މަޝްހޫރު ސިލްސިލާ "ދަ ވަޔަ" އަދި "ލޯ އެންޑް އޯޑަ: ސްޕެޝަލް ވިކްޓިމްސް ޔުނިޓް" އިން ފެނިގެން ގޮސްފައިވާ އެކްޓަރު ބޮބީ ޖޭ ބްރައުން، ކޮށާރެއްގައި ހިނގި އަލިފާނުގެ ހާދިސާއެއްގައި މަރުވެފައިވާ ކަމަށް އެމެރިކާގެ މީޑިއާތަކުން ރިޕޯޓްކޮށްފިއެވެ.
އެމެރިކާގެ މުނިފޫހިފިލުވުމުގެ ޚަބަރުތައް ގެނެސްދޭ "ޓީއެމްޒެޑް"އިން ރިޕޯޓްކޮށްފައިވާ ގޮތުގައި، ޕްރޮފެޝަނަލް ބޮކްސިން ތެޅުންތެރިއެއް ވެސް ކަމަށްވާ ބްރައުން މަރުވީ ދުމުގެ އަސަރު މާބޮޑަށް ހަށިގަނޑަށް ކުރުމުގެ ސަބަބުން ކަމަށެވެ.
މެރީލޭންޑްގެ ޗީފް މެޑިކަލް އެގްޒެމިނަގެ އޮފީހުން ބްރައުން ނިޔާވި ސަބަބެއް ކަމަށް ކަނޑައަޅާފައިވަނީ ހަށިގަނޑު ފިހުމާއި ދުމުގެ އަސަރު ކުރުމެވެ. އަދި މިއީ އިއްތިފާގުން ހިނގި ހާދިސާއެއްގެ ގޮތުގައި ވަނީ ނިންމާފައެވެ.
އެކްޓަރު ބޮބީ ޖޭ ބްރައުން "ދަ ވަޔަ"ގެ މަންޒަރެއްގައި--ފޮޓޯ/ޓެލެގްރާފްއިންޑިއާ
މި ހާދިސާ ހިނގަން މެދުވެރިވި ގޮތާ ބެހޭގޮތުން ލިބިފައިވާ މައުލޫމާތަށް ބަލާއިރު، ބްރައުން ކޮށާރަށް ވަނީ އުޅަނދެއް ސްޓާޓް ކުރުމަށެވެ. އެތަނުގައި އަލިފާން ރޯވުމާއެކު، އަލިފާން ނިއްވާ ފުޅިއެއް ގެނެސްދިނުމަށް އެދި އޭނާ އާއިލާގެ މެންބަރަކަށް ގުޅިއެވެ.
ނަމަވެސް، އާއިލާގެ މީހުން އެ ސަރަހައްދަށް ދިޔައިރު މުޅި ކޮށާރުގައި ވަނީ ބޮޑަށް އަލިފާން ހިފާފައެވެ. ބްރައުން ސަލާމަތް ކުރަން އުޅުމުގެ ތެރޭގައި އޭނާގެ އަނބިމީހާގެ ހަށިގަނޑުން ވެސް ބައެއް ތަންތަން ވަނީ ވަރަށް ބޮޑަށް ފިހިފައެވެ.
ބްރައުންގެ އޭޖެންޓް އަލްބާޓް ބްރަމަންޓޭ ނެރުނު ބަޔާނެއްގައި ބުނެފައިވަނީ، އުމުރުން 62 އަހަރުގެ އެކްޓަރު ބްރައުންގެ ވަކިވުމުގެ ސަބަބުން ވަރަށް ބޮޑު ހިތާމައެއް އެ އާއިލާއަށާއި ބްރައުންގެ ސަޕޯޓަރުންނަށް ވަނީ ލިބިފައެވެ.
އޭނާއަކީ އެކްޓިންގެ މަސައްކަތަށް ނުހަނު ލޯބިކުރި، އަދި އެކުގައި މަސައްކަތް ކުރަން ފަސޭހަ، ހިތްހެޔޮ މީހެއްގެ ގޮތުގައި ބްރައުންގެ އޭޖެންޓް ބްރަމަންޓޭއިން ނެރުނު ބަޔާނުގައި ވަނީ ފާހަގަކޮށްފައެވެ.