ފުލެޓެއް އޮތުމުގެ ސަބަބުން، ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގެ "ބިންވެރިޔާ" ސްކީމުގެ ދަށުން ދޫކުރި ގޯއްޗަށް ކުރިމަތިނުލެވުނު ފަރާތްތަކަށް، މި ސަރުކާރުގެ "ބޯހިޔާވަހިކަން އެންމެންނަށް" ސްކީމްގެ ދަށުން ގޯތި ހަވާލުކުރާނެ ޝަރުތު ހިމަނައި، "ބިންވެރިޔާ" ޚާއްސަ ސްކީމާ ގުޅޭ އުސޫލު ހައުސިން މިނިސްޓްރީން މިއަދު އާންމުކޮށްފިއެވެ.
މިނިސްޓްރީން މިއަދު އާންމުކުރި އުސޫލުގައިވާ ގޮތުން، ބިންވެރިޔާ ސްކީމުގެ ދަށުން ގޯތި ލިބުނު ފަރާތްތަކުގެ ތެރެއިން ގޯތި ދޫކޮށްލަން ބޭނުންވާ ފަރާތްތަކާއި، ބިންވެރިޔާ ސްކީމަށް ކުރިމަތިނުލެވުނު ފަރާތްތަކަށް ގޯތި ދޫކުރާނީ ރަސްމާލޭންނެވެ. ކޮންމެ ގޯއްޗެއްގެވެސް ބޮޑުމިނަކީ 1،250 އަކަފޫޓެވެ.
އެ އުސޫލުގައިވާ ގޮތުން، މި ސަރުކާރުގެ ސްކީމުގެ ދަށުން ގޯއްޗަށް އެދި ގޯތި ކަށަވަރުވެއްޖެނަމަ، ޖޮއިންޓް އެޕްލިކޭޝަން ހުށަހަޅައިގެން "ބިންވެރިޔާ" ސްކީމުގެ ދަށުން ގޯތި ލިބިފައިވާ ފަރާތްތައް އެ ގޯތި ދޫކޮށްލަން އެއްބަސްވާން ޖެހޭނެއެވެ.
އަދި ފުލެޓެއް އޮތުމުން ބިންވެރިޔާ ސްކީމުގެ ދަށުން ގޯއްޗަށް ކުރިމަތިނުލެވުނު ފަރާތްތަކުގެ ތެރެއިން މި ސަރުކާރުގެ ސްކީމުގެ ދަށުން ގޯތި ލިބިއްޖެނަމަ ފުލެޓު ދޫކޮށްލަން އެއްބަސްވާން ޖެހޭނެއެވެ.
ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ބޯހިޔާވަހިކަމުގެ ފުރަތަމަ ސްކީމަށް ހުށަހެޅުމުގެ ފުރުސަތު ހައުސިން މިނިސްޓްރީން ހުޅުވާލީ ނިމިދިޔަ ޖަނަވަރީ މަހުގެ 18 ވަނަ ދުވަހެވެ. އެ ޕްރޮގްރާމުގެ ދަށުން 7،900 ފުލެޓާއި 15،000 ގޯތި ދޫކުރަން ސަރުކާރުން ވަނީ ނިންމާފައެވެ.
ޖުމްލަ 7،900 ފުލެޓުގެ ތެރެއިން 4،000 ފްލެޓު ދިނުމަށް ހަމަޖެހިފައިވަނީ މާލޭގެ ރަށްވެހިންނަށެވެ. އަދި މާލޭގައި ރަށްވެހިވެފައިނުވާ މާލޭގައި ދިރިއުޅެމުން އަންނަ މީހުންނަށް 1،500 ފުލެޓު ދިނުމަށާއި، ބާކީ 2،400 ފުލެޓު ސަރުކާރުން ކަނޑައަޅާފައިވާ ޚާއްސަ ކެޓަގަރީތަކަށް ދިނުމަށް ވަނީ ނިންމައިފައެވެ.
ހައުސިން މިނިސްޓްރީން މިދިޔަ ފެބްރުވަރީ މަހުގެ ފަހުކޮޅު ހިއްސާކުރި ތަފާސްހިސާބުން ދައްކާ ގޮތުގައި، އެހާތަނަށް ޖުމުލަ 5،067 މީހުން ގޯއްޗާއި ފުލެޓަށް އެދި ފޯމު ހުށަހަޅައިފައިވެއެވެ. އޭގެ ތެރެއިން ފުލެޓަށް އެދި 3،434 މީހުން ފޯމު ހުށަހެޅިއިރު ގޯއްޗަށް އެދި 1،633 މީހުން ވަނީ ފޯމު ހުށަހަޅައިފައެވެ.