މަޝްހޫރު ތެލުގޫ އެކްޓަރު ޕްރަބާސް ޑަބަލް ރޯލް ކުޅެފައިވާ ހޮރޯ-ކޮމެޑީ ފިލްމު "ދަ ރާޖާ ސާބް" ޖިއޯހޮޓްސްޓާގައި ސްޓްރީމްކުރަން ފަށައިފިއެވެ.
މި އަހަރުގެ ޖެނުއަރީ މަހުގެ ނުވަ ވަނަ ދުވަހު ރިލީޒްކުރި ފިލްމު "ދަ ރާޖާ ސާބް"އަކީ މަރޫތީ ލިޔެ، ޕީޕްލް މީޑިއާ ފެކްޓްރީ އަދި އައިވީވައި އެންޓަޓެއިންމަންޓް ބެނާގެ ދަށުން ގެނެސްދިން ފިލްމެކެވެ.
ހެއްވާ މަޖާ ހާދިސާތަކެއް ހިމެނޭ މި ފިލްމުގެ ކާސްޓުންގެތެރޭ ޕްރަބާސްގެ އިތުރުން މަލްވިކާ މޯހަން، ނިދީ އަގަރްވާލް، ސަންޖޭ ދަތު، ރިދީ ކުމާރު، މުރާލީ ޝަރުމާ، އަނޫޕަމް ހޭރް އަދި ޒަރީނާ ވައްހާބުގެ އިތުރުން ޖިއްޝޫ ސެން ގުޕްތާ ވެސް ހިމެނެއެވެ،
ޕްރަބާސްގެ ކުރިއަށް އޮތް ފިލްމު "ސްޕިރިޓް"ގެ ޕޯސްޓަރެއް--ފޮޓޯ/ފިލްމުފެއަ
މުޅިއެކު 450 ކްރޯޑު ރުޕީސްގެ ބަޖެޓަކުން އުފެއްދި "ދަ ރާޖާ ސާބް" ތިއޭޓަރުތަކުން ނެގިއިރު ބޮކްސް އޮފީހުގައި ފިލްމަށް ލިބުނު ޖުމްލަ އާމްދަނީގެ އަދަދަކީ 208.38 ކްރޯޑު ރުޕީސްއެވެ.
ފިލްމަށް ފާޑުކިޔުނު ގިނަ ބަޔަކު ބުނެފައި ވަނީ މިއީ ޕްރަބާސްގެ ފިލްމަކާ އަޅާ ބަލާއިރު ވަރަށް ފެންވަރު ދަށް ސްކްރިޕްޓަކަށް ތައްޔާރުކޮށްފައިވާ ފިލްމެއް ކަމަށެވެ.
ސިނަމާއަށް ފިލްމު ބަލަން ދިޔަ ގިނަ މީހުންނަކީ ޕްރަބާސްގެ ސަޕޯޓަރުން ކަމަށާއި ނަމަވެސް އެ ސަޕޯޓަރުން އުއްމީދުކުރި ކަހަލަ ރޫހެއް ފިލްމުން ދައްކުވައިދެވިފައި ނުވާ ކަމަށް ވެސް ބައެއް ކްރިޓިކުން ވަނީ ބުނެފައެވެ. އެހެންވެ ފިލްމު ރިވިއުކުރި ގިނަބަޔަކު މި ފިލްމަށް ދީފައި ވަނީ އެންމެ ދެ ތަރީގެ ރޭޓިންގްއެކެވެ.
ޕްރަބާސް ދެން އެންމެ އަވަހަށް ބެލުންތެރިންނަށް ފެންނާނީ އަންނަ އަހަރުގެ މާޗް މަހު ރިލީޒްކުރާނެކަން އިއުލާނުކޮށްފައިވާ ޑައިރެކްޓަރު ސަންދީޕް ރެޑީ ވަންގާގެ ފިލްމު "ސްޕިރިޓް"އިންނެވެ.