރަސްމީ ބަހެއް ހޯދަން ސުވާލުކުރުމުން އަދި ޖަވާބެއް ނުލިބެއެވެ.
ސޯޝަލް މީޑިއާގައި ބައެއް ފަރާތްތަކުން ތުހުމަތުކުރާ ގޮތުގައި އެމްޓީސީސީގެ ޓެކްސީ އެޕް ހަދަން ބަޔަކާ ހަވާލުކޮށްފައިވަނީ، އެފަދަ އެޕެއް ހެދޭ އަގަށްވުރެ އެތައް ގުނައެއް ބޮޑު އަގެއްގައެވެ. އަދި އެ މުއާމަލާތަކީ ވާދަވެރި އެހެން ވިޔަފާރިތަކަށް އެނގުމެއް ނެތި އެމްޓީސީސީން ސިއްރުން ހިންގި މުއާމަލާތެއްކަމަށް ބުނެ ވެސް އަންނަނީ ތުހުމަތުކުރަމުންނެވެ.
ގިނަ އަދަދެއްގެ އާންމު ރައްޔިތުން އަންނަނީ، 1655 ނަންބަރަށް ގުޅައިގެން ލައިނުގައި ގިނައިރު މަޑުކުރަން ޖެހުމުގެ ޝަކުވާ ވެސް ކުރަމުންނެވެ. އަދި ޓެކްސީ ހޯދަން ދަތިކަމަށް ވެސް ބުނެއެވެ.