ދިރުވާލައިގެން ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރި މީހަކު، ދައުވާއަށް ޝަރީއަތުގައި އިންކާރު ކުރުމަށް ފަހު، ފަހުން ދައުލަތާއެކު އިއުތިރާފުގެ އެއްބަސްވުމެއް ހަދައިފިއެވެ.
މިއީ، 2023 ވަނަ އަހަރު، ދުބާއީން ރާއްޖެއަށް އައި، އައްޑު އަތޮޅު ހިތަދޫ އަރާއިރު، ޝާހިދު ރަޝީދުގެ މައްޗަށް ދައުލަތުން އުފުލި ޖަދުވަލު އެކެއް ގައިވާ މަސްތުވާއެއްޗެއް ދިވެހިރާއްޖެއަށް އެތެރެކުރުމުގެ ކުށުގެ ދައުވާއެވެ.
މި ދައުވާގައި ބުނެފައިވަނީ، 2023 ވަނަ އަހަރުގެ ނޮވެމްބަރު މަހުގެ 13 ވަނަ ދުވަހު، ދުބާއީން ރާއްޖެއަށް އައި، އެމިރޭޓްސް ފްލައިޓުން ރާއްޖެއަށް ޝާހިދު އައިއިރު، އޭނާގެ ހަށިގަނޑުގައި މަސްތުވާތަކެތި ރައްކާކޮށްފައި ހުރިކަން ފާހަގަ ކުރެވުނު ކަމަށެވެ.
މައްސަލަ ނިމުނު ގޮތުގެ ރިޕޯޓުން އެނގޭ ގޮތުގައި ޝާހިދުގެ ހަށިގަނޑުގައި 40 އަށްވުރެ ގިނަ ބުލެޓުގައި މަސްތުވާތަކެތި އެތެރެކޮށްފައިވެއެވެ. މި ތަކެތި ހުރިކަން، ހޮސްޕިޓަލަށް އޭނާ ގެންގޮސް ހެދި ސިޓީ ސްކޭނުން އެނގުމުން، އެ ތަކެތި ނަގާފައިވަނީ އޭނާ ހައްޔަރުކޮށްފައި ހުރި ވަގުތު އެކި ފަހަރު މަތިން ބޮޑުކަމު ދިޔުމުންނެވެ.
ހަށިގަނޑުގައި ފޮރުވައިގެން ގެނައި 40 އަށްވުރެ ގިނަ ބުލެޓު، ބޮޑުކަމު ދިޔުމުން ހަށިގަނޑުން ނެގިނަމަވެސް ޝާހިދު ފުރަތަމަވަނީ ޝަރީއަތުގައި އޭނާގެ މައްޗަށް ކުރި ދައުވާއަށް އިންކާރުކޮށްފައެވެ. އެކަމަކު ފަހުން އޭނާވަނީ ދައުވާއަށް އެއްބަސްވެ، އިއުތިރާފުގެ އެއްބަސްވުން ދައުލަތާއެކު ހަދައިފައެވެ.
ދައުލަތުން ޝާހިދުއާ ދެކޮޅަށް ކުރި މި ދައުވާއަކީ އުމުރު ދުވަހުގެ ޖަލު ހުކުމެއް އަންނަ ފަދަ ދައުވާއެކެވެ. އެކަމަކު ކުށަށް އިއުތިރާފުވެ، އިއުތިރާފު އެއްބަސްވުން ހެދުމުން އަދަބުން ދެބައިކުޅަ އެއްބައި ލުއިކުރީއެވެ.
އަދަބު ލުއި ކުރުމުން ޝާހިދުގެ މައްޗަށް އިއްވީ، 12 އަހަރާއި ހަ މަހުގެ ހުކުމަކާއެކު 50،000 ރުފިޔާގެ ޖޫރިމަނާއެކެވެ. އޭގެ ތެރެއިންވެސް ޝާހިދު ތަންފީޒު ކުރަން ބާކީ އޮތީ، 10 އަހަރާއި ދެ މަހާއި 13 ދުވަހުގެ ހުކުމެވެ.
ކްރިމިނަލް ކޯޓުން މި މައްސަލަ ނިންމީ، މި ހަފްތާގައެވެ. ދެހާސް ސައްވީސް ވަނަ އަހަރު ކޯޓަށް މި މައްސަލަ ހުށަހެޅުނުއިރު، ހާދިސާ ހިނގި އިރުން ފެށިގެން ޝާހިދު ހުރީ ބަންދުކޮށްފައެވެ.