މި ރޯދަމަހުގެ ފަހު 10 ގައި ބޭންކް އޮފް މޯލްޑިވްސް (ބީއެމްއެލް) އިން ޚިދުމަތް ދޭނެ ދުވަސްތައް މިއަދު އިއުލާނުކޮށްފިއެވެ.
ބީއެމްއެލްއިން ކުރި އިއުލާނުގައި ބުނީ ރޯދަމަހުގެ ފަހު 10ގައި އެ ބޭންކުގެ ހުރިހާ ޚިދުމަތެއް އޮންލައިންކޮށް ލިބޭނެ ކަމަށެވެ.
ނަމަވެސް ފަހު 10ގައި ބޭންކުގެ ބްރާންޗްތަކުން ޚިދުމަތް ހޯދަން ބޭނުންވާނަމަ މިމަހުގެ 11 އަދި 18 ވަނަ ދުވަހުގެ ހެނދުނު 09:30އިން މެންދުރު 12:30ގެ ނިޔަލަށް ޚިދުމަތް ލިބޭނެ ކަމަށް ބޭންކުން ބުންޏެވެ.
އަދި ޝައްވާލް މަހުގެ ފުރަތަމަ ހަތް ދުވަހުގެ މުއްދަތުގައި ބޭންކުގެ ބްރާންޗްތައް ހުޅުވާނީ ހެނދުނު 09:30އިން މެންދުރު 12:30ގެ ނިޔަލަށް ކަމަށް ބޭންކުން ބުންޏެވެ.
ރޯދަ މަހުގެ ފަހު 10 ފެށޭނީ އަންނަ ހަފުތާގެ ހޯމަ ދުވަހުން ފެށިގެންނެވެ.
ރާއްޖޭގެ ހުރިހާ އަތޮޅެއްގައި ބީއެމްއެލުން ވަނީ ސެލްފް ސާވިސް ބޭންކިން ސެންޓަރުތައް ގާއިމް ކޮށްފައެވެ. އެހެންކަމުން އެ ސެންޓަރުތައް މެދުވެރިކޮށް ފައިސާ ޖަމާކުރުމާއި، ފައިސާ ނެގުމާއި، ފައިސާ ފޮނުވުމުގެ ޚިދުމަތް މެދުކެނޑުމެއް ނެތި ލިބޭނެއެވެ.
އެހެން އަހަރުތަކާ އެއްގޮތަށް، މި ރަމަޟާން މަހުގައި، ސަރުކާރުގެ އޮފީސްތަކާއި ކުންފުނިތަކުގެ މަސައްކަތުގެ ވަގުތުތަކަށް ވެސް ވަނީ ބަދަލު ގެނެސްފައެވެ.