އަންނަ އަހަރު އައިޓީބީ ފެއާ ހޯސްޓް ކުރާ ޤައުމަކަށް ދިވެހިރާއްޖެ ހަމަޖައްސައިފިއެވެ.
ދުނިޔޭގެ އެންމެ ބޮޑު ފަތުރުވެރިކަމުގެ މައުރަޒު، އައިޓީބީ ބާލިން ފެއާގެ ހޯސްޓް ގައުމަކަށް ރާއްޖެ ހަމަޖެހިފައި ވަނީ ގިނަ ގައުމުތަކަކާ ވާދަކޮށްގެންނެވެ.
މެސޭ ބާލިންގެ ހޯލް 5.2 ގައި ހުންނަ ރާއްޖޭގެ ސްޓޭންޑުގައި ބޭއްވި ރަސްމިއްޔާތެއްގައި، މި އެއްބަސްވުމުގައި ސޮއިކުރެއްވީ ވިޒިޓް މޯލްޑިވްސް (އެމްއެމްޕީއާރުސީ)ގެ ސީއީއޯ އަދި މެނޭޖިން ޑައިރެކްޓަރު އިބްރާހީމް ޝިއުރީ އާއި މެސޭ ބާލިންގެ ސީއީއޯ ޑރ. މާރިއޯ ޓޯބިއަސްއެވެ.
ވިޒިޓް މޯލްޑިވްސް އިން ބުނީ މިއީ ބައިނަލްއަގުވާމީ ފަތުރުވެރިކަމުގެ ސިނާއަތުގައި އިންޑިއާ ކަނޑުގެ ޖަޒީރާ ގައުމުގެ ގުދުރަތީ ރީތިކަމާއި، ސަގާފީ ތަފާތުކަމުގެ އިތުރުން ދިވެހިންގެ މެހެމާންދާރީ މުޅި ދުނިޔެއަށް ދައްކާލުމަށް ލިބިގެންދާ ރަނގަޅު ފުރުސަތެއްކަމަށެވެ.
މިކަމާ ގުޅޭގޮތުން މެސޭ ބާލިންގެ ސީއީއޯ ޑރ. މާރިއޯ ޓޯބިއަސް ވިދާޅުވީ، ފުރަތަމަ ފަހަރަށް މި މައުރަޒު ހޯސްޓް ކުރީ މީގެ ދިހަ އަހަރު ކުރިން ކަމަށާއި، އަނެއްކާވެސް 2027 ވަނަ އަހަރު ރާއްޖެއަށް މި ފުރުސަތު ލިބިގެންދިއުމަކީ ވަރަށް ބޮޑު އުފަލެއް ކަމަށެވެ. އަދި މިއީ ދެފަރާތުގެ މެދުގައި އޮތް ގާތް ގުޅުން ހާމަކޮށްދޭ ކަމެއް ކަމަށާއި، ބައިނަލްއަގުވާމީ ފަތުރުވެރިކަމުގެ މައިދާނުގައި ރާއްޖޭގެ ދައުރު ފުޅާވަމުންދާކަން ހާމަވާކަމަށް އޭނާ ފާހަގަކުރެއްވިއެވެ.
މީގެ އިތުރުން، 2027 ވަނަ އަހަރުގެ މައުރަޒުގައި ރާއްޖޭގެ ހިތްގައިމު ރީތިކަމާއި ތަފާތު ތަޖުރިބާތަކުގެ އިތުރުން، ދެމެހެއްޓެނިވި ގޮތެއްގައި ފަތުރުވެރިކަން ކުރިއަށް ގެންދެވިދާނެ ގޮތްތައް މުޅި ދުނިޔެއަށް ދައްކާލެވޭނެ ކަމަށް އުއްމީދުކުރައްވާކަމަށް ވެސް ޑރ. މާރިއޯ ވިދާޅުވިއެވެ.
ހާހަކަށްވުރެ ގިނަ ރަށްތަކާއި، ނޫވިލުތަކާއި، ހުދުދޮންވެލި ގޮނޑުދޮށްތަކުގެ އިތުރުން މުއްސަނދި ފަރުތަކަކުން ޒީނަތްތެރިވެފައިވާ ދިވެހިރާއްޖެއަކީ، ދުނިޔޭގެ ފަތުރުވެރިކަމުގެ އެންމެ މަގުބޫލު އެއް މަންޒިލެވެ. ރާއްޖެ ފާހަގަކުރެވިފައިވަނީ އެކަހެރި އަދި މަތީ ފަންތީގެ ރިސޯޓުތައް ތަޖުރިބާކޮށްލުމަށާއި، ރަށްރަށުގެ އަމިއްލަވަންތަ ފަތުރުވެރިކަމުގެ އިތުރުން، ދިވެހިންގެ ހިތްހެޔޮ މެހުމާންދާރީގެ ނަމޫނާ ގައުމެއްގެ ގޮތުގައެވެ.
"ދުނިޔޭގެ އެކި ކަންކޮޅުތަކުން ދަތުރުކުރާ ފަރާތްތަކަށް ރާއްޖޭގެ ރަށްތަކުން ލިބެން ހުރި ތަފާތު އަދި ތަޖުރިބާތައް ދައްކާލުމަށް އައިޓީބީ ބާލިން އަކީ އެންމެ އެކަށީގެންވާ މައިދާނެއް. ބާލިންގައި ބައިނަލްއަޤްވާމީ ފަތުރުވެރިކަމުގެ ސިނާއަތަށް މަރުޙަބާ ކިޔައި، ރާއްޖެއަކީ މަޤްބޫލު މަންޒިލެއްގެ ގޮތުގައި ފާހަގަކޮށްދޭ ތަފާތު ސިފަތަކާއި، ޚިދުމަތުގެ ފެންވަރާއި، ދިވެހިންގެ މެހެމާންދާރީ ދައްކާލުމަށް އަޅުގަނޑުމެން މިތިބީ ވަރަށް ބޮޑަށް އުންމީދުކޮށްގެން"ވިޒިޓް މޯލްޑިވްސްގެ ސީއީއޯ އަދި މެނޭޖިން ޑައިރެކްޓާ އިބްރާހީމް ޝިއުރީ ވިދާޅުވިއެވެ.
އައިޓީބީ ބާލިން 2027 ގެ 'ހޯސްޓް ކަންޓްރީ' ގެ ހައިސިއްޔަތުން، ދިވެހިރާއްޖޭގެ ފަތުރުވެރިކަމުގެ އެންމެހާ ދާއިރާތައް ދުނިޔެއަށް ދައްކާލާނެއެވެ. މީގެ ތެރޭގައި ލަގްޒަރީ ރިސޯޓުތަކާއި، ބުޓީކް ހޮޓާތަކުގެ އިތުރުން، ޑައިވިންގ، މޫދު ކުޅިވަރު، ދުޅަހެޔޮކަމާއި ގުޅޭ ޚިދުމަތްތައް އަދި ރާއްޖޭގެ މުއްސަނދި ސަގާފީ ކަންކަން ހިމެނެއެވެ.
އެންމެ ފުރަތަމަ އައިޓީބީ ފެއާ ރާއްޖޭގައި ބާއްވާފައިވަނީ 2016 ވަނަ އަހަރެވެ.