ދިވެހި ރާއްޖޭގެ ތާރީޚު ދިރާސާކުރެއްވި، ފްރާންސްގެ ދަރިކޮޅަށް ނިސްބަތްވާ އަބްދުލްޢަޒީޒު އިބްރާހީމް (ދޮންމަނިކުބެ) ނިޔާވެއްޖެއެވެ.
ދޮންމަނިކުބެއަކީ ވަރަށް އާބާދީ މަދު, އދ. ދިއްދޫގައި ފުރަތަމަ ވަޒަންވެރިވި ފްރާންސަށް ނިސްބަތްވާ ޖޯސަޕްގެ، ދޮންތަކުރުގެ، މުޙައްމަދުގެ، އިބްރާހީމްގެ އަބްދުލްޢަޒީޒް އިބްރާހީމެވެ.
އދ. ދިއްދޫ، ބާދޭސަބާ، އަބްދުލްޢަޒީޒު އިބްރާހީމް ނުވަތަ އާންމު ނަމުންނަމަ (ދޮންމަނިކުބެ) ވަނީ ދިވެހި ދައުލަތަށް 39 އަހަރު ޚިދުމަތް ކުރައްވާފައެވެ. މީގެ ތެރޭގައި ދިއްދޫ ކުޑަ ކަތީބުކަމާއި ބޮޑު ކަތީބުކަމުގެ އިތުރަށް އޭނާ ވަނީ ދިއްދޫ މަދަރުސާގައި ޤުރުއާން އަދި އިސްލާމް މުދައްރިއްސެއްގެ މަޤާމުވެސް އަދާ ކުރައްވައިފައެވެ.
ދޮންމަނިކުބޭ ވަނީ ދިވެހި ތާރީޚު ދިރާސާކޮށް، އޭގެ މައްޗަށް އަލިއަޅުވާލާ ދެ ފޮތެއްވެސް ލިޔުއްވާފައެވެ. އެގޮތުން "ހޯދި ހޯދުންތަކާއި އަމިއްލަ ތަޖުރިބާ"ގެ އިތުރުން "ކުރީގެ ބައެއް އާދަކާދަތައް" އޭނާ ވަނީ ލިޔުއްވާފައެވެ. އަދި އޭނާ ވަނީ މި ފޮތްތައް އެކި ފަރާތްތަކަށް ހަދިޔާކުރައްވާފައެވެ.
ސަން އަށް މައުލޫމާތު ދެއްވަމުން ދިއްދޫ ކައުންސިލްގެ ކުރީގެ ރައީސް އަޙްމަދު މުޙައްމަދު ވިދާޅުވީ، ތާރީޚުގެ ފޮތްތަކުގެ އިތުރުން، ނެތެމުންދާ އާދަކާދަތައް އަންނަށް އޮތް ޖީލަށް ގެނެސްދިނުމަށް ދޮންމަނިކުބެ މަސައްކަތް ކުރައްވަމުން ގެންދެވި ކަމަށެވެ.
ދޮންމަނިކުބޭގެ މައްޗަށް ކަށުނަމާދު ކޮށްފައިވަނީ މިއަދު މެންދުރު ނަމާދަށްފަހު، މާލޭ އާސަހަރާ މިސްކިތުގައެވެ. އޭނާ ނިޔާވިއިރު އުމުރަކީ 78 އަހަރެވެ.