އިސްރާއީލުން އަވަހާރަކޮށްލާފައިވާ އީރާނުގެ ސުޕްރީމް ލީޑަރު އަލީ ޚާމަނާއީ އަވަހާރަ ކޮށްލަން އިސްރާއީލުން ނިންމީ ނޮވެމްބަރު މަހު ކަމަށާއި އޭރު ނިންމީ އޭގެ ހަ މަސް ފަހުން އެ އޮޕަރޭޝަން ހިންގަން ކަމަށް އެ ގައުމުގެ ދިފާއީ ވަޒީރު އިސްރާއީލް ކަޓްޒް ވިދާޅުވެއްޖެއެވެ.
ޚާމަނާއީ އަވާހަރަކޮށްލާފައި ވަނީ މިދިޔަ ހޮނިހިރު ދުވަހު އިސްރާއީލުން އީރާނަށް ދިން ފުރަތަމަ ހަމަލާތަކުގައެވެ.
" ނޮވެމްބަރު މަހު އަޅުގަނޑުމެން ބޮޑުވަޒީރާ އެކު ވަރަށް ވަރުގަދަ ފޯރަމެއްގައި ބައްދަލުކޮށް ބޮޑުވަޒީރު (ބެންޖަމިން ނަތަންޔާހޫ) އަމާޒު ކަނޑައެޅީ ޚާމަނާއީ ނައްތާލުމުގެ," އިސްރާއީލުގެ އެން12 ޓީވީ ނިއުސްއަށް ދިން އިންޓަވިއުއެއްގައި ކަޓްޒް ވިދާޅުވިއެވެ. އަދި އެ ވަގުތު ކަނޑައެޅީ މި އަހަރުގެ މެދުތެރެއަށް ކަމަށް ވެސް އޭނާ ވިދާޅުވިއެވެ.
އެންމެ ފަހުން އެ ޕްލޭން އެމެރިކާއާ ހިއްސާކޮށް، ޖެނުއަރީ މަހުގެ ތެރޭގައި އީރާނުން ކުރިއަށް ގެންދިޔަ މުޒާހަރަތަކާ ގުޅިގެން އީރާނުގެ ވެރިކަން ބަދަލުކުރާ ވާހަކަ ދެއްކީ ކަމަށް ކްޓްޒް ވިދާޅުވެފައިވެއެވެ.
އިސްރާއީލުން ބުނެފައިވަނީ އެގައުމުގެ އަމާޒަކީ އީރާނުގެ ނިއުކްލިއާ ޕްރޮގްރާމާއި ބެލިސްޓިކް މިސައިލް ނައްތާލައި، ވެރިކަން ބަދަލުކުރުން ކަމަށެވެ. އީރާނުގެ ވެރިން ވެރިކަން ދޫކޮށްލާނެ ކަމުގެ އެއްވެސް އަލާމާތެއް މިހާތަނަށް ފެނިފައެއް ނުވެއެވެ.
އިސްރާއީލާއި އެމެރިކާ ގުޅިގެން އީރާނަށް ދެމުންގެންދާ ހަމަލާތަކުގެ ރައްދުގައި އީރާނުން އަންނަނީ އިސްރާއީލުގެ އިތުރުން މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާތައް އަމާޒުކުރަމުންނެވެ.
ހަމަލާތަކާހެދި ވައިގެ ދަތުރު ފަތުރުތަކަށް ބުރޫއަރައި ތެލޭއި ގޭހުގެ އަގުވެސް އަންނަނީ އުފުލެމުންނެވެ.