އިސްރާއީލާއި އީރާނާ ދެމެދު ހިނގަމުންދާ ނުތަނަވަސްކަމުގެ ސަބަބުން ދުބާއީގައި ތާށިވެފައިވާ ދަތުރުވެރިންނަށް އިންޑިއާގެ އެކްޓަރު ސޯނޫ ސޫދު އެހީތެރިކަން ފޯރުކޮށްދީފިއެވެ.
އިންސާނިއްޔަތަށްޓަކައި ގިނަގުނަ މަސައްކަތްތަކެއް ކުރަމުން އަންނަ ބޮލީވުޑްގެ މަޝްހޫރު އެކްޓަރު ސޯނޫ ސޫދު އަނެއްކާވެސް މިވަނީ އެހީތެރިކަމަށް ބޭނުންވެފައިވާ ފަރާތްތަކަށް އެހީގެ އަތެއް ދިއްކޮށްލާފައެވެ.
އިސްރާއީލާއި އީރާނާ ދެމެދު އުފެދިފައިވާ ހަމަނުޖެހުންތަކާ ގުޅިގެން ދުބާއީގައި ތާށިވެފައިވާ ދަތުރުވެރިންނަށް އެހީވުމަށް އޭނާ ވަނީ ސޯޝަލް މީޑިއާ މެދުވެރިކޮށް އިޢުލާނުކޮށްފައެވެ.
އެކްސްގައި އާންމުކުރި ވީޑިއޯ މެސެޖެއްގައި ސޯނޫ ބުނީ، މި ހާލަތުގެ ސަބަބުން އެނބުރި ޤައުމަށް ނުދެވި، ދުބާއީގައި މަޑުކުރަންޖެހިފައިވާ ފަރާތްތަކަށް ރައްކާތެރި ތަނެއްގައި ހިލޭ ތިބެވޭނެ އިންތިޒާމު ހަމަޖައްސައިދޭނެ ކަމަށެވެ.
އޭނާ ލިޔެފައިވާ ގޮތުގައި، ހަނގުރާމައިގެ ސަބަބުން ގިނަ ދަތުރުވެރިންތަކެއް ވަނީ ދުބާއީގައި ތާށިވެފައެވެ. އަދި ހުންނާނެ ތަނެއް ނެތް ނަމަ، އެއްވެސް ޤައުމަކަށް ނުވަތަ ނަސްލަކަށް ބެލުމެއްނެތި، ހަމައެކަނި އިންސާނިއްޔަތަށްޓަކައި ހިލޭ ހުރުން ހަމަޖައްސައިދޭނެ ކަމަށާއި، އެހީއަށް ބޭނުންވާ ފަރާތްތަކުން އިންސްޓަގްރާމް މެދުވެރިކޮށް އޭނާއާ ގުޅުމަށް ވަނީ އެދިފައެވެ.
ފިލްމީ ތަރި ސޯނޫ އެހީތެރިކަން ބޭނުންވެފައިވާ ބަޔަކަށް އެހީ ފޯރުކޮށްދެނީ--ފޮޓޯ/އިންޑިއަންއެކްސްޕްރެސް
އެހީތެރިކަން ބޭނުންވެފައިވާ ގިނަ ބަޔަކަށް އެހީވުމަށް ސޯނޫ އަމިއްލައަށް އިސްނަގައިގެން މަސައްކަތް ފެށުމާ އެކު ގިނަ ބަޔަކު ވަނީ ސޯޝަލް މީޑިއާގައި ވެސް އެކްޓަރަށް ވަރަށް ބޮޑަށް ތައުރީފުކޮށްފައެވެ.
ސޯނޫ އަކީ އަބަދުވެސް އެހީއަށް ބޭނުންވާ މީހުންނަށް އެހީތެރިކަން ފޯރުކޮށްދިނުމުގައި އެހެން މީހުންނަށް ނަމޫނާ ދައްކަމުން އަންނަ ފިލްމީ ތަރިއެއް ކަމަށް ގިނަ ބަޔަކު ވަނީ ސިފަކޮށްފައެވެ. އެގޮތުން ފާއިތުވި އަހަރުތަކުގައި ކުރިމަތިވި އެކި ކާރިސާތަކުގައި ސޯނޫ ވަނީ އިސް ސަފަށް ނިކުމެ، އެހީތެރިކަމަށް ބޭނުންވި އެތައް ބަޔަކަށް އެހީތެރިކަން ފޯރުކޮށްދީފައެވެ.
ޚާއްޞަކޮށް ކޮވިޑް-19 ގެ ބަލިމަޑުކަމުގެ ތެރޭގައި، އިންޑިއާގެ އެކި ސަރަހައްދުތަކުގައި ތާށިވި އެތައް ހާސް ބަޔަކު އެނބުރި އާއިލާތަކުގެ ގާތަށް ފޮނުވައިދިނުމަށް ދަތުރުފަތުރުގެ އިންތިޒާމުތައް ހަމަޖައްސައިދިނުމުގައި ވެސް އޭނާ ވަނީ ނަމޫނާ ދައްކާފައެވެ.
މިފަހަކަށް އައިސް ވަރަށް މަދުން ފިލްމުތަކުން ފެންނަ ސޯނޫ އެންމެ ފަހުން ބެލުންތެރިންނަށް ގެނެސްދިނީ "ފަތޭހް"ގެ ނަމުގައި އުފެއްދި ފިލްމެކެވެ. މިއީ ސޯނޫ ފިލްމު ޑައިރެކްޝަނަށް ވެސް ނުކުތް ފިލްމެކެވެ.