ދިވެހީންގެ ބަޔަކު އުމްރާއަށް ފޮނުވާނެ ކަމަށް ބުނެ އޮޅުވާލި މައްސަލައިގައި ޖަލަށްލާފައިވާ މަޝްއަރް ޕްރައިވެޓް ލިމިޓެޑް ކުންފުނީގެ ވެރިޔާ، އަލީ ފާރިޝް ވަގުތީގޮތުން ގޭބަންދަށް ބަދަލުކޮށްފިއެވެ.
މި މައްސަލައިގައި ފާރިޝް ތިން އަހަރަށް ޖަލަށްލާން ކްރިމިނަލް ކޯޓުން ހުކުމް ކޮށްފައިވަނީ، ނިމިދިޔަ ސެޕްޓެމްބަރު މަހުގެ 17 ވަނަ ދުވަހެވެ.
'ސަން'އިން ސުވާލުކުރުމުން މިއަދު ކަރެކްޝަނުން ބުނީ ސިއްހީ ހާލަތާ ގުޅިގެން ވަގުތީ ގޮތުން ފާރިޝް ގޭބަންދަށް ދޫކޮށްލާފައި ވާކަމަށެވެ. ނަމަވެސް އެކަމާ ބެހޭ އިތުރު ތަފުސީލެއް ދީފައެއް ނުވެއެވެ.
ދައުލަތުން ފާރިޝްގެ މައްޗަށް ދައުވާކުރީ ރާއްޖެއިން އުމްރާއަށް މީހުން ގެންދަން އޭސް އޭވިއޭޝަން ސާވިސް އާއި އޭސް ޓްރެވެލް މޯލްޑިވްސް މެދުވެރިކޮށް 48 މީހެއްގެ ޓިކެޓު ބުކިން ހެދުމަށް ފަހު، ފައިސާ ނުދެއްކި މައްސަލައިގައެވެ.
އެ ޓިކެޓްތަކަށް ދައްކަންޖެހޭ ފައިސާ ދެއްކުމުގެ ގޮތުން އެ ކުންފުނީގެ އެކައުންޓުން ދޫކުރި ދެ ޗެކެއް ބައުންސްވީއެވެ. އެއީ 390،126ރ. ޗެކަކާއި 156،050ރ. ގެ ޗެކެކެވެ. އެ ދެ ޗެކް ބައުންސްވީ އެކައުންޓްގައި ފައިސާ ނެތުމުންނެވެ.
ފާރިޝްއާ ދެކޮޅަށް ކުރި ދައުވާ ސާބިތުވެ، ހުކުމްގައި ބުނީ ފާރިޝްގެ މައްޗަށް ހުށަހަޅާފައިވާ މަކަރާއި ހީލަތް ހެދުމުގެ ކުށުގެ ދައުވާއަށް ފާރިޝް އިންކާރުކުރި ނަމަވެސް ހެކިތަކަށް ރިއާޔަތްކޮށް އެ ދައުވާ ގާނޫނުއަސާސީގެ 51 ވަނަ މާއްދާގައި ބަޔާންކުރާ، އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުވާ ކަމަށެވެ.
އެހެންވެ، އެ މައްސަލައިގައި ފާރިޝް ތިން އަހަރާއި ދެ މަހާއި 12 ދުވަހަށް ޖަލަށް ލާން ވަނީ ހުކުމްކޮށްފައެވެ.
މީގެ އިތުރުން އޭސް އޭވިއޭޝަން ޕްރައިވެޓް ލިމިޓެޑާއި އޭސް ޓްރެވެލް މޯލްޑިވްސް ޕްރައިވެޓް ލިމިޓެޑަށް ލިބުނު ގެއްލުމުގެ ބަދަލުގެ ގޮތުގައި 26،350.32 ޑޮލަރު ނުވަތަ އެއާ އެއްވަރުގެ ދިވެހި ރުފިޔާ (406،321.93 ރުފިޔާ) ދެއްކުމަށް ވެސް ހުކުމްކޮށްފައިވެއެވެ.
މަޝްއަރު ގުރޫޕުން އުމްރާވެރިން ފޮނުވަން ކަމަށް ބުނެ ފޮނުވި ޗެކްތަކެއް ބައުންސް ވެފައިވާ މައްސަލަ ރިޕޯޓުކޮށްފައި ވަނީ މިދިޔަ 2024 ވަނަ އަހަރުގެ އޭޕްރިލް މަހުގެ 13ވަނަ ދުވަހުގައެވެ.