މި ރަމަޟާން މަހުވެސް ފަސޭހަކަމާއެކު ދިރާގުޕޭ މެދުވެރިކޮށް ފިޠުރު ޒަކާތް ދެއްކޭނެ ކަމަށް، ދިރާގުން ބުނެފިއެވެ.
ދިރާގު ޕޭ އެޕްލިކޭޝަން މެދުވެރިކޮށް ފިޠުރު ޒަކާތް ދައްކަން ބޭނުން ނަމަ، ފުރަތަމަ ޖެހޭނީ އެޕަލް އެޕް ސްޓޯ ނުވަތަ ގޫގަލް ޕްލޭ ސްޓޯއިން 'ދިރާގު ޕޭ' އެޕްލިކޭޝަން ޑައުންލޯޑުކޮށްލާށެވެ.
އެއަށްފަހު އެޕްލިކޭޝަން ހުޅުވާލުމުން، ކަނާތު ފަޅީގެ އެންމެ ތިރީ ކަނުގައި 'ފީޗާޑް' ކިޔާ ޓެބެއް ފެންނާނެއެވެ. އެ ޓެބަށް ދިއުމުން 'ގިފްޓް އެންޑް ޑޮނޭޝަންސް'ގެ ދަށުން ފިޠުރު ޒަކާތް ދައްކަން އިޚްތިޔާރުކުރެވޭނެއެވެ. އިޚްތިޔާރުކުރުމަށްފަހު، މައުލޫމާތު ފުރިހަމަކޮށް، ޒަކާތް ދެއްކުމުން ނިމުނީއެވެ.
ދިރާގުން ބުނީ، ދިރާގު ޕޭ އެޕްލިކޭޝަންގެ އިތުރުން ދިރާގުގެ މޯބައިލް އެޕްލިކޭޝަން މެދުވެރިކޮށް، ނުވަތަ ޕްރިޕެއިޑް ކަސްޓަމަރުން ނަމަ *454# އަށް ޑައަލްކޮށްގެން ކަސްޓަމަރުންގެ ބެލެންސްގެ ބޭނުންކޮށްގެންވެސް ފިޠުރު ޒަކާތް ދެއްކޭނެ ކަމަށެވެ.
ދިރާގު މެދުވެރިކޮށް ރަމަޟާން މަހުގެ އެންމެ ފަހު ދުވަހުގެ އިރުއޮއްސި ހައެއް ޖެހުމާ ހަމައަށް ފިޠުރު ޒަކާތް ދެއްކޭނެ ކަމަށްވެސް، ދިރާގުން ބުންޏެވެ.
ޒަކާތު ހައުސްއިން ހާމަކޮށްފައިވާ ގޮތުގައި، ރަމަޟާން މަހު ހަތް ޕްލެޓްފޯމަކުން އޮންލައިންކޮށް ފިޠުރު ޒަކާތް ބަލައިގަންނާނެއެވެ. އަދި އޮންލައިންކޮށް ޒަކާތް ނުދެއްކޭ މީހުންނަށާއި އުމުރުން ދުވަސްވީ މީހުންނަށް ނަގުދު ފައިސާއިން ޒަކާތް ދެއްކޭ ގޮތްވެސް ވަނީ ހަމަޖައްސައިދީފައެވެ.
ފިޠުރު ޒަކާތަކީ ކޮންމެ މުސްލިމެއްގެ މައްޗަށް ދެއްކުން ވާޖިބުވެގެންވާ ކަމެކެވެ. ފިޠުރު ޒަކާތް ދައްކަން ޖެހެނީ އެ ބަޔަކު އާންމުކޮށް ކައިއުޅޭ ގޮވާމުގެ ބާވަތަކުންނެވެ. އޭގެ މިންވަރަކީ ޞާޢެއް ނުވަތަ ދެއަތް ގޮށިން ނެގޭ މިންވަރެވެ.