އީރާނަށް ހަތިޔާރާއި އެހެނިހެން އަސްކަރީ އެހީތެރިކަން ޗައިނާއިން ފޯރުކޮށްދޭ ކަމަށް ބުނާ ވާހަކަ އެ ގައުމުގެ ޚާރިޖީ ވުޒާރާއިން ދޮގުކޮށްފިއެވެ.
ޗައިނާއިން ގާތްގަނޑަކަށް 70 ޕަސެންޓް ތެޔޮ އެތެރެކުރާއިރު އޭގެ ގާތްގަނޑަކަށް ދެބައިކުޅަ އެއްބައި ތެޔޮ އަންނަނީ ހޮރްމޫޒް ކަނޑުއޮޅު މެދުވެރިކޮށެވެ. އޭގެ ތެރެއިން ގިނައީ އީރާނުން ގެންނަ ތެޔޮ ނަމަވެސް އެ ސަރަހައްދުގެ އެހެން ގައުމުތައް ކަމަށްވާ އިރާގާއި ސައުދީ އަރަބިއްޔާ އަދި ކުވައިތުން ވެސް ޗައިނާއަށް ތެޔޮ އެތެރެކުރެއެވެ.
ޗައިނާއިން އަންނަނީ ހާލަތު ގޯސްވަމުންދާ ހަނގުރާމައިގެ ހާލަތު ވަރަސް ގާތުން ބަލަމުންނެވެ.
ޗައިނާއަކީ އިގްތިސާދީ ގޮތުން އީރާނަށް ތާއީދުކުރާ ބޮޑެތި އިގްތިސާދުތަކުގެ ތެރެއިން އެއް އިގްތިސާދެވެ. އީރާނުގެ ސަރުކާރަކީ ރަހުމަތްތެރިއެއް ކަމަށާއި އަމިއްލަ ދިފާއުގައި އީރާނުން ކުރާ މަސައްކަތްތަކަަށް ތާއީދުކުރާކަން ޗައިނާއިން ވަނީ ވަރަށް ސާފުކޮށް ބުނެފައެވެ.
ޗައިނާއިން އީރާނަށް އަސްކަރީ އެހީތެރިކަން ފޯރުކޮށްދޭ ކަމަށް ވާހަކަތައް ދެކެވެންފެށީ ޗައިނާގެ ފޮރިން މިނިސްޓަރު ވަންގް ޔީ ބައެއް ގައުމުތަކާއި ފޯނުން ގުޅުއްވާފައި ވާހަކަފުޅުދައްކަވާފައިވާ ދަނޑިވަޅެއްގައެެވެ.
ޝިންހުއާ ނިއުސް އެޖެންސީން ރިޕޯޓުކޮށްފައިވާ ގޮތުގައި ޗައިނާގެ ޚާރިޖީ ވަޒީރު ވަންގް ޔީ ހޯމަ ދުވަހު ވަނީ އީރާނުގެ ޚާރިޖީ ވަޒީރު ސެއިދު އައްބާސް އަރަގްޗީ އާއި ފްރާންސްގެ ޚާރިޖީ ވަޒީރު ޖީން ނޯއެލް ބާރޮޓް އަދި އޮމާންގެ ޚާރިޖީ ވަޒީރު ސައްޔިދު ބަދުރު ބިން ހަމާދު އަލް ބުސައިދީއާ ފޯނުއްގުޅުއްވާފައެވެ.
ވަންގް ވަނީ އީރާނުގެ އިސްތިގުލާލާއި ސަލާމަތާއި ސަރަހައްދުގެ ނަޒާހަތްތެރިކަމާއި ގައުމީ ކަރާމާތް ހިމާޔަތްކުރުމުގައި އީރާނަށް ތާއީދުކުރާކަން ކަށަވަރުކޮށްދެއްވާފައެވެ.