އޫކްލާ ސްޕީޑް ޓެސްޓްގެ ފަރާތުން ދޭ 'ފާސްޓެސްޓް 5ޖީ ނެޓްވޯކް'، 'ބެސްޓް 5ޖީ ނެޓްވޯކް' އަދި 'ބެސްޓް 5ޖީ ގޭމިން އެކްސްޕީރިއަންސް' އެވޯޑު Q1-Q2 2025 ދިރާގަށް ލިބިއްޖެއެވެ.
އެ އެވޯޑުތައް ދިރާގާ ހަވާލުކޮށްފައިވަނީ ސްޕެއިންގެ ބާސެލޯނާގައި ބޭއްވި، ޓެލެކޮމިއުނިކޭޝަންސް ދާއިރާގެެ ދުނިޔޭގެ އެންމެ ބޮޑު ހަރަކާތް ކަމަށްވާ މޮބައިލް ވޯލްޑް ކޮންގްރެސްގައެވެ.
ދިރާގުން ބުނީ، އެ ކާމިޔާބީން ދައްކުވައިދެނީ ދިރާގުގެ ޚިދުމަތްތައް ދުނިޔޭގެ ފެންވަރުގައި ފޯރުކޮށްދިނުމަށާއި ޑިޖިޓަލް ރާއްޖެ ބިނާކުރުމަށް އެ ކުންފުނިން ކުރަމުންދާ މަސައްކަތްތަކުގެ ނަތީޖާ ކަމަށެވެ. އެގޮތުން، 2019 ވަނަ އަހަރު، ދިރާގަކީ ސައުތު އޭޝިއާ އަދި، ރާއްޖޭގައި 5ޖީ ޚިދުމަތް ތައާރަފުކުރި ފުރަތަމަ ސާވިސް ޕްރޮވައިޑަރުކަން އެ ކުންފުނިން ފާހަގަކުރިއެވެ.
މިހާރު ދިރާގުން ވަނީ ރާއްޖޭގެ އާބާދީގެ 73 ޕަސެންޓަށް ދިރާގުގެ ހަލުވި 5ޖީ ނެޓްވޯކް ފޯރުކޮށްދީފައެވެ.
ދިރާގުން ވަނީ އޫކްލާއިން ދޭ 'މޯލްޑިވްސް ފާސްޓަސްޓް މޯބައިލް ނެޓްވޯކް' ވިދިވިދިގެން ތިން އަހަރު ހޯދައި، 'ފާސްޓަސްޓް 5ޖީ ނެޓްވޯކް' ދެ އަހަރު ހޯދައި، ރާއްޖޭގެ އެންމެ ހަލުވި ނެޓްވޯކްގެ ގޮތުގައިވެފައި ކަމަށް އެ ކުންފުނިން ބުންޏެވެ.
މުވާސަލާތީ ޚިދުމަތްތަކާއި ޑިޖިޓަލް ސޮލިއުޝަންސް ފޯރުކޮށްދިނުމުގައި ރާއްޖޭގެ އެންމެ ކުރީގައި އޮތް ކުންފުނި ކަމަށްވާ ދިރާގުން އަންނަނީ، ޓެކްނޮލޮޖީއަށް އަންނަ ބަދަލުތަކާ އެއް ހަމައެއްގައި ތިބުމަށް ކަސްޓަމަރުން ބާރުވެރިކުރުމަށް އެންމެ ފަހުގެ ޚިދުމަތްތައް ދުނިޔޭގެ ފެންވަރުގައި ފޯރުކޮށްދެމުންނެވެ.