ޖަންގަލީގެ ތެރެއިން އިވެމުންދިޔައީ ކޯރާޑިތަކުން ގަސްގަހުގައި ޖަހާ އަޑެވެ. ޕީޓާ އާއި ޖޯން އަކީ އެކަކަށްވުރެ އަނެކަކު މޮޅަށް މަސައްކަތްކުރާ ކަމަށް ދައުވާކުރާ ދެ ކަނބުރުވެރިންނެވެ. މި ދެމީހުންގެ މެދުގައި އުފެދިފައިވާ ވާދަވެރިކަމަށް ނިމުމެއް ގެނައުމަށްޓަކައި، އެއް ދުވަހު އެމީހުން ނިންމީ މުބާރާތެއް ބޭއްވުމަށެވެ. ގަވާއިދަކީ ސާދާ ގަވާއިދެކެވެ. އިރުއޮއްސޭއިރު އެންމެ ގިނަ ދަރު ފެޅި މީހަކީ މުބާރާތުގެ ނަސީބުވެރިޔާއެވެ.
ޖެހިގެން އައި ދުވަހުގެ ހެނދުނު، ދެމީހުންވެސް އެ މީހުންގެ މަގާމުތަކުގައި ތިބެ މަސައްކަތް ފެށިއެވެ. ގަޑިއެއްހާއިރު ވީތަނާ، ކުއްލިއަކަށް ޕީޓާ މަސައްކަތް ހުއްޓާލި އަޑު ޖޯންއަށް އިވުނެވެ. ޖޯންގެ ހިތަށްއެރިއެވެ. “އޭނާ މިހާރުވެސް ވަރުބަލިވީއެވެ.” ލިބުނު ހިތްވަރާއެކު ޖޯން އޭނާގެ މަސައްކަތުގެ ސްޕީޑް ދެގުނަ އަވަސްކޮށްލިއެވެ. ފަނަރަ މިނެޓަށްފަހު އަނެއްކާވެސް ޕީޓާ މަސައްކަތް ފެށި އަޑު އިވުނެވެ.
މުޅި ދުވަސް ހޭދަވެގެންދިޔައީ މިފަދަ ގޮތަކަށެވެ. ކޮންމެ ގަޑިއަކުވެސް ޕީޓާ ފަނަރަ މިނެޓަށް މަސައްކަތް މެދުކަނޑާލައެވެ. ނަމަވެސް ޖޯން އެންމެ ސިކުންތަކަށްވެސް މަސައްކަތް ހުއްޓައެއް ނުލައެވެ. މުބާރާތް ނިމުނުއިރު، ޖޯން ހުރީ އޭނާ މޮޅުވާނެކަމުގެ ފުރިހަމަ ޔަގީންކަމުގައެވެ. ނަމަވެސް ނަތީޖާ އިއުލާނުކުރި އިރު، އެންމެން ހައިރާންކޮށްލުމަށްފަހު ކުރި ހޯދީ ޕީޓާއެވެ. އޭނާ ވަނީ ޖޯންއަށްވުރެ މާ ގިނަ ދަރު ފަޅާފައެވެ.
ކާމިޔާބީގެ ހަގީގީ ސިއްރު
“މިއީ ކިހިނެއް ވީ ކަމެއް؟” ޖޯން ހައިރާންކަމާއެކު ސުވާލުކުރިއެވެ. “އަހަރެން އަޑުއެހިން ކޮންމެ ގަޑިއަކު ކަލޭ ފަނަރަ މިނެޓަށް މަސައްކަތް ހުއްޓާލާ އަޑު. އަހަރެން އެންމެ ހިނދުކޮޅަކަށްވެސް މަސައްކަތް މެދުކަނޑައެއް ނުލަން.”
ޕީޓާ ހިނިތުންވުމަކާއެކު ޖަވާބުދިނެވެ. “އެއީ ވަރަށް ސާދާ ކަމެކެވެ. އަހަރެން މަސައްކަތް މެދުކަނޑާލި ކޮންމެ ފަހަރަކު، އަހަރެން ކުރި ކަމަކީ އަހަރެންގެ ކޯރާޑި ތޫނުކުރުމެވެ.”
މިއީ ހަމައެކަނި ދަރުފަޅާ މީހުންގެ ވާހަކައެއް ނޫނެވެ. މިއީ މިއަދުގެ ދުނިޔޭގައި އަޅުގަނޑުމެން އެންމެންގެ ހާލަތެވެ. އަޅުގަނޑުމެން އެންމެންވެސް އުޅެނީ ވަރަށް ބުރަކޮށެވެ. އަމާޒުތަކަށް ވާސިލުވުމަށްޓަކައި ހުއްޓުމެއް ނެތި މަސައްކަތްކުރަމުންދާއިރު، އަމިއްލަ ނަފްސު ތަރައްޤީކުރުމަށް ނުވަތަ “ކޯރާޑި ތޫނުކުރުމަށް” ވަގުތު ހޯދަނީ ވަރަށް މަދު މީހެކެވެ.
ކޯރާޑި ތޫނުކުރުމަކީ ކޮބައި؟
މަޝްހޫރު ލިޔުންތެރިޔާ ޑރ. ސްޓީވަން ކަވީ އޭނާގެ ފޮތް “ދަ ސެވަން ހެބިޓްސް އޮފް ހައިލީ އިފެކްޓިވް ޕީޕަލް” ގައި “ކޯރާޑި ނުވަތަ ކީސް ތޫނުކުރުން” މާނަކުރައްވަނީ ހަތަރު ދާއިރާއަކުން އަމިއްލަ ނަފްސު ތަރައްޤީކުރުމަށެވެ:
ޖިސްމާނީ: ރަނގަޅު ކާނާ ކެއުމާއި، ފުރިހަމައަށް ނިދުމާއި، ކަސްރަތުކުރުން.
އިޖުތިމާއީ/އިހުސާސްތައް: އެހެން މީހުންނާ އޮންނަ ގުޅުންތައް ބަދަހިކުރުމާއި، މާނަހުރި ވަގުތުތައް ހޭދަކުރުން.
ވިސްނުން: އާ ކަންތައްތައް ދަސްކުރުމާއި، ފޮތް ކިޔުމާއި، ލިޔުން.
ރޫހާނީ: މެޑިޓޭޓް ކުރުމާއި، ގުދުރަތީ މާހައުލުގައި ވަގުތު ހޭދަކޮށް ހިތްހަމަޖެހުން ހޯދުން.
ގިނަ ފަހަރަށް އަޅުގަނޑުމެންނަށް ހީވަނީ މަސައްކަތް މެދުކަނޑާލައި އަރާމުކުރުމަކީ ކޯރާޑި ތޫނުކުރުން ކަމަށެވެ. ނަމަވެސް އެއީ ހަމައެކަނި ކޯރާޑި ބޭއްވުމެވެ. ކޯރާޑި ބޭއްވުމަކުން އޭގެ މިޔަ ތޫނެއް ނުވާނެއެވެ. އުފެއްދުންތެރިކަން އިތުރުވާނީ، އަރާމުކުރުމުގެ އިތުރުން އާ ހުނަރުތައް ދަސްކޮށް، ހަށިގަނޑާއި ސިކުނޑި ވަރުގަދަކޮށްގެންނެވެ.
ދުނިޔޭގެ ކާމިޔާބު މިސާލުތައް
ދުނިޔޭގެ އެންމެ ކާމިޔާބު މީހުންނަކީ މި ފަލްސަފާ ގަބޫލުކުރާ މީހުންނެވެ. އަރިއާނާ ހަފިންގްޓަން ބާރުއަޅުއްވަނީ އުފެއްދުންތެރިކަން އިތުރުކުރުމަށްޓަކައި ފުރިހަމައަށް ނިދުމަށެވެ. ދުނިޔޭގެ އެންމެ މުއްސަނދި އެކަކު ކަމަށްވާ ވޮރެން ބަފެޓް އޭނާގެ ވަގުތުގެ 80 އިންސައްތަ ހޭދަކުރައްވަނީ ފޮތް ކިޔުމުގައެވެ. އޭނާ ގަބޫލުކުރައްވާ ގޮތުގައި މައުލޫމާތަކީ ކޮމްޕައުންޑް އިންޓްރެސްޓް ފަދައިން އިތުރުވާ އެއްޗެކެވެ.
މީގެ އިތުރުން، ޓޮޔޯޓާ ފަދަ ބޮޑެތި ކުންފުނިތަކުން އެމީހުންގެ މުވައްޒަފުން ތަމްރީނުކުރުމަށް ބޮޑެތި ހޭދަތަކެއް ކުރެއެވެ. އެއީ ހަމައެކަނި މަސައްކަތް ކުރުވުމުގެ ބަދަލުގައި، މަސައްކަތް ކުރާނެ ފެންވަރު ރަނގަޅުކުރުމަށްޓަކައެވެ. މިއީ “ލާނިންގް އޯގަނައިޒޭޝަން” ނުވަތަ ދަސްކުރާ މާހައުލެއް އުފެއްދުމުގެ މުހިންމުކަމެވެ.
އަޅުގަނޑުމެންގެ ދިރިއުޅުމުގައިވެސް، ކޮންމެ ދުވަހަކީ އަމިއްލަ ނަފްސު އާލާކުރުމަށް ލިބޭ ފުރުސަތެކެވެ. މުޅި ދުވަހު ހުއްޓުމެއް ނެތި މަސައްކަތުގައި އުޅުމުގެ ބަދަލުގައި، ކޮންމެވެސް ވަގުތުކޮޅެއް ކޯރާޑި ތޫނުކުރުމަށް ހުސްކޮށްލަމާ ހިނގާށެވެ. ގިނަ ވަގުތު މަސައްކަތް ކުރުމުގެ ބަދަލުގައި، ބުއްދިވެރިކަމާއެކު މަސައްކަތް ކުރަން ދަސްކުރުމަކީ ކާމިޔާބީގެ އަސްލެވެ.