ސްރީލަންކާގެ ކަނޑުގެ ސަރަޙައްދާ ކައިރިން، އީރާނުގެ ކަނޑުގެ ސިފައިންގެ ދެވަނަ މަނަވަރެއްގައި ތާށިވެފައި ތިބި 208 މީހަކު ސަލާމަތްކޮށް ކޮލަމްބޯއަށް ގެންގޮސްފައިވާ ކަމަށް, ސްރީލަންކާގެ ރައީސް އަނޫރަ ކުމާރަ ދިސާނަޔަކަ އިއްޔެ ވިދާޅުވެއްޖެއެވެ.
ލަންކާގެ ރިޔާސީ ގަނޑުވަރުގައި ބޭއްވި ޚާއްޞަ ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އެ ގައުމުގެ ރައީސް ދިސާނަޔަކަ ވިދާޅުވީ، "އައިއާރްއައިއެސް ބުޝެހެރް" ނަމަކަށް ކިޔާ މި މަނަވަރުގައި ތިބި މީހުން އެއްގަމަށް ގެނައުމުގެ އިންތިޒާމުތައް ލަންކާގެ ކަނޑުގެ ސިފައިން ހަމަޖައްސާފައިވާ ކަމަށެވެ. އަދި މި މަނަވަރު ޓްރިންކޮމަލީ ބަނދަރަށް ގެންދިއުމަށް ހަމަޖެހިފައިވާ ކަމަށްވެސް އެމަނިކުފާނު ވިދާޅުވިއެވެ.
މި މައްސަލައާ ގުޅޭގޮތުން ލަންކާގެ ޤާނޫނުހަދާ މަޖިލީހުގައިވެސް ވަނީ ފުޅާ ދާއިރާއެއްގައި މަޝްވަރާކޮށްފައެވެ. ކެބިނެޓް ތަރުޖަމާނު ޑރ. ނަލިންދަ ޖަޔަތިއްސަ މަޖިލީހުގައި ވިދާޅުވީ، އީރާނުގެ ދެވަނަ މަނަވަރު އޮތީ ލަންކާގެ ސަރަޙައްދީ ރޮނގުގެ އެތެރޭގައި ނޫން ކަމަށެވެ. އޭގެ ބަދަލުގައި އެ އުޅަނދު އޮތީ ލަންކާގެ ކަނޑުގެ ސަރަޙައްދާ އިންވެގެން އޮންނަ ޚާއްޞަ އިޤުތިޞާދީ ސަރަޙައްދުގައި ކަމަށް އޭނާ ވިދާޅުވިއެވެ.
ސްރީ ލަންކާގެ ރައީސް...
މީގެ އިތުރުން، އިދިކޮޅު ލީޑަރު ސަޖިތު ޕްރޭމަދާސަ ވަނީ ކޮލަމްބޯ ބަނދަރު ކައިރީގައި އީރާނުގެ އެހެން ބޯޓެއް އޮތް ކަމަށް މަޖިލީހުގައި ވިދާޅުވެފައެވެ.
އެކަމަށް ރައްދުދެއްވަމުން ޑރ. ނަލިންދަ ވިދާޅުވީ، އިދިކޮޅު ލީޑަރަށް އެނގިވަޑައިގަންނަވާ ވަރަށްވުރެ މާ ގިނަ މަޢުލޫމާތު ސަރުކާރަށް ލިބިފައިވާ ކަމަށެވެ.
މި ހާދިސާ ހިނގާފައި މިވަނީ، އިންޑިއާ ކަނޑުގައި އޮތް އީރާނުގެ އެހެން މަނަވަރަކަށް އެމެރިކާގެ ސަބްމެރީނަކުން ޙަމަލާދީ ފައްތާލާފައިވާ ދަނޑިވަޅެއްގައެވެ. "ޑޭނާ" ނަމަކަށް ކިޔާ އެ މަނަވަރުގައި 130 އެއްހާ ނޭވީ ސިފައިން ތިބިއިރު، އޭގެ ތެރެއިން ސަލާމަތްކުރި 32 މީހަކަށް ލަންކާގެ ހޮސްޕިޓަލެއްގައި ފުލުހުންނާއި ކޮމާންޑޯއިންގެ ސަލާމަތީ ރައްކާތެރިކަމާއެކު އަންނަނީ ފަރުވާދެމުންނެވެ.
އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައިސީއާރްސީ) އިން ވެސް އަންނަނީ ކަމާބެހޭ ފަރާތްތަކާ ގުޅިގެން މި ހާދިސާގެ ކަންކަން ގާތުން ބަލަމުންނެވެ.
އެމެރިކާގެ މި ޙަމަލާ ކުށްވެރިކުރައްވައި އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެފައިވަނީ، ބައިނަލްއަޤުވާމީ ކަނޑުގެ ސަރަޙައްދުގައި އިންޒާރަކާ ނުލައި ދިން މި ޙަމަލާއާމެދު އެމެރިކާ ހިތާމަކުރަން ޖެހޭނެ ކަމަށެވެ.
މެދުއިރުމަތީގެ މަސްރަޙާ ގުޅޭގޮތުން ލަންކާގެ ރައީސް ދިސާނަޔަކަ ވިދާޅުވީ، އެމެރިކާއާއި އީރާނާ ދެމެދު ހިނގަމުންދާ ހަމަނުޖެހުންތަކުގައި ލަންކާ އޮންނާނީ ވަކި ފަރާތަކަށް ނުޖެހި ކަމަށެވެ. ނަމަވެސް ބައިނަލްއަޤުވާމީ ގޮތުން އަދާކުރަންޖެހޭ ވާޖިބުތައް އަދާކުރުމުގައާއި، އިންސާނީ އެހީތެރިކަން ފޯރުކޮށްދިނުމުގައި އެ ޤައުމު ދެމިއޮންނާނެ ކަމަށް އެމަނިކުފާނު ވިދާޅުވިއެވެ. އަދި މި ނާޒުކު ދަނޑިވަޅުގެ ބޭނުން ހިފައިގެން ސިޔާސީ މަންފާ ހޯދަން ނޫޅުމަށް ލަންކާގެ ރައީސް ވަނީ ހުރިހާ ފަރާތްތަކަށް ގޮވާލައްވާފައެވެ.