އޭނާގެ އަބުރު ކަތިލައި، މަގާމުން ވަކިކުރީ މުވައްޒަފަކަށް ފިޔަވަޅު އެޅުމުން ކަމަށް ޖިންސީ ފުރައްސާރައިގެ ތުހުމަތުގައި އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ވެރިޔާގެ މަގާމުން ވަކިކުރި އިސްމާއިލް ސާޖިދު މިއަދު ވިދާޅުވެއްޖެއެވެ.
ޖިންސީ ފުރައްސާރައިގެ މައްސަލައެއް ސާބިތުވެ، ސާޖިދު އެފްއައިޔޫއިން ވަކިކުރީ، މިދިޔަ ބުރާސްފަތި ދުވަހެވެ. އޭރު ވެސް އޭނާ ހުރީ، ޖިންސީ ފުރައްސާރައިގެ ތުހުމަތުގައި ސަސްޕެންޝަނުގައެވެ.
އޭގެފަހުން މިއަދު ސާޖިދު ނެރުނު ބަޔާނެއްގައި ވަނީ، ޖިންސީ ފުރައްސާރައިގެ ތުހުމަތު ސާބިތުވާ ކަމަށް މައްސަލަ ބެލި އެމްއެމްއޭގެ ކޮމިޓީން ނިންމާފައި ވަނީ، މައްސަލަ ހުށަހެޅި ފަރާތުން ކަނޑައެޅިގެން ދޮގުތަކެއް ހަދާފައިވަނިކޮށް ކަމަށް ތުހުމަތުކޮށްފައެވެ.
އެ ދޮގުތައް ސާބިތުކުރެވޭ މިންވަރަށް ކޮމިޓީއަށް ކިތާބީ ހެކި ހުށަހަޅާފައިވީ ނަމަވެސް، މައްސަލަ ނިންމާފައި ވަނީ، އެ ހެކިތަކަށް އެއްވެސް މިންވަރަކަށް ބެލުމެއް ނެތި ކަމަށް އޭނާ ތުހުމަތުކުރެއްވިއެވެ.
އެ މައްސަލަ ހުށަހެޅި މަގުސަދާމެދު ސުވާލު އުފެދޭ ހާލަތްތަކެއް ހުށަހަޅާފައިވާ ކަމަށް އޭނާ ވިދާޅުވިއެވެ. މިގޮތުން، އޭނާ މަގާމުން ވަކިކުރީ އެފްއައިޔޫގެ މުވައްޒަފެއްގެ ހައިސިއްޔަތުން ކޮށްގެން ނުވާނެ ބައެއް ކަންކަން މުވައްޒަފަކު ކޮށްފައިވާތީ، އޭނާއަށް ފިޔަވަޅު އެޅުމުން ކަމަށް ސާޖިދު ވަނީ ވިދާޅުވެފައެވެ.
"ފައިނޭންޝަލް އިންޓެލިޖެންސް ޔުނިޓުގެ މުވައްޒަފެއްގެ ހައިސިއްޔަތުން އެ މުވައްޒަފު ކޮށްގެން ނުވާނެ ބައެއް ކަންކަން އެ މުވައްޒަފު ކުރުމުން އެ މުވައްޒަފާމެދު ޢަމަލުކުރަންޖެހޭ ގޮތަށް ޢަމަލުކުރުމަކީ މިއަދު މި އަނިޔާ ލިބުމުގެ އެއް އަސާސް ކަމަށް އަޅުގަނޑަށް ބެލެވޭ," ސާޖިދު ވިދާޅުވިއެވެ.
އޭގެއިތުރަށް، ފުރައްސާރަ ކުރި ކަމަށް ހުށަހަޅާފައިވާ މައްސަލާގައި ބުނާ ކަންކަން ހިނގި ދުވަސްތަކާއި މައްސަލަ ހުށަހެޅި ދުވަހާ ދެމެދު 39 ދުވަސް ހިނގާފައިވާ ކަން އޭނާ ފާހަގަކުރެއްވިއެވެ.
އެ މުއްދަތުތަކުގެ ތެރޭގައި ހިނގާފައިވާ ކަންކަން އިދާރާގެ ލިޔެކިޔުންތަކުންނާއި އެހެނިހެން ކިތާބީ ހެކިތަކުން އެނގެން އެބަހުރި ކަމަށް ސާޖިދު ވިދަޅުވިއެވެ.
އެފްއައިޔޫގެ ހެޑްކަމުން ވަކިކުރި އިސްމާއީލް ސާޖިދު: އޭނާ ވަކި ކުރީ ޖިންސީ ފުރައްސާރައިގެ ތުހުމަތުގައި: ފޮޓޯ: ސާޖިދު ފޭސްބުކް
އެމްއެމްއޭގެ ޖިންސީ ފުރައްސާރަކުރާ ކޮމިޓީން އެ ކަންކަން ރަނގަޅަށް ބެލިނަމަ، މައްސަލަ ހުށަހެޅުމުގެ ފަހަތުގައިވާ މަގުސަދު ސާފުވާނެ ކަމަށް އެ ބަޔާނުގައިވެއެވެ.
މޯލްޑިވްސް މަނިޓަރީ އޮތޯރިޓީގެ ޖިންސީ ފުރައްސާރަކުރާ ކޮމިޓީގެ އެ ނިންމުމުގެ ސަބަބުން، އެ އޮތޯރިޓީގައި މަސައްކަތްކުރާ ވެރިންނާމެދު ހިތްހަމަ ނުޖެހޭ މީހުންނަށް، ފުރައްސާރައިގެ މައްސަލައެއް އުފައްދައި، އެމީހަކުގެ މަގާމު ގެއްލުވާލުމުގެ ފުރުޞަތު އެބައޮތްއިސްމާއިލް ސާޖިދު
އިތުރަށް އޭނާ ވިދާޅުވީ، މި މައްސަލައިގެ އެއްވެސް ތަފްޞީލެއް ނުލިބެނީސް މިކަމުގެ މަޢުލޫމާތުތަކެއް އެމްއެމްއޭގެ މުވައްޒަފެއް ދިން ކަމަށް މީޑިއާ ރިޕޯޓުތަކަށް ބެލުމުން އެނގޭ ކަމަށެވެ. ނަމަވެސް، އެފަދަ އެއްވެސް މަޢުލޫމާތެއް މިހާތަނަށް އެއްވެސް މީޑިއާއަކަށް އޭނާ ދީފައެއް ނުވާނެ ކަމަށް ވަނީ ވިދާޅުވެފައެވެ.
އެ ކަމުން ދޭހަވަނީ ޝަކުވާ ކޮމިޓީ އާއި އެމްއެމްއޭގެ މުވައްޒަފުންގެ މަޢުލޫމާތު ރައްކާތެރިކުރުމަށް ފިޔަވަޅު އެޅޭނެ ހަރުދަނާ އުޞޫލުތަކެއް ނެތްކަން، ނުވަތަ އޭނާގެ އަބުރު ކަތިލައި މައްސަލައަށް ނުފޫޒުތަކެއް ފޯރުވަން އުޅުނުކަން ކަމަށް އޭނާ ތުހުމަތުކުރެއްވިއެވެ.
"އަޅުގަނޑު ފައިނޭންޝަލް އިންޓެލިޖެންސް ޔުނިޓުގެ ވެރިޔަކަށް ހުރުމުން އުނދަގޫވާ ފަރާތެއް ހުރިނަމަ، ނުވަތަ ދަތިތަކެއް ކުރިމަތިވާނަމަ، ވަޒީފާއިން ވަކިވާން އަޅުގަނޑުގެ ކައިރީގައި ސީދާ ބުނި ނަމަ، ރީތިކޮށް މިކަން ކުރެވުނީހެވެ. ކޮންމެހެން މީހެއްގެ އަބުރު ކަތިލުމުގެ އެއްވެސް ބޭނުމެއް ނެތް," ސާޖިދު ވިދާޅުވިއެވެ.
އޭގެއިތުރަށް، މި މައްސަލައިގައި އަޅާފައިވަނީ ޤާނޫނީ ހަމައިގެ މަތިން އަޅާފައިވާ ފިޔަވަޅެއް ނޫންކަން ތަފުސީލު ބެލި ކޮންމެ މީހަކަށްވެސް އެނގޭނެ ކަމަށް ސާޖިދު ގަބޫލުކުރައްވައެވެ.
މިދިޔަ އޮގަސްޓު މަހު ސާޖިދު އެފްއައިޔޫގެ ވެރިއަކަށް އައްޔަން ކުރެއްވީ, ސަރުކާރު ހިންގާ ޕީއެންސީގެ ޕާލަމެންޓްރީ ގުރޫޕުގެ ސީނިއާ ޑެޕިއުޓީ ލީޑަރު, އިބްރާހީމް ޝުޖާއު (ޝުޖާ)އަށް ތުހުމަތަކެއް ކުރެވޭ, ފައިނޭންޝިއަލް އިންޓެލިޖެންސް ރިޕޯޓެއް ލީކް ވެފައި ވަނިކޮށް, އެފްއައިޔޫގެ އޭރުގެ ވެރިއަކަށް ހުންނެވި އަބްދުﷲ އަޝްރަފް, މަގާމުން ދުރުކޮށްފައެވެ.
އަޝްރަފު ފަހުން ވަނީ ހެޑް އޮފް ރިސްކް އެންޑް ކޮމްޕަޔަލަންސަށް ބަދަލުކޮށްފައެވެ.
އެފްއައިޔޫއަކީ ބޭންކްތަކުގެ ތެރޭގައި ހިންގާ މާލީ އެކިއެކި މުއާމަލާތްތަކަށް ފާރަވެރިވެ, ޝައްކު ކުރެވޭ މުއާމަލާތްތަކުގެ މައްސަލަތައް ބަލަން ކަމާ ބެހޭ އިދާރާތަކަށް އަންގާ މުހިންމު އިދާރާއެކެވެ. އޭގެ ތެރޭގައި ކޮރަޕްޝަނާއި މަނީލޯންޑަރިންނާއި އެކިއެކި ކުށްކޮށްގެން ހޯދާ ފައިސާގެ މައްސަލަތައް ބެލުން ހިމެނެއެވެ.