އެމެރިކާ އިސްވެ އީރާނަށް ދެމުން އަންނަ ހަމަލާތަކާ ގުޅިގެން، އީރާނުގެ މިސައިލް ހަމަލަތައް އަމާޒުވަމުން އަންނަ އެމެރިކާގެ އަސްކަރީ މަރުކަޒުތައް ހުރި އަރަބި އިސްލާމީ ގައުމުތަކުގެ ވެރިންނާ ފޯނުން ގުޅުއްވައި، އެ ގައުމުތަކަށް ކުރިމަތިވެފައިވާ ނުރައްކަލުގެ މި ހާލަތުގައި ރާއްޖެ އޮތީ އެ ގައުމުތަކާ އެކުކަން ހާމަކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު ވިދާޅުވެއްޖެއެވެ.
މިދިޔަ މަހު އިއްވެވި ރިޔާސީ ބަޔާނުގައި ރައީސް ޑރ. މުޙައްމަދު މުއިއްޒު، ކޮންމެ ހޯމަ ދުވަހަކު ނޫސްވެރިންނާ ބައްދަލުކުރައްވަން ވައުދުވެވަޑައިގެންނެވިއިރު، މިއަދު ވަނީ ފުރަތަމަ ބައްދަލުވުން ބާއްވަވައިފައެވެ.
މި ބައްދަލުވުމުގައި ވާހަކަފުޅުދައްކަަވަމުން، މިހާރު މެދުއިރުމަތީގެ ހާލަތު އޮތް ގޮތުން، އަރަބި އިސްލާމީ ގައުމުތަކާއެކު ރާއްޖޭން އޮތްކަން ވެސް ހާމަކުރައްވަމުން ގެންދަވާކަމަށް ރައީސް ފާހަގަކުރެއްވިއެވެ.
އެގޮތުން މި ހަނގުރާމައިގެ ނުރައްކާ އޮތް އަރަބި ގައުމުތަކުގެ ލީޑަރުންނާ ގުޅުއްވައި ރާއްޖޭގެ ތާއީދާއި އެއްބާރުލުން އެ ގައުމުތަކަށް އޮތްކަން ހާމަކުރެއްވުމުގެ މަސައްކަތްޕުޅު ކުރިއަށްދާ ކަމަށް ވިދާޅުވިއެވެ. އެގޮތުން، ޔޫއޭއީގެ ރައީސާ އިއްޔެ ފޯނުން ގުޅުއްވައި، އެ ގައުމާއެކު ރާއްޖެ އޮތްކަން ހާމަކުރައްވާފައިވާނެ ކަމަށް ރައީސް ވިދާޅުވިއެވެ.
މީގެއިތުރުން، މިއަދު ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނާ ފޯނުން ގުޅުއްވުމަށް ހަމަޖެހިފައިވާ ކަމަށް ރައީސް ފާހަގަކުރެއްވިއެވެ. އަދި ހަމައެހެންމެ، ބަހްރެއިން އަދި ގަތަރުގެ އިސްވެރިންނާ ވެސް މިއަދު ގުޅުއްވައި، އެ ގައުމުތަކާ އެކު ރާއްޖެއިން އޮތްކަން ފާހަގަކުރައްވާނެ ކަމަށް ރައީސް ޑރ. މުއިއްޒު ވިދާޅުވިއެވެ.
ރައީސް ވިދާޅުވީ ކުށްވެރިކުރައްވަނީ އީރާނުގެ ހަމަލަތައް އެކަނި ނޫން ކަމަށެވެ.
"އީރާން އެކަންޏެއް ނޫން، އެމެރިކާއިން ވެސް އީރާނުން ވެސް، އިޒްރޭލުން ވެސް، ހުރިހާ، އެ ތިން ގައުމުން އެ ދޭ ހުރިހާ ހަމަލާ އެއްވެސް ދިވެހި ސަރުކާރުން ކުށްވެރިކުރަން،" ރައީސް ވިދާޅުވިއެވެ.
ހަނގުރާމަ ހުއްޓައިލަން ރާއްޖެއިން ގޮވައިލާކަމަށް ވެސް ރައީސް ވިދާޅުވިއެވެ.
އެމެރިކާ އިސްވެ، އިސްރާއިލާ ގުޅިގެން އީރާނަށް ދެމުން އަންނަ ހަމަލަތަކާ ގުޅިގެން، އީރާނުން ގެންދަނީ، ސައުދީ، ގަތަރު، ޔޫއޭއީ، ބަހްރެއިންގައި ހުރި އެމެރިކާގެ މަސްލަހަތު އޮތް އެ ގައުމުގެ އަސްކަރީ މަރުކަޒުތަކަށް ހަމަލަ ރައްދުކުރަމުންނެވެ.
އެއާއެކު އެ ގައުމުތަކުންވަނީ އެ ގައުމުތަކަށް އީރާނުން އަމާޒުކުރަމުން އަންނަ ހަމަލަތައް ކުށްވެރިކުރަމުންނެވެ.