އެމެރިކާގެ ޑިޕާޓްމަންޓް އޮފް ޑިފެންސް (ޑީއޯޑީ) އާއެކު އޯޕަންއޭއައި އިން ވެފައިވާ އެއްބަސްވުމަކާ ގުޅިގެން، ޗެޓްޖީޕީޓީ އެޕް ފޯނުން ފޮހެލި (އަންއިންސްޓޯލް) މީހުންގެ އަދަދު ކުއްލިއަކަށް 295 އިންސައްތައަށް އިތުރުވެއްޖެއެވެ.
މާކެޓް އިންޓެލިޖެންސް ފޯރުކޮށްދޭ "ސެންސަރު ޓަވަރު" ގެ ތަފާސްހިސާބުތަކުން ދައްކާގޮތުގައި، މިދިޔަ ފެބްރުއަރީ މަހުގެ 28 ވީ ހޮނިހިރު ދުވަހު މި ބޮޑު ބަދަލު އައީ ޓްރަމްޕްގެ ސަރުކާރުން "ޑިޕާޓްމަންޓް އޮފް ވޯ" ގެ ނަމަށް ރީބްރޭންޑްކޮށްފައިވާ އެމެރިކާގެ ދިފާއީ ވުޒާރާއާއެކު އޯޕަންއޭއައި އިން ގުޅުން ގާއިމްކުރުމާ ގުޅިގެންނެވެ. އާންމުގޮތެއްގައި ޗެޓްޖީޕީޓީ އަންއިންސްޓޯލް ކުރާ ރޭޓަކީ 9 އިންސައްތަ ނަމަވެސް، މި ޚަބަރާއެކު އެ އަދަދު ވަނީ އިންތިހާއަށް މައްޗަށް ގޮސްފައެވެ.
ޗެޓްޖީޕީޓީއާއި، ކްލޯޑް ޑައުންލޯޑް ކުރިމިންވަރު ދައްކައިދޭ ގްރާފެއް ---
މި ހަމަނުޖެހުންތަކުގެ ފައިދާ އެންމެ ބޮޑަށް ކުރަމުންދަނީ އޯޕަންއޭއައިއާ ވާދަވެރި "އެންތްރޮޕިކް" ގެ ކްލޯޑް އެޕަށެވެ. އެމެރިކާގެ ދިފާއީ ވުޒާރާއާއެކު މަސައްކަތްކުރަން އެންތްރޮޕިކް އިން ވަނީ ދެކޮޅު ހަދާފައެވެ.
އެ ކުންފުނިން ބުނިގޮތުގައި އެއްބަސްވުމުގައި ސޮއިނުކުރީ އޭއައި ބޭނުންކޮށްގެން މީހުންނަށް ފާރަވެރިވުމާއި އަދި އަމިއްލައަށް ހަރަކާތްތެރިވާ ނުރައްކާތެރި ހަތިޔާރު އުފެއްދުމަށް ބޭނުންކޮށްފާނެތީ އެކަމުގެ ކަންބޮޑުވުން އޮތުމުންނެވެ.
މި ނިންމުމާއެކު، ކްލޯޑް އެޕް ޑައުންލޯޑް ކުރާ މީހުންގެ އަދަދު ހުކުރު ދުވަހު 37 އިންސައްތަ އަދި ހޮނިހިރު ދުވަހު 51 އިންސައްތަ އިތުރުވިއެވެ. އަދި މާރިޗު 2 ވީ ހޯމަ ދުވަހުގެ ނިޔަލަށް އެމެރިކާގެ އެޕް ސްޓޯރުގެ އެއްވަނަ އެޕްގެ މަގާމުވެސް ކްލޯޑް ވަނީ ހޯދާފައެވެ.
މީގެ އިތުރުން، ޗެޓްޖީޕީޓީއަށް ލިބޭ "1-ސްޓާ" ރިވިއުތައް ހޮނިހިރު ދުވަހު އެކަނިވެސް 775 އިންސައްތަ އިތުރުވެފައިވާކަމަށް ރިޕޯޓްތައް ބުނެއެވެ.
"އެޕްފިގާސް" އާއި "ސިމިލާވެބް" ފަދަ އެހެން އިދާރާތަކުންވެސް ވަނީ މި ހިސާބުތަކަށް ތާއީދުކޮށްފައެވެ. އެމެރިކާގެ އިތުރުން ކެނެޑާ، ޖަރުމަނު އަދި ސްވިޒަލޭންޑް ފަދަ ގައުމުތަކުގައިވެސް މިހާރު އެންމެ ކުރީގައި އުޅެނީ ކްލޯޑް އެޕެވެ.
މި ބަދަލަކީ ޓެކްނޮލޮޖީ ބޭނުންކުރާ ފަރާތްތަކުން އަސްކަރީ ކަންކަމުގައި އޭއައި ބޭނުންކުރުމާ މެދު ހިތްހަމަނުޖެހުން ފާޅުކުރުމުގެ ގޮތުން ނިންމި ނިންމުމެއް ކަމަށް މާހިރުން ލަފާކުރެއެވެ.