އާބާދީގެ ގޮތުން އެންމެ ކުޑަ އެއް ރަށް ކަމަށްވާ ވ. ރަކީދޫ ކައުންސިލްގެ އިދާރީ މުވައްޒަފުންނާއި ދެ ކައުންސިލް މެންބަރަކު އިސްތިއުފާ ދިނުމާ ގުޅިގެން، ރަކީދޫ ރައްޔިތުންނަށް ދޭންޖެހޭ ޚިދުމަތްތައް ލިބެމުން ނުދާތީ، އެ ރަށު ރައްޔިތުން މިއަދު ނިކުމެ ކައުންސިލް އިދާރާ ބަންދުކޮށްފިއެވެ.
ވ. އަތޮޅު ކައުންސިލުގެ ރައީސް ޝުޖާޢު ޢަލީ 'އެކްސް'ގައި ހިއްސާކުރެއްވި ފޮޓޯތަކުގައިވާ ގޮތުން، ރަކީދޫ ކައުންސިލް އިދާރާގެ ދޮރު ކައިރީ މޭޒުތައް ލައްކޮށް، ހުރީ އިދާރާއަށް ނުވަދެވޭ ގޮތް ހަދައިފައެވެ.
ޝުޖާޢުގެ ޕޯސްޓުގައިވާ ގޮތުން، ރަކީދޫ ކައުންސިލުން ދޭންޖެހޭ އިދާރީ ޚިދުމަތްތައް ލިބެމުން ނުދަނީ، އެ ކައުންސިލުގެ އިދާރީ މުވައްޒަފުން އިސްތިއުފާދިނުމާ ގުޅިގެންނެވެ.
އެހެންވެ، 'ސަން'އިން ސުވާލުކުރުމުން ރަކީދޫ ކައުންސިލުގެ ރައީސް ޢަބްދުالله ރަޝީދު ވިދާޅުވީ، ކައުންސިލު އިދާރާގައި މަސައްކަތްކުރާ އިދާރީ މުވައްޒަފުން އިސްތިއުފާދިންތާ ހަފުތާއެއްވެއްޖެ ކަމަށެވެ.
ޢަބްދުالله ރަޝީދު ވިދާޅުވީ، އިދާރީ ތިން މުވައްޒަފެއްގެ އިތުރުން، ރަކީދޫގެ ދެ ކައުންސިލަރަކުވެސް އިސްތިއުފާދެއްވާފައިވާ ކަމަށެވެ.
"ކައުންސިލުގެ ދެ ބޭފުޅުން، [އޭގެ ތެރޭގައި] ނައިބު ރައީސް [ވެސް] އިސްތިއުފާދެއްވައިފަ ވަޑައިގެންފި. [އަދި އިތުރު] ކައުންސިލު މެންބަރަކު އިސްތިއުފާދެއްވައިފަ ވަޑައިގެންފި. ދެން އިދާރީ މުވައްޒަފުންވެސް އިސްތިއުފާދީފަ ކައުންސިލުން ވަކިވެގެން ހިނގައްޖެ. މިވަގުތު ރަކީދޫ ކައުންސިލުގަ ނެތް އިދާރީގޮތުން ހިންގާނެ އެއްވެސް ފަރާތެއް އިނގޭތޯ،" ޢަބްދުالله ވިދާޅުވިއެވެ.
އޭނާ ވިދާޅުވީ، ކައުންސިލަށް އިދާރީ މުވައްޒަފުން ހޯދަން މަސައްކަތް މިހާރު ކުރަމުންދާ ކަމަށެވެ. އެގޮތުން މުވައްޒަފުން ބޭނުންވާކަން ސިވިލް ސާވިސް ކޮމިޝަން (ސީއެސްސީ)އަށާއި ކައުންސިލުތަކުގެ ބެލެނިވެރި އިދާރާ ލޯކަލް ގަވަމަންޓް އޮތޯރިޓީ (އެލްޖީއޭ)އަށްވެސް އެކަން އަންގާފައިވާނެ ކަމަށް އޭނާ ވިދާޅުވިއެވެ.
ނަމަވެސް ކައުންސިލްތަކުގެ ދައުރު ނިމެން އަހަރެއް ވުމުން، އެލްޖީއޭއާއި ފިނޭންސް މިނިސްޓްރީގެ ހުއްދަލިބިގެން ނޫނީ ކައުންސިލުތަކަށް މުވައްޒަފުން ނުނެގޭ ގޮތަށް ލާމަރުކަޒީ ގާނޫނަށް ގެނައި ބަދަލުގެ ސަބަބުން އިދާރީ މުވައްޒަފުން ނެގުން އޮތީ ހުއްޓިފައިކަން އޭނާ ފާހަގަކުރެއްވިއެވެ. އަދި ސީއެސްސީން ވެސް، އެލްޖީއޭއިން ވެސް އެ ހުއްދަ ނުލިބޭ ކަމަށް، ޢަބްދުالله ވިދާޅުވިއެވެ.
ޢަބްދުالله ވިދާޅުވީ، ރައްޔިތުން ނިކުމެ ކައުންސިލު އިދާރާ ބަންދުކުރީ މިއަދު ހެނދުނު 11:30ގެ ފަހުން ކަމަށެވެ.
ގާތްގަނޑަކަށް 360 މީހުންގެ އާބާދީއެއް އޮންނަ ރަކީދޫގައި މިހާރު އުޅެމުން ދަނީ 61 މީހުންނެވެ.
ފާހަގަކުރެވޭ ގޮތުގައި މިދިޔަ ސެޕްޓެންބަރު މަހު ރައީސް ޑރ. މުޙައްމަދު މުޢިއްޒު ރަކީދުއަށް ކުރެއްވި ދަތުރުފުޅުގައި އެ ރަށު ރައްޔިތުންނާ ވަނީ ބައްދަލުކުރައްވައިފައެވެ. އެ ބައްދަލުވުމުގައި ބައިވެރިވި މީހުންގެ ތެރެއިން ޚިޔާލުފާޅުކުރި ގިނަ މީހުން ބޭނުންވަނީ އެހެން ރަށަކަށް ހިޖުރަކުރުމަށް ކަމަށް އެ ބައްދަލުވުމުގައި ވަނީ ހާމަކޮށްފައެވެ.
އެކަމަކު ޢަބްދުالله މިއަދު ވިދާޅުވީ، ރަކީދޫގެ ގިނަ ރައްޔިތުން އެހެން ރަށަކަށް ހިޖުރަކުރަން ބޭނުންނުވާ ކަމަށެވެ.
ރަކީދޫގެ ގިނަ ރައްޔިތުން މިހާރު ވެސް ދިރިއުޅެނީ އެ ރަށުން ބޭރުގައެވެ.