ދާދި އިހަކަށްދުވަހު ދުނިޔޭގެ މަޝްހޫރު ލަގްޒަރީ ފެޝަން ބްރޭންޑް ޝެނެލް (Chanel) ބްރޭންޑްގެ އެމްބަސެޑަރަކަށް އިންޑިއާއަށް ނިސްބަތްވާ ޒުވާނާ ބަވީތާ މަންދާވާ ހަމަޖެއްސުމާ އެކު އޭނާ ވަނީ ތާރީޚުން ޖާގަ ހޯދައި ގިނަ ބައެއްގެ ސަމާލުކަން ހޯދާފައެވެ.
ދުނިޔޭގެ މަޝްހޫރު ފެޝަން ބްރޭންޑް "ޝެނެލް"ގެ 'ހައުސް އެމްބަސެޑަރު'ގެ މަގާމަށް ބަވީތާ ހަމަޖެއްސުމާއެކު، އިންޑިއާގެ ތާރީޚުގެ ސޮފްހާތަކަށް އޭނާގެ ނަން ދިޔައީ މިއީ މި ޝަރަފުވެރި މަގާމަށް އިންޑިއާގެ މޮޑެލްއަކު އައްޔަންކުރި ފުރަތަމަ ފަހަރު ކަމަށް ވުމުންނެވެ.
މި ނިންމުމަކީ ބައިނަލްއަގުވާމީ ލަގްޒަރީ ފެޝަންގެ ދުނިޔޭގައި އިންޑިއާ ތަމްސީލު ކުރުމަށް ލިބުނު ވަރަށް ބޮޑު ކުރިއެރުމެކެވެ. ބަވީތާ މި އުފާވެރި ޚަބަރު ހިއްސާކޮށްފައި ވަނީ މިދިޔަ ހޮނިހިރު ދުވަހު އޭނާގެ އިންސްޓަގްރާމް މެދުވެރިކޮށެވެ.
ބަވީތާ މަންދާވާ ފެޝަން ޝޯއެއްގެ ރަންވޭގައި--ފޮޓޯ/އެންޑީޓީވީ
އޭނާގެ އިންސްޓަގްރާމް ޕޯސްޓުގައި ލިޔެފައިވާ ގޮތުގައި، ޝެނެލް އަކީ ޒަމާނީ މަސައްކަތްތެރި އަންހެނުން ރަމްޒުކޮށްދޭ ބްރޭންޑެކެވެ. އަދި އެ ބްރޭންޑްގެ އެމްބަސެޑަރަކަށް ވުމަކީ އޭނާއަށް ލިބުނު ވަރަށް ބޮޑު ފަޚުރެއް ކަމަށާއި، ބްރޭންޑްގެ އާޓިސްޓިކް ޑައިރެކްޓަރު މެތިއު ބްލޭޒީ ގެންގުޅުއްވާ އާ ތަސައްވުރާ މެދު އޭނާ ވަރަށް ބޮޑަށް އުފާކުރާ ކަމަށް ބުނެފައިވެއެވެ. ޝެނެލްއަކީ އޭނާގެ ހިތުގައި ހާއްސަ ގަދަރެއް ދެވިފައިވާ ބްރޭންޑެއް ކަމަށްވެސް ބަވީތާގެ ޕޯސްޓުގައި ފާހަގަކުރިއެވެ.
އިންޑިއާގެ ހައިދަރުއާބާދުގެ ތެލުގޫ އާއިލާއަކަށް އުފަން ބަވީތާ އަކީ ޖަވާހަރްލާލް ނެހްރޫ ޓެކްނޮލޮޖިކަލް ޔުނިވާސިޓީން އާކިޓެކްޗާގެ ދާއިރާއިން ތައުލީމު ހާސިލުކޮށްފައިވާ ކުއްޖެކެވެ.
ނިއުޔޯކް ޔުނިވާސިޓީގައި މާސްޓާސްއަށް ކިޔަވަަމުން އަންނަ ބަވީތާ މޮޑެލިންގް ދާއިރާއަށް ތައާރަފްވީ ބްރޫކްލިންގެ ސަބްވޭ ސްޓޭޝަނެއްގައި ހުއްޓާ މޮޑެލް އެޖެންޓަކަށް އޭނާ ފާހަގަވެ ލިބުނު ފުރުސަތަކާ ގުޅިގެންނެވެ.
މޮޑެލް ކުރުމުގެ ދާއިރާއާ ގުޅުނުތާ އެންމެ ދެ ހަފުތާގެ ތެރޭގައި ބަވީތާ ވަނީ "ބޮޓެގާ ވެނެޓާ"ގެ 2025 ވަނަ އަހަރުގެ ސްޕްރިންގް/ސަމަ ޝޯއިން ފެނިފައެވެ. އޭގެ ކުރިން 2024 ވަނަ އަހަރުގެ ޑިސެމްބަރު މަހު މެތިއު ބްލޭޒީ ޝެނެލްގެ އާޓިސްޓިކް ޑައިރެކްޓަރުގެ މަގާމާ ހަވާލުވުމަށްފަހު، ބަވީތާ ވަނީ ޝެނެލްގެ އާ ކަލެކްޝަންތަކުގައި ބައިވެރިވާން ފަށާފައެވެ.
ނިއުޔޯކްގެ ޔުނިވާސިޓީއެއްގައި ކިޔަވަމުންދިޔަ ދަރިވަރެއްގެ ގޮތުން ފެށިގެން ގޮސް، ދުނިޔޭގެ އެންމެ ނަން މަޝްހޫރު ފެޝަން ޝޯތަކުގެ ރަންވޭއަށް ނިކުތުމާ ހަމައަށް ބަވީތާ ކަޑަތުކުރި ދަތުރަކީ، ހިތްވަރާއެކު މަސައްކަތްކޮށްފިނަމަ ކާމިޔާބީއާ ހަމައަށް ދެވޭނެކަން ސާބިތުކޮށްދޭ މިސާލެކެވެ.
އުމުރުން އެންމެ 26 އަހަރުގައި ބަވީތާ ހޯދި މި ކާމިޔާބީއާއެކު މުޅި ދުނިޔޭގެ ފެޝަން އިންޑަސްޓްރީގެ ސަމާލުކަން އޭނާއަށް ވަނީ ހުއްޓިފައެވެ.
ކިޔަވާ ދަރިވަރެއްގެ ގޮތުން ބައިނަލްއަޤުވާމީ ރަންވޭތަކުގެ މޮޑެލްއަކަށް އޭނާ ބަދަލުވެގެން ދިޔަ ގޮތަކީ، ފެޝަންގެ ދުނިޔެއަށް އަލަށް ނިކުންނަ ފަރާތްތަކަށް ހުޅުވިފައިވާ ފުރުސަތުތައް ދައްކުވައިދޭ ކަމެކެވެ. މިއަދު އޭނާއަކީ ބައިނަލްއަޤުވާމީ ފެންވަރުގައި މަސައްކަތްކުރާ އިންޑިއާގެ އެންމެ އުއްމީދީ މޮޑެލްތަކުގެ ތެރޭގައި ހިމެނޭ ޒުވާނެކެވެ.