ރާއްޖޭގެ ފަތުރުވެރިކަމުގައި އިސް ދައުރެއް އަދާކުރާ ޔުނިވާސަލް އެންޓަޕްރައިޒަސްގެ ފައުންޑޭޝަނުން މި އަހަރު ދިނުމަށް ހަމަޖެހިފައިވާ ތިން ސްކޮލާޝިޕެއް އިއުލާންކޮށްފިއެވެ.
ޔުނިވާސަލް ފައުންޑޭޝަނުން އަންނަނީ، ދިވެހީންނަށް މަތީ ތައުލީމު ހާސިލުކުރުމުގެ ފުރުސަތު ދިނުމަށް ކޮންމެ އަހަރަކު ވެސް ސްކޮލާޝިޕްތައް ދެމުންނެވެ.
އޭގެ ތެރެއިން އެއް ސްކޮލާޝިޕަކީ، ރާއްޖޭގެ އެންމެ ފުރަތަމަ ހޭނައްތާ ޑޮކްޓަރު، ޑރ. އިބްރާހިމް އުމަރު މަނިކުގެ ހަނދާނުގައި ތައާރަފުކޮށްފައިވާ ސްކޮލާޝިޕެކެވެ. އޭނާ އަވަހާރަވީ 2020ގައެވެ.
ޔުނިވާސަލް ފައުންޑޭޝަނުން ވަނީ ކޮންމެ ތިން އަހަރަކުން އެއް ފަހަރު އެ ސްކޮލާޝިޕް ދޭން ނިންމައިފައެވެ. އެގޮތުން މި އަހަރު އެ ފުރުސަތު ދޭން ނިންމައިފައިވާއިރު، ސްކޮލާޝިޕް ލިބޭ ދަރިވަރަކަށް، ލަންކާ، އިންޑިއާ، ނޭޕާލް، ބަންގްލަދޭޝް، މެލޭޝިއާ، ފިލިޕީންސް ނުވަތަ ތައިލޭންޑުގައި އިންޓާނަލް މެޑިސިންގެ ދާއިރާއަކުން ތައުލީމު ހާސިލުކުރެވޭނެއެވެ.
ބާކީ ދެ ސްކޮލާޝިޕްގެ ދަށުން ވެސް އެ ގައުމުތަކުގައި ކިޔެވުމަށް ފުރުސަތު ލިބޭއިރު، އެ މީހަކު ބޭނުންވާ ދާއިރާއަކުން ސްޕެޝަލައިޒް ވުމަށް ހުށަހެޅޭނެއެވެ.
އެ ތިން ސްކޮލާޝިޕަށް ވެސް ކުރިމަތިލެވޭނީ އަންނަ މެއި މަހުގެ 15 ވަނަ ދުވަހުގެ ނިޔަލަށެވެ.
އެ ސްކޮލާޝިޕަށް ކުރިމަތިލާ މީހުންގެ ހުންނަން ޖެހޭ ޝަރުތުތަކުގެ ތެރޭގައި:
- ދިވެއްސަކަަށްވުން
- ރާއްޖޭގައި ދިވެހި ޑޮކްޓަރުން މަދު ދާއިރާތަކުން ކިޔަވަން ޚިޔާރުކުރުން
- އެޕްލިކޭޝަން ހުށަހަޅާއިރު، ކޯސް ފަށައިފައިނުވުން
- ވަޒީފާއިން މުސާރަ ލިބޭ ގޮތަށް ޗުއްޓީގައި ހުރި މީހަކަށް ނުވުން އަދި އެހެން ސްކޮލާޝިޕެއްގައި ކިޔަވަމުން ނުދިޔުން
- ޔުނިވާސިޓީން ޖާގަ ލިބިފައިވާ ކަމުގެ ލިޔުން ލިބިފައިވުން
- އެމްބީބީއެސް ޑިގްރީއަށް ފަހު، ރާއްޖޭގެ ހޮސްޕިޓަލެއްގައި މަދުވެގެން ދެ އަހަރަށް ޚިދުމަތް ކޮށްފައިވުން
އެ ސްކޮލާޝިޕްތަކުގެ ދަށުން ދަރިވަރުންނަށް ކޯސް ފީއާއި ސްޓޫޑެންޓް އިންޝޫރެންސްއާއި ކޮންމެ އަހަރަކު ވެސް ދަތުރުކުރެވޭނެ ޓިކެޓާއި، ކޮންމެ މަހަކަށް ސްޓައިޕެންޑް ލިބޭނެއެވެ. އަދި ދަރިވަރުންގެ ވިސާއާ ގުޅުންހުރި ޚަރަދުތައް ވެސް ހަމަޖައްސައިދޭނެއެވެ.
ޔުނިވާސަލް ފައުންޑޭޝަނުން މިހާތަނަށް ރާއްޖޭން ބޭރުން 100އަށްވުރެ ގިނަ ސްކޮލާޝިޕްގެ ފުރުސަތު ދީފައިވެއެވެ. އޭގެ ތެރޭގައި ސިއްހީ ދާއިރާއާއި ފަތުރުވެރިކަމުގެ އިތުރުން ތައުލީމާއި ވިޔަފާރިއާއި އިންޖިނިއަރިންއާއި އައިޓީއާއި އެހެން ދާއިރާތައް ވެސް ހިމެނެއެވެ.