އިސްލާމީ އުންމަތުގައި ޔަހޫދީން ރޯކޮށްފައި އޮތް ހުޅުގަނޑު އާކުރާ މަހަކީ ރަމަޟާންމަހެވެ. އަނިޔާވެރިކަމާއި ޤަތުލުއާންމު ނުހިންގާ ރަމަޟާންމަހެއް، މިއަދު ދުނިޔޭގައި މި އޮތް ޖީލުގެ އެއްވެސް މީހަކު ހަނދާން ހުންނާނެއެކޭ އަޅުގަނޑަކަށް ނުދެންނެވޭނެއެވެ.
މެދުއިރުމަތީގެ މުސްލިމުންނަށް، ޚާއްޞަކޮށް ފަލަސްޠީނު ރައްޔިތުންނަށް އަމާޒުކޮށްގެން ހަމަލާދީ އެ ސަރަހައްދުގައި ޤަތުލުއާންމު އާދަވެ ހިންގަމުން ގެންދާ ޔަހޫދީން އެ މީހުންގެ ހަނގަރާމަ އާކޮށްލާ މަހެއްގެ ގޮތުގައި ރަމަޟާންމަސް ހަދާފައި އޮންނަތާ ވަރަށް ދުވަސްވެއްޖެއެވެ. އަޅުގަނޑުމެން ކުޑައިރުންސުރެ އަޑުއަހަނީ މި ބިރުވެރި ޚަބަރެވެ. ކަންފަތްތަކުގައި ހުރީ ހަނގުރާމައިގެ ގަދަފަދަ އަޑުފަށްގަޑު ގުގުމާފައެވެ. ލޯތަކުން އޮހޮރެނީ ހިތާމައިގެ ކަރުނައެވެ. ހިތްތަކުން އެދެވެނީ އެ ތަނުގެ މުސްލިމު އަޚުންނާއި އުޚުތުންނަށް އަމާންކަމާއި ރައްކާތެރިކަން ލިބުމެވެ.
މި ދެންނެވި މަންޒަރުތަކާއި އަޑުތައް ތަކުރާރުކޮށް އިވިއިވި މުސްލިމުން މިއަދު އެއްގޯސްވެއްޖެއެވެ. އެއީ އެއްވެސް މީހަކަށް ޙައްލު ނުކުރެވޭނެ ކަމެއްގެ ގޮތުގައި ދެކެވެން ފަށައިފިއެވެ. ޚާއްޞަކޮށް މިއިން އެއްވެސް ކަމަކާ ފަރުދީ ގޮތުން ކުރެވޭނެ ކަމެއް ނެތްކަމަށް ޔަޤީންވާންފަށައިފިއެވެ. އަދި ހަމައެހެންމެ އެ ކަމާ ވިސްނުން ވެސް ހުއްޓޭ ހިސާބަށް، މުސްލިމުންގެ ހިތްތަކުގައި ދުނިޔެއަށް ލޯބި ޖައްސައިފިއެވެ. އިސްލާމަކަށް ވީތީ އޮންނަ އެއްބަނޑުއެއްބަފައިކަމުގެ ކުލުނު ހިތްތަކުން ބޭރުކުރުވައިފިއެވެ.
ލޮބުވެތި ކިޔުންތެރިންނޭވެ! ދުނިޔޭގައި މި ހިނގަނީ ބިމާއި މުޤައްދަސް ތަންތަނުގެ މައްޗަށް ވެރިވުމުގެ ހަނގުރާމައެއް އެކަންޏެއް ނޫނެވެ. މިއީ އިސްލާމީ ނަސްލު ނައްތައިލަން ހިންގާ ބައިނަލްއަޤުވާމީ ޖަރީމާއެވެ. އަނިޔާވެރި ޢުދުވާނެކެވެ. މިއަދު ހިނގަމުން މިދާ ކަންކަމަށް ވިސްނައިލުމުން އެކަނި ވެސް މި ދެންނެވި އެއްޗެއް ވަރަށް ރަނގަޅަށް ސާފުވާން ނެތްތޯއެވެ؟
މުސްލިމުންގެ ތެރޭ ދެކެވޭ އެއް ވާހަކައަކީ ޝިޢައީންނާއި ސުންނީންގެ ތަފާތުތަކުގެ ވާހަކައެވެ. ޢަޤީދާގެ ގޮތުން ހުރި މައްސަލަތަކެއްގެ ވާހަކައެވެ. ދެބައިމީހުންގެ މެދުގައި އެއްގޮތް ނުވެވޭކަން ޤަބޫލުކުރާ މިންވަރަކީ އެއްބަޔަކު އަނެއް ބަޔަކު ކާފިރުކޮށް އިސްލާމުން ކަމުގައި ވެސް ބަލައި ނުގަތުމެވެ. އެހެނަސް ޔަހޫދީންގެ ނަޒަރިއްޔާގައި އެއްވެސް ތަފާތެއް މި ކަމުގައި ނުގެންގުޅެއެވެ. އެ މީހުންނަށް މަޒްހަބީ ތަފާތެއް މުހިންމެއް ނޫނެވެ. لا إله إلا الله މި ކަލިމަ ކިޔައިގެން، ތިމަންނާއީ މުސްލިމެކޭ ބުނާ ކޮންމެ މީހަކާއި ޤައުމެއް ތަޅާ ސުންނާފަތިކޮށް އެކީއެކަށް ނައްތައިލުން ނޫން އަމާޒެއް އެ މީހުންގެ ނެތެވެ.
އިސްލާމުން އިސްލާމްކަމުގައި ބައިބައިވާއިރު އެ މީހުން އެގެންދަނީ ކާފިރުކަމުގައި އެއްބައިވަމުންނެވެ. އެ މީހުންގެ މަކަރުވެރި ރޭވުންތަކުގެ ދަށުލައި ބައެއް މުސްލިމް ޤައުމުތައް ވެސް މަޅީގައި ޖައްސައިފިއެވެ. އެ މީހުންގެ ގޮތްތަކާއި މިއްލަތަށް ތަބާ ވަންދެން، އެއިން އެކަކު ވެސް މުސްލިމަކާ ރުހި ޤަބޫލު ނުވާނެކަން ކީރިތި ޤުރުއާނުން އެނގެން އެބަ އޮތެވެ. ﴿وَلَن تَرْضَىٰ عَنكَ الْيَهُودُ وَلَا النَّصَارَىٰ حَتَّىٰ تَتَّبِعَ مِلَّتَهُمْ﴾ (البقرة: ١٢٠) މާނައީ: "އަދި ޔަހޫދީން ވެސް ނަޞާރާއިން ވެސް އެއުރެންގެ ދީނަށް ކަލޭގެފާނު ތަބާވެވަޑައިގެންފުމަށް ދާނދެން ކަލޭގެފާނަކާ ނުރުހޭނެތެވެ."
މާތް ﷲގެ ކަލާމްފުޅު ދޮގެއް ނުވާނެއެވެ. ކިތަންމެ ރީތި ކުލައެއްގައި، ކިތަންމެ ރީތި ހެދުމެއްގައި، އަދި ކިތަންމެ ރީތި ޝިޢާރުތަކެއް ފާޅުކުރިޔަސް ޔަހޫދީން ވާނީ ޔަހޫދީންނަށެވެ. އެ މީހުންގެ އައުވާނުން ވެސް ވާނީ ހަމަ އެ މީހުންނަށެވެ. އެ މީހުންނާ އެއްބަސް ކިޔައި އެ މީހުންނަށް ރުހެންދެން އަނިޔާގެ ހުޅުގަނޑު އެ މީހުން ނިއްވައިނުލާނެއެވެ. އެ ހުޅުގަނޑު ރޯކޮށްފައި ބަހައްޓާނެއެވެ. ކޮންމެ ރޯދަ މަހެއްގައި އެގެންދަނީ އެ ހުޅުގަނޑު އައުކުރަމުންނެވެ.