އިސްރާއީލާއި އީރާނުގެ ކުރިމަތިލުންތަކުގެ ސަބަބުން ދުބާއީގައި ހޭދަކުރި ހާސްކަންބޮޑު ދުވަސްތަކުގައި ޔޫ.އޭ.އީ ސަރުކާރުން ފޯރުކޮށްދިން އެހީތެރި ކަމާއި ރައްކާތެރިކަމަށް ބޮލީވުޑްގެ ބަތަލާ ލާރާ ދައްތާ ޝުކުރު އަދާކޮށްފިއެވެ.
އިންޑިއާގެ މަޝްހޫރު ފިލްމީ ތަރި ލާރާ ދައްތާ ހާމަކުރި ގޮތުގައި، ފިރިމީހާ މަހޭޝް ބޫޕަތީ މަސައްކަތުގެ ކަންކަމުގައި ދުބާއީން ބޭރުގައި އުޅެމުންދާތީ، އޭނާ މިވަގުތު ދުބާއީގައި ހުރީ އަންހެން ދަރިފުޅާ އެކުގައެވެ.
ކުރީގެ މިސް ޔުނިވާސް ލާރާ ދާދި ފަހުން ސޯޝަލް މީޑިއާގައި ހިއްސާކުރި ވީޑިއޯއެއްގައި، އިސްރާއީލާއި އީރާނުގެ މެދުގައި ހިނގަމުންދާ ހަމަނުޖެހުންތަކާ ގުޅިގެން ދުބާއީގެ މަސްރަހު އޮތް ގޮތް ވަނީ ސަޕޯޓަރުންނަށް ތަފްސީލުކޮށްދީފައެވެ.
މި ވީޑިއޯގައި ބަތަލާ ވަނީ ގޮވުންތަކުގެ އަޑުތައް އިވުމާއި، މިސައިލްތައް ވައިގެ ތެރޭގައި ހަލާކުކޮށްލާ މަންޒަރު ފެނުނުކަމަށް ބުނެފައެވެ. އަދި މިފަދަ ނުރައްކާތެރި ދަނޑިވަޅެއްގައި އެ ގައުމުގައި ދިރިއުޅޭ މީހުންނަށް ރައްކާތެރިކަން ކަށަވަރުކޮށްދިނުމަށް ދުބާއީގެ ސަރުކާރުން ކުރަމުންދާ މަސައްކަތްތަކަށް ލާރާ ވަނީ ވަރަށް ބޮޑަށް ތައުރީފުކޮށްފައެވެ.
އެނބުރި އިންޑިއާއަށް ނާދެވި ދުބާއީގައި މަޑުކުރަން ޖެހުނު ފިލްމީ ތަރިންގެތެރޭ ހިމެނޭ ސޯނަލް ޗޯހަން އަދި އީޝާ ގުޕްތާ. މި ދެ ތަރިން މިހާރު ވަނީ ރައްކާތެރިކަމާ އެކު އެނބުރި އަމިއްލަ ޤައުމަށް ދެވުނުކަން ހާމަކޮށްފައި--ފޮޓޯ/އިންޑިއަންއެކްސްޕްރެސް
ލާރާ ބުނި ގޮތުގައި އޭނާ ދުބާއީގައި ހުންނަތާ މިހާރު ދުވަސްތަކެއް ވެއްޖެއެވެ. އަދި ފާއިތުވި ތިން އަހަރެއްހާ ދުވަހުގެ ތެރޭގައި އޭނާ ގިނަ ވަގުތު ހޭދަކުރީ އެ ސިޓީގައެވެ.
"އިސްރާއީލާއި އީރާނުގެ މި ހަނގުރާމަ ފެށުނީއްސުރެ އަހަރެމެން މިތިބީ ދުބާއީގައި. ވޭތުވެދިޔަ ތިން އަހަރު ދުބާއީއަކީ އަހަރެންގެ ގެ ފަދަ ތަނެއް. މިދިޔަ މަހުގެ 28 ވަނަ ދުވަހުވެސް އަހަރެން ހުރީ ދުބާއީގެ ސްޓޫޑިއޯއެއްގައި ޝޫޓިންއެއްގައި،" ލާރާ ބުންޏެވެ.
މަސްރަހު ގޯސްވި ވަގުތު ކަންހިނގި ގޮތް ކިޔައިދެމުން ލާރާ ބުނީ، މަސައްކަތުގައި އުޅެނިކޮށް ބޯމަތިން ބާރުގަދަ ގޮވުންތަކެއްގެ އަޑު އިވުނު ކަމަށެވެ.
"އަޑު އިވުމާއެކު ސްޓޫޑިއޯއިން ބޭރަށް ނުކުތްއިރު، މިސައިލްތައް ވައިގެ ތެރޭގައި ގޮއްވާލާ މަންޒަރު ފެނުނު. އެއީ ވަރަށް ބޮޑު ހާސްކަމެއް ލިބުނު ދުވަސްތަކެއް. ދަރިފުޅު އަހަރެންގެ ކައިރީގައި ހުރިއިރު، ފިރިމީހާ މަހޭޝް އެ ވަގުތު ދުބާއީގައި ނެތް," އޭނާ ބުންޏެވެ.
ސިޓީގެ ބޯމަތިން ހަނގުރާމަމަތީ ބޯޓުތައް އުދުހުމާއި، ބާރުގަދަ އަޑުތަކުގެ ސަބަބުން ނުތަނަވަސްކަން އިހުސާސްވި ނަމަވެސް، އެއްވެސް އިރެއްގައި ނާމާންކަމެއް ނުވަތަ ބިރުވެރިކަމެއް އިހުސާސް ނުވާކަމަށް ބަތަލާ ވަނީ ބުނެފައެވެ.
ނަމަވެސް، މި ހާލަތަކީ ކުޑަކުދިންނަށް އެކަމުގެ ސަބަބުން ނަފުސާނީ ގޮތުން ވަރަށް ފުން އަސަރުތަކެއް ކޮށްފައިވާ ދަނޑިވަޅަކަށް ވާތޯ، ވީހާވެސް އަވަހަކަށް މުމްބާއީއަށް އެނބުރި ދިއުމުގެ މަސައްކަތް ކުރަމުންދާ ކަމަށް ލާރާ ވަނީ ބުނެފައެވެ.
ލާރާގެ އުއްމީދަކީ މެދުއިރުމަތީގައި އުފެދިފައިވާ ހަމަނުޖެހުންތަކަށް އަވަސް ހައްލެއް ލިބި ވީހާވެސް އަވަހަކަށް އެ މައްސަލަތަކަށް ނިމުމެއް އައުން ކަމަށް ވަނީ ބުނެފައެވެ. އަދި އެއްވެސް ގައުމެއްގެ އާންމު ރައްޔިތުންނަކީ ބިރުވެރިކަމެއްގެ ތެރޭގައި ދިރިއުޅެންޖެހޭނެ ބައެއް ނޫންކަން އޭނާ ފާހަގަކުރިއެވެ.
މިހާރު ހިނގަމުންދާ އީރާން-އިޒްރޭލު އަދި އެމެރިކާގެ ހަނގުރާމައާ ގުޅިގެން ޔޫއޭއީގެ ވައިގެ ސަރަހައްދު ބަންދުކޮށް ގިނަ ފްލައިޓްތަކެއް ކެންސަލްވުމާ ގުޅިގެން އިންޑިއާގެ ވަރަށް ގިނަ ބަޔަކު ވަނީ އެ ޤައުމުގައި ތާށިވެފައެވެ. އޭގެތެރޭގައި އާއްމު ރައްޔިތުންގެ އިތުރުން ވަރަށް ގިނަ ފިލްމީ ތަރިންވެސް ހިމެނެއެވެ.
ނަމަވެސް މަދު ފްލައިޓްތަކެއް އޮޕަރޭޓްކުރަން ފެށުމާ ގުޅިގެން އިންޑިއާގެ ފިލްމީ ތަރިން ހިމެނޭހެން ގިނަ ބަޔަކު ވަނީ އެނބުރި އަމިއްލަ ޤައުމަށް ގޮސްފައެވެ.
ހަމައެއާއެކު އިންޑިއާގެ ސަރުކާރުންވެސް ވަނީ "ރިލީފް ފްލައިޓް"ތަކުގެ އެހީގައި އެނބުރި އިންޑިއާއަށް ނުދެވި ތިބި ގިނަ ބަޔަކު އަނބުރާ އެ ޤައުމަށް ގެންދިއުމުގެ މަސައްކަތް ފަށާފައެވެ.