ގޫގުލް ޕްލޭސްޓޯރުގައި ހުރި އެންޑްރޮއިޑް އެޕްތަކުގެ ތެރެއިން ބެޓެރި ޚަރަދު ބޮޑު ނުވަތަ ގިނައިން ބެޓެރި ބޭނުންކުރާ އެޕްތަކުގެ އިންޒާރު ދޭން ފަށައިފިއެވެ.
މިކަން ހާމަކޮށް ބްލޮގް ޕޯސްޓެއްގައި ގޫގުލް އިން ބުނީ، ޕްލޭ ސްޓޯރުގައި ހުރި ބެޓެރި ބޭނުންކުރުން އިތުރު އެޕްތައް އެނގޭ އިންޒާރުގެ ނޯޓިސްއެއް މިހާރު ދައްކަން ފަށާފައިވާ ކަމަށެވެ. އަދި މިފަދަ އެޕްތައް ޕްލޭ ސްޓޯރުގެ ރެކޮމެންޑޭޝަންތަކުން ބޭރުކުރެވޭނެ ކަމަށް އެ ކުންފުނިން ބުންޏެވެ.
ގޫގުލް އިން ބުނި ގޮތުގައި، މިފަދަ އެޕްތަކަކީ އެންޑްރޮއިޑްގެ "ޕާޝަލް ވޭކް ލޮކް" މެކޭނިޒަމް ނަހަމަ ގޮތުގައި ބޭނުންކޮށް، ފޯނުގެ ސްކްރީން ނިވާފައި ހުންނައިރުވެސް ސީޕީޔޫ ބެކްގްރައުންޑްގައި މަސައްކަތް ކުރުވާ އެޕްތަކެވެ. މިކަމުގެ ސަބަބުން ފޯނުގެ ބެޓެރި ވަރަށް އަވަހަށް ހުސްވެއެވެ.
އެފަދަ އެޕްތައް އިންސްޓޯލުކުރުމުގެ ކުރިން މެސެޖް ފެންނާނެ ---
ގޫގުލް އިން "ނުރަނގަޅު އާދަ" ކަމަށް ބަލަނީ، ފާއިތުވި 28 ދުވަހުގެ ތެރޭގައި، ފަސް އިންސައްތައަށް ވުރެ ގިނަ ފަހަރު، ޔޫޒަރުންގެ ސްކްރީން ނިވާފައި ހުއްޓާ އެވްރެޖްކޮށް ދެ ގަޑިއިރަށް ވުރެ ގިނައިރު ޕާޝަލް ވޭކް ލޮކް އެކްޓިވްކޮށްފައި ބެހެއްޓުމުންނެވެ.
ގޫގުލް އިން ހާމަކޮށްފައިވާ އިންޒާރުގެ މެސެޖްގައި ވާނީ، "މި އެޕްގެ ބެކްގްރައުންޑް އެކްޓިވިޓީ ގިނަވުމުގެ ސަބަބުން އާދަޔާ ޚިލާފަށް ބެޓެރި ބޭނުންވުމަކީ އެކަށީގެންވާ ކަމެއް" މިހެންނެވެ.
ސްމާޓްފޯނު ބޭނުންކުރާ ގިނަ މީހުންނަށް ކުރިމަތިވާ އެއް މައްސަލައަކީ ބެޓެރި އަވަހަށް ހުސްވުމެވެ. މީގެ މައިގަނޑު އެއް ސަބަބަކީ އެންޑްރޮއިޑް އެޕްލިކޭޝަންތަކުން ފޯނުގެ ބެކްގްރައުންޑްގައި ކުރާ މަސައްކަތްތަކެވެ.
"ޕާޝަލް ވޭކް ލޮކް" ކިޔާ މެކޭނިޒަމެއް މެދުވެރިކޮށް، އެޕްތަކަށް ސްކްރީން ނިވާފައި ހުންނައިރުވެސް ފޯނުގެ ސީޕީޔޫ އެކްޓިވްކޮށް ބަހައްޓާނެ ގޮތް ލިބިދެ އެވެ. މިއީ ބައެއް ހާލަތްތަކުގައި (މިސާލަކަށް އޯޑިއޯ ޕްލޭކުރުން، ލޮކޭޝަން ޚިދުމަތްތައް، ނުވަތަ ޑޭޓާ ޓްރާންސްފާ ކުރުން) ބޭނުންތެރި ކަމެއް ނަމަވެސް، އެޕްތަކުން މިއަށް އިހުމާލުވެ ނަހަމަ ގޮތުގައި ބޭނުންކުރުމުން ބެޓެރި ހުސްވާ މިންވަރު މަތިވެ އެވެ.
ގޫގުލް އިން މިހާރު މިވަނީ މި މައްސަލަ ހައްލުކުރުމަށްޓަކައި އެޕް ޑިވެލޮޕަރުންނަށް އިރުޝާދު ދީ، ބެޓެރި ބޭނުންކުރާ މިންވަރު މަތި އެޕްތައް ފާހަގަކޮށް، ބޭނުންކުރާ ފަރާތްތަކަށް އިންޒާރު ދޭން ފަށާފައެވެ. މިކަމުގެ ސަބަބުން އެޕްތަކުގެ ކޮލިޓީ ރަނގަޅުވެ، ބޭނުންކުރާ ފަރާތްތަކަށް އިތުރު ފައިދާތަކެއް ލިބޭނެ ކަމަށް ބެލެވެއެވެ.