ބަހްރޭންގައި ހުންނަ އިސްރާއީލުގެ އެމްބަސީއަށް އީރާނުން ހަމަލާދީފި

އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމައިގެ ތެރެއިން، ބަހްރޭންގައި ހުންނަ އިސްރާއީލުގެ އެމްބަސީއަށް އީރާނުން ހަމަލާދީފިއެވެ.

ހަމަ އެހެންމެ, ސައުދީ އަރަބިއްޔާއަށް އަމާޒުކޮށް އީރާނުން ފޮނުވާލި މިސައިލްތަކެއް ސައުދީގެ ވައިގެ ދިފާއީ ނިޒާމުން ވަނީ ވައްޓާލާފައެވެ.

މެދުއިރުމަތީގެ މަސްރަހު ވަރަށް ބޮޑަށް ގޯސްވެފައިވާ މި ދަނޑިވަޅުގައި، އީރާނުން ދަނީ ގަލްފުގެ ގައުމުތަކުގައި ހުރި އެމެރިކާއާއި އިސްރާއީލުގެ މަސްލަހަތުތަކަށް އަމާޒުކޮށް ވަރުގަދަ ހަމަލާތަކެއް ދެމުންނެވެ. ރިޕޯޓުތައް ބުނާގޮތުން ބަހްރޭންގެ ވެރިރަށް މަނާމާގައި ހުންނަ އިސްރާއީލުގެ އެމްބަސީއަށް އީރާނުން ވަނީ ޑްރޯން އަދި މިސައިލް ހަމަލާތަކެއް ދީފައެވެ.

މީގެ އިތުރުން ބަހްރޭންގައި ހުންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓުގެ މަރުކަޒަށާއި، ތެޔޮ ސާފުކުރާ ކާރުޚާނާތަކަށްވެސް އީރާނުން ވަނީ ހަމަލާދީފައެވެ.

ސައުދީ އަރަބިއްޔާއަށް އަމާޒުކޮށް ފޮނުވާލި ބެލިސްޓިކް މިސައިލްތަކެއް ސައުދީން ވައްޓާލާފައިވާއިރު، މީގެ ކުރިން އީރާނުން ވަނީ ސައުދީގެ ރިޔާޒުގައި ހުންނަ އެމެރިކާގެ އެމްބަސީއަށްވެސް ޑްރޯން ހަމަލާތަކެއް ދީފައެވެ. މި ހަމަލާތަކުގެ ސަބަބުން އެމްބަސީގައި އަލިފާނުގެ ހާދިސާއެއް ހިނގާފައިވެއެވެ. އަދި ސައުދީގެ ރަސް ތަނޫރާގައި ހުންނަ އަރަމްކޯގެ ތެޔޮ ކާރުޚާނާއަށްވެސް އީރާނުން ވަނީ ޑްރޯން ހަމަލާއެއް ދީފައެވެ.

މި ހަމަލާތަކަކީ މިދިޔަ ހޮނިހިރު ދުވަހު އެމެރިކާއާއި އިސްރާއީލުން ގުޅިގެން އީރާނަށް ދޭން ފެށި ވަރުގަދަ ހަމަލާތަކުގެ ރައްދުގައި އީރާނުން ދެމުންދާ ހަމަލާތަކެކެވެ. ތާރީޚުގައި ފުރަތަމަ ފަހަރަށް އީރާނުން ވަނީ ގަލްފު ކޯޕަރޭޝަން ކައުންސިލް (ޖީސީސީ) ގެ ހުރިހާ ގައުމަކަށް އަމާޒުކޮށް ހަމަލާތައް ފޮނުވާލާފައެވެ. މީގެ ތެރޭގައި ޔޫއޭއީ، ކުވައިތު، ގަތަރު އަދި އޮމާން ހިމެނެއެވެ.

އެންމެ ގިނަ ހަމަލާތައް އަމާޒުވެފައިވަނީ ޔޫއޭއީއަށެވެ. އެގޮތުން އެ ގައުމަށް 1،000 އަށްވުރެ ގިނަ ޑްރޯން އަދި 200 އަށްވުރެ ގިނަ މިސައިލް ފޮނުވާލާފައިވާކަމަށް ރިޕޯޓުތައް ބުނެއެވެ. މި ހަމަލާތަކާ ގުޅިގެން އެމެރިކާއިން ވަނީ ކުވައިތު، ބަހްރޭން އަދި ޔޫއޭއީ ފަދަ ގައުމުތަކުގައި ހުރި އެމެރިކާގެ އެމްބަސީތަކުގެ މަސައްކަތްތައް މެދުކަނޑާލައި، މުވައްޒަފުން އެ ގައުމުތަކުން ބާލަން ފަށާފައެވެ. މީގެ އިތުރުން އެމެރިކާއާއި ގަލްފުގެ ގައުމުތަކުން ގުޅިގެން ނެރުނު ބަޔާނެއްގައި ވަނީ އީރާނުގެ މި އަމަލުތަކަކީ ސަރަހައްދީ ސަލާމަތަށް އޮތް ނުރައްކަލެއް ކަމަށް ބުނެ، އެކަން ކުށްވެރިކޮށްފައެވެ.

އީރާނުގެ މި ހަމަލާތަކާ ގުޅިގެން ގަލްފުގެ ގައުމުތަކުންނާއި އެމެރިކާއިން ކަންބޮޑުވުން ފާޅުކުރަމުންދާއިރު، އެމެރިކާއާއި އިސްރާއީލުން ދަނީ އީރާނުގެ ވެރިރަށް ތެހެރާނަށާއި އެ ގައުމުގެ އަސްކަރީ މަރުކަޒުތަކަށް މެދުކެނޑުމެއްނެތި ބޮމުގެ ހަމަލާތައް ދެމުންނެވެ. އަދި އީރާނުން ވަނީ އިސްރާއީލުގެ ޓެލް އަވީވަށްވެސް ގިނަ އަދަދެއްގެ މިސައިލްތަކެއް ފޮނުވާލާފައެވެ. މި ހަމަލާތަކުގައި އިސްރާއީލުން 11 މީހުން މަރުވެފައިވާކަމަށް ރިޕޯޓުތައް ބުނެއެވެ.

އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައިވަނީ މި ހަމަލާތަކުގެ މައިގަނޑު މަގުސަދަކީ އީރާނުގެ ނިއުކްލިއާ ޕްރޮގްރާމް ހުއްޓުވުމާއި، އެ ގައުމުގެ ވެރިކަން ބަދަލުކުރުން ކަމަށެވެ. މިހާތަނަށް ދިން ހަމަލާތަކުގައި އީރާނުން 800 އަށްވުރެ ގިނަ މީހުން މަރުވެފައިވާއިރު، އީރާނުގެ ކަނޑުގެ ސިފައިންގެ 17 އުޅަނދެއް އެމެރިކާއިން ވަނީ ފައްތާލާފައެވެ. މި ހަނގުރާމައިގެ ސަބަބުން މެދުއިރުމަތީގެ ސަލާމަތީ މަސްރަހު ވަނީ މުޅިން ގޯސްވެ، ކުރިއަށް އޮތް ތަނުގައި ހަނގުރާމަ އިތުރަށް ފުޅާވެދާނެކަމުގެ ބިރު ވަނީ ބޮޑުވެފައެވެ.