ބަންޑާރަ މިސްކިތަކީ ދިވެހިންގެ ދީނާއި، ސަގާފަތާއި، ތާރީޚު ދައްކުވައިދޭ މުހިއްމު ރަމްޒެއް ކަމަށާއި، އެފަދަ ތަނެއް ތަޅާލުމަކީ ގާނޫނާ ވެސް ޚިލާފު ކަމަށް މާލޭގެ މޭޔަރު އާދަމް އާޒިމް މިރޭ ވިދާޅުވެއްޖެއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ހާމަކުރެއްވި ގޮތުގައި ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ބޭނުންވާ އެހީތެރިކަން، ދީލަތި ފަރާތަކުން ވަނީ ހަމަޖައްސައިދީފައެވެ. އެހެންކަމުން އެ ތަނުގައި މިސްކިތް އެޅުމުގެ މަސައްކަތް ފަށާނީ، ރޯދައިގެ ފަހުން ކަމަށާއި އެ މިސްކިތާއެކު، މާލޭގެ ހުރިހާ ބޮޑެތި މިސްކިތްތައް އާވާނެ ކަމަށް ޝަހީމް ވިދާޅުވިއެވެ.
އެކަމާ ގުޅިގެން ގިނަ ބަޔަކު ސޯޝަލް މީޑިއާގައި ދަނީ ކަންބޮޑުވުން ފާޅުކުރަމުންނެވެ. ޚާއްސަކޮށް ތާރީޚު ދިރާސާކުރައްވައި އަދި ތާރީޚީ ކަންކަން ހިމާޔަތްކުރަން ވަކާލާތުކުރައްވާ ގިނަ ބަޔަކު ވަނީ އެހާ ދުވަސްވީ މިސްކިތެއް ނެތިދާނެ ގޮތަށް އާ މިސްކިތެއް އަޅާތީ ކަންބޮޑުވުން ފާޅުކޮށްފައެވެ.
ސޯޝަލް މީޑިއާގައި އާޒިމް މިރޭ ވިދާޅުވީ ގައުމެއްގެ ކާބަފައިން ދޫކޮށްފައިވާ މުހިއްމު އާސާރުތަކަކީ، އެ ގައުމެއްގެ މޫނުބަލާ ލޯގަނޑު ކަމަށް ވާއިރު، ގަރުނެއް ވާން ކައިރިވެފައިވާ ބަންޑާރަ މިސްކިތް ތަޅައިލުމަށް ސަރުކާރުން ނިންމި ނިންމުން އެއްގޮތަކަށް ވެސް ބަލައި ނުގަންނަ ކަމަށެވެ. އަދި ބަންޑާރަ މިސްކިތަކީ ދިވެހިންގެ ދީނާއި، ސަގާފަތާއި، ތާރީޚު ދައްކުވައިދޭ މުހިއްމު ރަމްޒެއް ކަމަށް މޭޔަރު ވިދާޅުވިއެވެ.
ހަމައެއާއެކު މި މިސްކިތް ހުރި ހިސާބުގެ ގޮތުން މާލެ ސިޓީއަށް ޒިޔާރަތްކުރާ މީހުންގެ މެދުގައި ވެސް، މި ބިނާއަކީ ވަރަށް މަގުބޫލު ތަނަކަށް ވަނީ ވެފައި ކަމަށް މޭޔަރު ވިދާޅުވިއެވެ. އަދި ބަންޑާރަ މިސްކިތް ތަޅައިލުމަކީ، ރާއްޖޭގެ ތާރީޚީ ބިނާތަކާއި، ސަގާފީ ތަރިކަ ރައްކާތެރިކުރުމުގެ ގާނޫނާ ވެސް ޚިލާފު ކަމަކަށް ވާތީ، ސަރުކާރުގެ މި ނިންމުން ބަދަލުކުރުމަށް އާޒިމް ގޮވައިލެއްވިއެވެ.
އާޒިމް އެފަދައިން ވިދާޅުވިއިރު މާލޭގެ އެންމެ ކާރުބާރު ބޮޑު އުތުރު ފަރާތުގައި ހުންނަ ބަންޑާރަ މިސްކިތަށް، ކުރީގެ ރައީސް އިބްރާހީމް ނާސިރާއި މައުމޫން އަބްދުލްގައްޔޫމްގެ ވެރިކަމުގައި ބޮޑެތި ބަދަލުތަކެއް ގެނައެވެ.
އެއީ، ވޯރާ ވިޔަފާރިވެރިން ބިނާކުރި ވަރަށް ޒަމާންވީ މިސްކިތެކެވެ.
ތާރީޚަށް ލޯބިކުރައްވާ އެތައް ބަޔަކު ދަނީ އެ މިސްކިތް ތަޅާނުލައި، ހިމާޔަތްކުރުމަށް ގޮވާލަމުންނެވެ. އަދި "ސޭވް ބަންޑާރަ މިސްކިތް" ނަމުގައި ގިނަ ބަޔަކު ދަނީ ސޯޝަލް މީޑިއާ ކެމްޕެއިނެއް ވެސް ކުރަމުންނެވެ.
އެއާއެކު ސޯޝަލް މީޑިއާގައި މިނިސްޓަރު ޝަހީމް ވަނީ ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފައި އޮންނަ މިސްކިތެއް ނޫން ކަމަށް ވިދާޅުވެފައެވެ. އަދި އެތަނުގައި ބޮޑު މިސްކިތެއް ބިނާކުރަން ގަސްތުކުރީ އެ ސަބަބަށްޓަކައި ކަމަށް ޝަހީމް ވިދާޅުވިއެވެ.
ނަމަވެސް މިނިސްޓްރީން ކަންކަން ކުރާނީ ރައްޔިތުންގެ އަޑުއެހުމަށްފަހު ކަމަށް ޝަހީމް ވިދާޅުވިއެވެ. އަދި އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށް ވެސް ޝަހީމް ވިދާޅުވިއެވެ.
ބަންޑާރަ މިސްކިތުގެ އިތުރުން މަޖީދީމަގުގައި ހުންނަ ޒިކުރާ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅާނެކަން މިނިސްޓަރު މިއަދު ވަނީ ހާމަކުރައްވާފައެވެ. އެ މިސްކިތް އަޅަން ބޭނުންވާ ދީލަތި އެހީވެސް ހަމަޖެހިފައިވާއިރު، ރޯދައިގެ 27 ވަނަ ވިލޭރޭގައި އެ މިސްކިތުގެ ބިންގާ އަޅައިދިނުމަށް އެދިފައިވާ ކަމަށް މިނިސްޓަރު ވިދާޅުވިއެވެ.