ދުނިޔޭގެ ފުޓްބޯޅައިގެ މައި އިދާރާ (ފީފާ) އިން 2026 ވަނަ އަހަރުގެ ވޯލްޑް ކަޕްގައި އީރާނުން ކުޅެންޖެހޭ މެޗުތައް އެމެރިކާގެ ބަދަލުގައި މެކްސިކޯއަށް ބަދަލުކޮށްދިނުމަށް އެދި އީރާނުން ހުށަހެޅި ހުށަހެޅުމަށް ރަސްމީކޮށް އިންކާރުކޮށްފިއެވެ.
މެކްސިކޯގެ ރައީސް ކްލައުޑިއާ ޝީންބައުމް ކަށަވަރުކޮށްދެއްވި ގޮތުގައި، ފީފާއިން މި ނިންމުން ނިންމީ މެޗުތައް ބަދަލުކުރުމަކީ ލޮޖިސްޓިކް ގޮތުންނާއި އިންތިޒާމުތަކުގެ ގޮތުން ވަރަށް ބޮޑު އުނދަގޫތަކެއް ކުރިމަތިވާނެ ކަމެއް ކަމަށް ބުނެއެވެ.
މި މައްސަލަ ހޫނުވީ މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިޒްރޭލުން ގުޅިގެން އީރާނަށް ދިން ކުއްލި ހަމަލާތަކާ ގުޅިގެންނެވެ.
އެ ހަމަލާތަކުގައި އީރާނުގެ އެންމެ މަތީ ވެރިޔާ އަލީ ޚާމަނާއީ އާއި ގިނަ އަދަދެއްގެ އާންމުން މަރުވުމާ ގުޅިގެން ދެގައުމުގެ ދެމެދުގައި ވަނީ ހަނގުރާމަވެރި މާހައުލެއް އުފެދިފައެވެ. އީރާނުގެ ފުޓްބޯޅަ ފެޑަރޭޝަނުން ކަންބޮޑުވުން ފާޅުކުރީ، އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި އީރާނު ޓީމުގެ ސަލާމަތާ ބެހޭގޮތުން ދެއްކެވި ވާހަކަފުޅުތަކަކާ ގުޅިގެންނެވެ.
ޓްރަމްޕް ވިދާޅުވެފައިވަނީ އީރާނު ޓީމުގެ ރައްކާތެރިކަން ކަށަވަރު ނުކުރެވޭނެ ކަމަށެވެ. މީގެ ރައްދުގައި އީރާނުން ވަނީ ސަލާމަތީ ކަށަވަރުކަން ނެތް ތަނަކަށް ޓީމު ނުފޮނުވާނެ ކަމަށާއި، މުބާރާތް ބޮއިކޮޓް ކޮށްފާނެ ކަމުގެ އިންޒާރުވެސް ދީފައެވެ.
ނަމަވެސް ފީފާގެ ރައީސް ޖިއާނީ އިންފަންޓީނޯ ދާދިފަހުން ތުރުކީގައި އީރާނު ޓީމާ ބައްދަލުކުރައްވައި ވިދާޅުވީ، އީރާނުން ވޯލްޑް ކަޕްގައި ކުޅޭނެ ކަމުގެ ފުރިހަމަ އިތުބާރު އެބައޮތް ކަމަށެވެ. މުބާރާތުގެ ގުރުއަތުލުން ނިމިފައިވާ ގޮތުން އީރާނު ހިމެނެނީ ގްރޫޕް 'ޖީ' ގައެވެ.
މި ގްރޫޕްގައި ބެލްޖިއަމް، މިޞްރު އަދި ނިއުޒީލަންޑް ހިމެނޭއިރު، އީރާނުގެ މެޗުތައް ކުޅުމަށް ހަމަޖެހިފައިވަނީ އެމެރިކާގެ ހުޅަނގު އައްސޭރީގެ ސިޓީތައް ކަމަށްވާ ލޮސް އެންޖެލިސް އާއި ސިއެޓްލްގައެވެ.
އީރާނުގެ ކުޅިވަރާ ބެހޭ ވަޒީރު އަޙްމަދު ދުންޔާމާލީ ވިދާޅުވީ، މެޗުތައް ބަދަލުނުކުރާ ނަމަ އީރާނު މުބާރާތުގައި ބައިވެރިވުމާމެދު އަދިވެސް އޮތީ ސުވާލު މާކެއްގެ ތެރޭގައި ކަމަށެވެ.