ޚާމަނާއީގެ ދަރިކަލުން ވެރިކަމަށް ގެނައުމާ ދެކޮޅު ހައްދަވައި، އީރާނަށް ބޭނުންވަނީ ސުލްހަވެރި ލީޑަރެއް ކަމަށް, އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެއްޖެއެވެ.
ޓްރަމްޕު މި ވަނީ އަނެއްކާވެސް ބައިނަލްއަގުވާމީ މަސްރަހުގައި އާދަޔާޚިލާފު ވާހަކަފުޅެއް ދައްކަވައިފިއެވެ. އެމެރިކާ އާއި އިސްރާއީލުން އީރާނަށް ދިން ވަރުގަދަ ހަމަލާތަކެއްގައި އީރާނުގެ އެންމެ މަތީ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އީރާނުގެ ވެރިކަމުގެ ނިޒާމަށް އަންނަން އުޅޭ ބަދަލުތަކުގެ ތެރެއަށް ވަންނަވަން ޓްރަމްޕު ބޭނުންފުޅުވާކަން ވަނީ ހާމަކުރައްވައިފައެވެ.
އެމެރިކާގެ ނޫހެއް ކަމަށްވާ 'އެކްސިއޯސް' އަށް ދެއްވި އިންޓަވިއުއެއްގައި ޓްރަމްޕު ވިދާޅުވީ، އީރާނުގެ އާ ލީޑަރަކު ކަނޑައެޅުމުގެ ކަންކަމުގައި އޭނާގެ ބައިވެރިވުން އޮންނަން ޖެހޭނެ ކަމަށެވެ. މިއީ މިނިވަން މުސްތަގިއްލު ގައުމެއްގެ ސިޔާދަތަށް ފާޅުގައި ގޮންޖެއްސެވުން ކަމަށް މަސްރަހު ދިރާސާކުރާ ފަރާތްތަކުން ސިފަކުރެއެވެ.
އީރާންގެ ރޫޚާނީ ލީޑަރު ހާމަނާއީ: އިސްރާއީލާއި އެމެރިކާއިން ދިން ހަމަލާތަކުގައި ހާމަނާއީ ވަނީ އަވަހާރަކޮށްލައިފައި -- ފޮޓޯ/ އޭޕީ
ވެނެޒުއޭލާގެ ރައީސް ނިކޮލަސް މަޑޫރޯ ހައްޔަރުކޮށް، އެ ގައުމުގެ ވެރިކަމަށް ޑެލްސީ ރޮޑްރިގޭޒް ގެނައުމުގައި އެމެރިކާއިން އަދާކުރި ދައުރާ މިކަން އަޅައިކިޔުއްވަމުން ޓްރަމްޕު ވިދާޅުވީ، އީރާނުގެ މައްސަލައިގައި ވެސް އެމެރިކާގެ ނުފޫޒު އޮންނަން ޖެހޭނެ ކަމަށެވެ.
އީރާނުގެ އާ ލީޑަރަކު ހޮވުމުގެ ބާރު ގާނޫނީ ގޮތުން އޮންނަނީ އެ ގައުމުގެ 88 މެމްބަރުންގެ މައްޗަށް އެކުލެވޭ 'އެސެމްބްލީ އޮފް އެކްސްޕާޓްސް' އަށެވެ.
ނަމަވެސް ޓްރަމްޕު ވަނީ އެ ނިންމުމަށް ނުފޫޒު ފޯރުވުމުގެ ގޮތުން، އަވަހާރަކޮށްލާފައިވާ ލީޑަރު ޚާމަނާއީގެ ދަރިކަލުން މުޖުތަބާ ޚާމަނާއީ ވެރިކަމަށް ގެނައުމާ ދެކޮޅުކަން ފާޅުކުރައްވައިފައެވެ.
ޓްރަމްޕު ސިފަކުރެއްވި ގޮތުގައި މުޖުތަބާ އަކީ އެ މަގާމަށް އެކަށީގެންވާ ބޭފުޅެއް ނޫނެވެ. އަދި އޭނާ އަކީ އެމެރިކާއަށް ގަބޫލުކުރެވޭނެ ބޭފުޅެއް ނޫން ކަމަށްވެސް ވިދާޅުވިއެވެ. އޭނާ ވިދާޅުވީ އެމެރިކާއިން ބޭނުންވަނީ އީރާނަށް ސުލްހަވެރިކަމާއި އެއްބައިވަންތަކަން ގެނެސްދޭނެ ލީޑަރެއް ކަމަށެވެ. އަދި އެމެރިކާއިން ރުހޭ ފަދަ ލީޑަރަކު އީރާނުގެ ވެރިކަމަށް ނުގެނެސްފި ނަމަ، ކުރިއަށް އޮތް ފަސް އަހަރުގެ ތެރޭގައި އަނެއްކާވެސް ހަނގުރާމައަކަށް ދާން ޖެހިދާނެ ކަމުގެ އިންޒާރު އޭނާ ދެއްވިއެވެ.
ބައިނަލްއަގުވާމީ ގާނޫނުތަކާއި ހަމަތަކަށް ބަލާއިރު، އެހެން ގައުމެއްގެ އެތެރޭގެ ވެރިކަން ބަދަލުވުމުގެ މަރުހަލާއަށް މިފަދަ ގޮތަކަށް ނުފޫޒު ފޯރުވުމަކީ ގައުމުތަކުގެ ސިޔާދަތީ ބާރަށް އަރައިގަތުމެވެ. އީރާނުގެ އެތެރޭގެ ކަންކަމާ ބެހުމުގެ ހައްގު އެމެރިކާއަށް ނޯންނާނެ ކަމަށް ގިނަ ބަޔަކު ގަބޫލުކުރާއިރު، ޓްރަމްޕުގެ މި ހަރުކަށި ނިންމެވުންތަކުގެ ސަބަބުން މެދުއިރުމަތީގެ މަސްރަހު އިތުރަށް ހޫނުވެގެންދާނެ ކަމަށް ބެލެވެއެވެ. އީރާނުގެ ރައްޔިތުންނާއި އެ ގައުމުގެ މުއައްސަސާތަކުން މިފަދަ ބޭރުގެ ނުފޫޒުތަކާ ދެކޮޅަށް ތެދުވުމަކީ ތާރީޚު ހެކިދޭ ގޮތުގައި އެކަށީގެންވާ ކަމެކެވެ.