ސަރުކާރުން މަސައްކަތް ކުރަނީ، މި އަހަރުގެ ތެރޭގައި އިންޓްރެކްޓިވް މިއުޒިއަމްގެ މަސައްކަތް ނިންމާލުމަށް ކަމަށް ހެރިޓޭޖް މިނިސްޓަރު އާދަމް ނަސީރު އުމަރު މިއަދު ވިދާޅުވެއްޖެއެވެ.
މާލޭގައި ހަދާ އިންޓަރެކްޓިވް މިއުޒިއަމަކީ، އުސްގެކޮޅާއި، ކަޅުވަކަރު މިސްކިތް ހުރި ސަރަހައްދުގައި، ޒަމާނީ ވަސީލަތްތަކުގެ އެހީގައި ދިވެހި ތާރީޚާއި ތަރިކަ ތަޖުރިބާކުރެވޭނެހެން ތަރައްގީކުރާ ދާރުލްއާސާރެކެވެ.
ރައީސް އޮފީހުގައި މިއަދު ބޭއްވި ނޫސްވެރީންގެ ބައްދަލުވުމުގައި މިނިސްޓަރު އާދަމް ނަސީރު ވަނީ، އެ ދާރުލްއާސާރު ތަރައްގީކޮށް ނިމުމުން ތަރިކައިގެ ދާއިރާއިން ރާއްޖެއަށް އާމްދަނީ ލިބޭނެ ކަމަށެވެ.
އޭނާ ވިދާޅުވީ އެ ތަނުގެ މަސައްކަތް ނިމޭއިރު، ފަންނީ ދާރުލްއާސާރާ މުޅިން ތަފާތު އިންގިލާބީ ބަދަލެއް އައު ދާރުލްއާސާރުގެ ތެރެއިން ފެންނާނެ ކަމަށެވެ. އަދި އިންޓެރެކްޓިވް މިއުޒިއަމްގެ މަސައްކަތް ހަލުވިކޮށް، މި އަހަރުގެ ތެރޭގައި ނިންމައި އާންމުންނަށް ހުޅުވާލުމަށް މަސައްކަތް ކުރަމުންދާ ކަމަށްވެސް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވީ މިހާރު ހުރި ދާރުލްއާސަރަކީ އެ ތަން ހުޅުވިއިރު، އެ ޒަމާނަށް ފެތޭގޮތަށް ވަރަށް ރަނގަޅަށް ހަދާފައިވާ ތަނެއްކަމަށެވެ. ނަމަވެސް މިހާރު ދުނިޔޭގެ ދާރުލްއާސާރުތައް ތަރައްގީ ކުރަމުންދާ ގޮތާއި އަންނަމުންދާ ބަދަލުތަކަށް ބަލާއިރު ދާރުލްއާސާރު ތަރައްގީކުރުމަށް ވަރަށް ބޮޑެތި މަސައްކަތްކެއް ކުރަން ޖެހޭކަން އާދަމް ނަސީރު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ޚާއްސަ އިރުޝާދުގެ ދަށުން މި އަހަރުގެ ތެރޭގައި މިހާރު މިހިރަ ދާރުލްއާސާރުގެ އެތެރެއަށް މި ދަންނަވާ ބަދަލުތައް ގެނައުމުގެ މަސައްކަތްތަކެއް މި އަހަރުގެ ތެރޭގައި އަޅުގަނޑުމެން ކުރާނަން. އެކަން ރޭވިފައި އެބައޮތް. ހެރިޓޭޖް މިނިސްޓަރު އާދަމް ނަސީރު އިބްރާހީމް
ޒަމާނީ ޓެކްނޮލޮޖީގެ އެހީގައި ތަރިކަ ތަޖުރިބާ ކުރެވޭ ގޮތަށް، އުސްގެކޮޅު ހެދުމުގެ މަސައްކަތް ހެރިޓޭޖް މިނިސްޓްރީން ފަށާފައިވަނީ ޖަނަވަރީމަހުގެ ތެރޭގައެވެ.
މިނިސްޓަރު އާދަމް ނަސީރު އޭރުވެސް ވަނީ މި މިއުޒިއަމް ތަރައްގީކޮށް ނިމޭއިރު، ތަރިކައިގެ ދާއިރާއަކީ އާމްދަނީއެއް ލިބޭ ދާއިރާއަކަށް ވާނެ ކަމަށް ވިދާޅުވެފައެވެ. އަދި ދިވެހީންގެ ތަރިކަ ހިމާޔަތް ކުރުމަކީ ރައީސް ޑރ. މުޙައްމަދު މުއިއްޒު ޚާއްސަ އިސްކަމެއް ދެއްވާ ކަމެއް ކަން މިނިސްޓަރު ވަނީ ފާހަގަކުރައްވައިފައެވެ.