'އަލް އަބްރާރު ޕްރައިވެޓް ލިމިޓެޑް' ގްރޫޕުން 110 މީހަކު އުމްރާއަށް ގެންދަން އިންތިޒާމު ކުރި ދަތުރު، ފަހު ވަގުތު ކެންސަލްކުރި މައްސަލަ ބަލަމުން އަންނަ ކަމަށް ފުލުހުން މިއަދު ބުނެފިއެވެ.
އެ މައްސަލައާ ގުޅޭ ގޮތުން 'ސަން' އާ ވާހަކަދެއްކި މީހަކު ބުނި ގޮތުގައި އެ ގްރޫޕާއެކު 110 މީހުން އުމްރާއަށް ފުރަން ހަމަޖެހިފައި އޮތީ ރޭގައެވެ. އެ ދަތުރަށް ކޮންމެ މީހަކު ގާތްގަނޑަކަށް 45،000 ރުފިޔާ ދައްކައިފައިވަނިކޮށް، ފުރުން ކުއްލިއަކަށް ކެންސަލްކުރީ ކަމަށް އޭނާ ބުންޏެވެ.
އެކަމާ ގުޅިގެން 'ސަން' އަށް މައުލޫމާތުދެއްވައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ރޭ ވިދާޅުވީ އެ މައްސަލަ މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އަދި މިނިސްޓްރީ އެކަން ހިނގި ގޮތް ބަލަމުންދާ ކަމަށް ވެސް އޭނާ ވިދާޅުވިއެވެ.
ފުލުހުން މިއަދު "ސަން"އަށް ބުނީ، ރޯދަމަހު އުމްރާއަށް މީހުން ގެންދިޔުމަށްޓަކައި ގުރޫޕަކުން ފައިސާ ނެގުމަށް ފަހު ދަތުރު ކެންސަލްކޮށްފައިވާ ކަމުގެ ޝަކުވާ މިއަދު ފުލުހުންނަށް ހުށަހަޅައިފައިވާ ކަމަށެވެ. އެކަމާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް އެ މުއައްސަސާއިން ބުންޏެވެ.
'އަލް އަބްރާރު ޕްރައިވެޓް ލިމިޓެޑް' ގްރޫޕުން ދަތުރު އިންތިޒާމު ކުރި ގޮތާ ގުޅޭ ގޮތުން މި ނޫހަށް މައުލޫމާތު ދިން މީހާ ބުނި ގޮތުގައި، އޭނާގެ އާއިލާގެ މީހުން އުމްރާއަށް ފުރާތީ އެކަންތައްތައް ހަމަޖައްސަން އޭނާ އިސްކޮށް އުޅުނެވެ. އެގޮތުން އިއްޔެ ހެނދުނު 10:00 އާއި 11:00 އާ ދޭތެރޭ އެއާޕޯޓަށް ފޮށިތައް ގެންދިޔުމަށް އެދުނު ކަމަށާއި، ފުރަން ދާން ތިބި އެންމެން ހޯމަ ދުވަހުގެ ރޭ ޕެކްކޮށް ވެސް ނިންމި ކަމަށް އެ މީހާ ކިޔައިދިނެވެ. ކަން އެހެން އޮއްވައި ކުއްލިއަކަށް ގުޅައި، ރޭ ފުރަން ދާއިރު ފޮށިތައް ގެންދަން އެދުނު ކަމަށް އޭނާ ބުންޏެވެ.
އެފަހުން އިއްޔެގެ މެންދުރު ދޭއް ޖަހަނިކޮށް ގުޅައި، މީޓިންއެއް އޮތްކަން އަންގައި، އުމްރާއަށްދާ އެންމެން އެ މީޓިންއަށް ހާޒިރުވާން އެންގި ކަމަށް އޭނާ ބުންޏެވެ. ފުރުން ކެންސަލްކުރިކަން އެނގުނީ ވެސް އެ މީޓިންއަށް ދިޔުމުން ކަމަށް އެ މީހާ ބުންޏެވެ.
އަލް އަބްރާރު ގްރޫޕުން މައުލޫމާތު ދިނީ، މިހާރު މެދުއިރުމަތީގައި ހިނގާ ހަނގުރާމައާ ހެދި ފުރުން ކެންސަލްވީ ކަމަށް ކަމަށް އޭނާ ބުންޏެވެ.