ރާއްޖޭގެ މެރިކަލްޗާ ސިނާއަތް، ބިލިއަނުން ރުފިޔާ ލިބޭ ވަރަށް ތަރައްގީކުރުމަކީ އުއްމީދެއް ކަމަށް ފިޝަރީސް މިނިސްޓަރު އަހުމަދު ޝިޔާމް މިއަދު ހާމަކުރައްވައިފިއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޝިޔާމް ވަނީ، މެރިކަލްޗާއަށް އިންވެސްޓުކޮށް، މިހާރު ހިނގަމުން އަންނަ މަސައްކަތްތަކުގެ ތަފުސީލު ދެއްވާފައެވެ. އެގޮތުން، ގާތްގަނޑަކަށް 300 މިލިއަން ރުފިޔާ މެރިކަލްޗާއަށް އިންވެސްޓުކޮށްގެން ކ. މަނިޔަންފުށީގައި މަސައްކަތްތައް ކުރިއަށްދާ ކަމަށް މިނިސްޓަރު ވިދާޅުވިއެވެ.
ހަމައެއާއެކު މޫދު ވިނަ އާލާކުރުމުގެ މަޝްރޫއެއް ވެސް ކުރިއަށްދާ ކަމަށް މިނިސްޓަރު ވަނީ ވިދާޅުވެފައެވެ.
ސީދާ އަދަދެއް ވިދާޅުނުވެ، ދާއިރާއަށް އިންވެސްޓުކުރުމަށް ހުށަހަޅާފައިވާ ޕްރޮޕޯސަލްތަކާ ހަވާލާދީ ޝިޔާމް ވިދާޅުވި ގޮތުގައި، އެއީ އެތައް މިލިއަން ޑޮލަރެއްގެ ޕްރޮޖެކްޓުތަކެވެ.
މީގެކުރިން ވެސް މެރިކަލްޗާއަށް ރަށްތައް ދެވިފައި ހުއްޓަސް، މުހިންމީ ގާނޫނުން އެ ބާރުވެރިކަން ލިބުން ކަމަށް މިނިސްޓަރު ގަބޫލުކުރައްވައެވެ. ސިޔާމް ސިފަކުރެއްވި ގޮތުގައި، އެ ސިނާއަތުގެ ވާހަކަ ގަދައަށް ދެކެވުނަސް، އަދި މެރިކަލްޗާ ދާއިރާ އޮތީ ވަރަށް ޅަފަތުގައެވެ.
މިނިސްޓަރު ޝިޔާމް މޫދު ވިނަ އާލާކުރުމަށް ފެށި މަޝްރޫއެއްގައި --- ފޮޓޯ/ ފިޝަރީސް މިނިސްޓްރީ
މިގޮތުން، މެރިކަލްޗާއިން އާމްދަނީ ލިބޭ ގޮތެއް ހުރިހާ ދިމާލަކުން އޮންނަން ޖެހޭކަން އޭނާ ފާހަގަކުރެއްވިއެވެ.
ޝިޔާމް ވިދާޅުވި ގޮތުގައި، ރާއްޖޭގައި މެރިކަލްޗާއަށް އިންވެސްޓުކުރުމަށް ހުޅުވާލީ، އެހެން ގައުމުތަކުގައި އެކަން ކުރާ ގޮތް ބަލައި، އިތުރު ލުއިތަކާ އެކީގައެވެ.
އެހެންވީމަ އަޅުގަނޑުމެން މި އުއްމީދުކުރަނީ، ދިވެހިރާއްޖެއަށް ބިލިއަނުން ރުފިޔާ ވައްދާނެ ސިނާއަތެއްގެ ގޮތުގައި މެރިކަލްޗާ ތަރައްގީކުރެވޭނެ ކަމަށް،ފިޝަރީސް މިނިސްޓަރު އަހުމަދު ޝިޔާމް
މިނިސްޓަރު އެފަދައިން ވިދާޅުއިރު، ރާއްޖެއަކީ ދިރުންތައް މުއްސަނދި ފަޅުތަކާއި ކަނޑުތައް ގިނަ ގައުމެކެވެ. ނަމަވެސް، މުޅިންހެން ސީފުޑު އެތެރެކުރަނީ، އެކި ގައުމުތަކުން ކަމަށްވާއިރު، ފަތުރުވެރިންނަށް އެ ބާވަތް ކާންދިނުމަށް އެތެރެކުރާ މިންވަރު މަދެއް ނޫނެވެ.
އެ ސިނާއަތަކީ، ދަނޑުވެރިކަމަށް ވުރެ ބޮޑަށް ރާއްޖެއަށް ނަފާ ހޯދޭނެ ދާއިރާއަކަށްވާއިރު، މިހާތަނަށް އެ ސިނާއަތް ކުރިއަރުވަން ސަރުކާރުތަކުން ގިނަ މަސައްކަތްތަކެއް ކޮށްފައެއް ނުވެއެވެ.