ސްޕެއިންގެ ބާސެލޯނާގައި މިހާރު ކުރިއަށްދާ މޮބައިލް ވޯލްޑް ކޮންގްރެސް (އެމްޑަބްލިއުސީ) 2026 ގައި މޮޓޯރޯލާ އިން އެ ކުންފުނީގެ އެންމެ ފުރަތަމަ "ބުކް-ސްޓައިލް" ފޯލްޑަބަލް ފޯނު ކަމަށްވާ "މޮޓޯރޯލާ ރޭޒާ ފޯލްޑް" އާއި "މޮޓޯރޯލާ އެޖް 70 ފިއުޝަން" ރަސްމީކޮށް މިއަދު ވަނީ އިފްތިތާހުކޮށްފައެވެ.
މޮޓޯރޯލާ ރޭޒާ ފޯލްޑަކީ ފޮތެއްހެން ހުޅުވާލެވޭ ގޮތަށް ފަރުމާކޮށްފައިވާ ފޯނެއް ކަމަށްވާއިރު، މިއީ ހުޅުވާލައިގެން ހުންނައިރު އެންމެ 4.6 މިލިމީޓަރު އަދި ލައްޕާލާފައި އޮންނައިރު 9.9 މިލިމީޓަރުގެ ތުނިމިނެއް ހުންނަ ފޯނެކެވެ.
މި ފޯނުގައި ބޭނުންކޮށްފައިވަނީ އެންމެ ފަހުގެ ވަރުގަދަ ސްނެޕްޑްރަގަން 8 ޖެން 5 ޗިޕްސެޓް ކަމަށްވާއިރު، މީގައި 8.1 އިންޗީގެ ބޮޑު އެތެރޭ ސްކްރީނަކާއި 6.6 އިންޗީގެ ބޭރު ސްކްރީނެއް ހިމަނާފައިވެއެވެ.
ފޯނުގެ ބާރުގަދަކުރުމަށް 16 ޖީބީގެ ރޭމް އާއި 1 ޓީބީގެ ސްޓޯރޭޖް ހިމެނޭއިރު، 6,000 މިލީއެމްޕަޔާގެ ބޮޑު ބެޓެރީއެއް ހިމެނޭ މި ފޯނަށް ހަތް އަހަރުގެ އެންޑްރޮއިޑް އަޕްޑޭޓް ލިބޭނެ ކަމުގެ ޔަގީންކަން މޮޓޯރޯލާ އިން ވަނީ ދީފައެވެ.
މޮޓޯރޯލާ ރޭޒާ ފޯލްޑަކީ ފޮތެއްހެން ހުޅުވާލެވޭ ގޮތަށް ފަރުމާކޮށްފައިވާ ފޯނެއް ----
ކެމެރާ ސިސްޓަމަށް ބަލާއިރު ފޯނުގެ ފަހަތުގައި 50 މެގަޕިކްސެލްގެ ތިން ކެމެރާ ހިމެނޭއިރު، އޭގެ ތެރޭގައި ސޮނީ ލައިޓިއާ މައި ސެންސަރާއި 3 އެކްސް އޮޕްޓިކަލް ޒޫމް ލިބޭ ޕެރިސްކޯޕް ކެމެރާއެއް ހިމެނެއެވެ.
ޔޫރަޕްގެ ބާޒާރުގައި 1,999 ޔޫރޯ (ގާތްގަނޑަކަށް 34,000 ރުފިޔާ) އަށް މި ފޯނު ވިއްކަން ނިންމާފައިވާއިރު، މޮޓޯރޯލާ އިން ވަނީ ފީފާ ވޯލްޑް ކަޕް 2026 އަށް ހާއްސަކޮށްގެން 24 ކެރަޓްގެ ރަން ޖަހާފައިވާ މޮޑެލްއެއްވެސް ތައާރަފްކޮށްފައެވެ.
މީގެ އިތުރުން މިއަދު ދައްކާލި މޮޓޯރޯލާ އެޖް 70 ފިއުޝަންގައި ހިމެނެނީ ސްނެޕްޑްރަގަން 7 އެސް ޖެން 3 ޗިޕްސެޓާއި 5,200 މިލީއެމްޕަޔާގެ ބެޓެރީއެއް ކަމަށާއި، މި ފޯނަކީ ފެނާއި ހިރަފުހުން ރައްކާތެރިވުމުގެ އައިޕީ 69 ރޭޓިންގް ލިބިފައިވާ ފޯނެކެވެ.
މި ފޯނުގައި 6.8 އިންޗީގެ އަމޯލެޑް ޑިސްޕްލޭއެއް ހިމެނޭއިރު، ފަހަތުގައި 50 މެގަޕިކްސެލްގެ މައި ކެމެރާއެއް ވަނީ ހަރުކޮށްފައެވެ.
މި ދެ ފޯނުވެސް ކުރިއަށް އޮތް މަސްތަކުގެ ތެރޭގައި ދުނިޔޭގެ އެކި ބާޒާރުތަކަށް ނެރުމަށް މޮޓޯރޯލާ އިން ވަނީ ނިންމާފައެވެ.