މިހާރު ހިނގަމުން މިދާ ރައީސް ޑރ. މުޙައްމަދު މުއިއްޒުގެ ފަސް އަހަރުގެ ދައުރު ވާނީ، ރާއްޖޭގެ ތާރީޚުގައި އެންމެ ގިނަ ކާމިޔާބީތައް ލިބޭ އަދި އެންމެ ބޮޑު ފައިދާ ގައުމަށް ހޯދައިދޭ ފަސް އަހަރަށް ކަމަށް ވެރިކަންކުރާ ޕީއެންސީގެ ޕީޖީ ލީޑަރު އިބްރާހީމް ފަލާހު މިރޭ ވިދާޅުވެއްޖެއެވެ.
އަންނަ އޭޕްރިލް މަހުގެ ހަތަރު ވަނަ ދުވަހު ބާއްވާ ލޯކަލް ކައުންސިލް އިންތިޚާބަށް ޕީއެންސީން ވަނީ މިރޭ ފުވައްމުލަކު ސިޓީގައި ކެމްޕެއިން އިފުތިތާހުކޮށްފައެވެ.
އެ ކެމްޕެއިން ފެށުމަށް ބޭއްވި ޖަލްސާގައި، ޕީއެންސީއަކީ ރާއްޖޭގައި އޮތް އެންމެ މެމްބަރުން ގިނަ ޕާޓީކަން ފާހަގަކުރައްވައި ފަލާހު ވިދާޅުވީ، އެ ޕާޓީއަކީ ކުރިއަށްއޮތް ލޯކަލް ކައުންސިލް އިންތިޚާބުގައި ރައްޔިތުންނަށް ޚިދުމަތް ކުރުމަށް އެންމެ ގާބިލް ކެންޑިޑޭޓުން ނެރެފައިވާ ޕާޓީ ކަމަށް ގަބޫލުކުރައްވާ ކަމަށެވެ.
އޭނާ ވަނީ ނިމިދިޔަ ސަރުކާރުގައި އެމްޑީޕީގެ ކައުންސިލްތައް ގާއިމުކޮށްފައި ހުރި ރަށްތަކުގައި، ދައުލަތުގެ މާލިއްޔަތުން ބޮޑެތި ޚަރަދުކޮށްގެން ފަށާފައިވާ މަޝްރޫއުތައް ކައުންސިލުގެ ޒިންމާދާރުކަން ކުޑަވުމުގެ ސަބަބުން ފަރުވާކުޑަކޮށް ހިންގިފައިވާ ކަމަށް ތުހުމަތު ކުރައްވައިފައެވެ.
ރ. އަތޮޅުގެ ވަރަށް ގިނަ ރަށްރަށުގައި ގާއިމްކުރެވިފައިހުރި ފެނާއި ނަރުދަމާގެ ނިޒާމުތައް ހުރީ ގާއިމުކޮށް އޭގެ ޚިދުމަތް ރައްޔިތުންނަށް ދިނުމުގެ ކުރީން އެ ހޮޅިތަކާއި ނަރުތަކާ ހުރިހާ އެއްޗެއް ފީވެ އަޅިއަށްވެފައި. މިއިން އެނގެނީ ޒިންމާދާރު ނޫން ސަރުކާރާ ގުޅުންނެތް ނުވަތަ ރައްޔިތުންދެކެ ލޯބިނުވާ ރައްޔިތުންގެ މާލިއްޔަތަށް ބެލުމެއްނެތް ކުރާނޭ ގޮތަކަށް ކަންކަންކުރާ ކައުންސިލަރުން ހޮވުނީމާ ވާނޭ ގޮތް.ޕީއެންސީގެ ޕީޖީ ލީޑަރު އިބްރާހީމް ފަލާޙް
ފަލާހު ވިދާޅުވީ މި ސަރުކާރަކީ ކަންކަން ޕްލޭންކޮށް، އެ ކަންކަން ކުރާނޭ ބަޖެޓު ހޯދައިގެން ކަންކަން ކުރާ ސަރުކާރެއް ކަމަށެވެ. އޭނާ ވަނީ މި ސަރުކާރުން ވެރިކަމާ ހަވާލުވިއިރު ދައުލަތުން ފަށާފައިވާ އެއްވެސް މަޝްރޫއަކަށް އެކަން ކުރެވޭ ވަރަށް ބަޖެޓު ހަމަޖައްސާފައި ނުވާކަމަށް ވިދާޅުވެފައެވެ.
އޭނާ ވަނީ މި ސަރުކާރުން ފުވައްމުލަކުގައި ފަށާފައިވާ މަޝްރޫތައް ބާރު ސްޕީޑުގައި ކުރިއަށްގެންގޮސް ނިންމާލާނޭ ކަމުގެ ޔަގީންކަން ފުވައްމުލަކުގެ ރައްޔިތުންނަށް އަރުވާފައެވެ.
ފަލާހު ވިދާޅުވީ ރައީސްގެ ފަސް އަހަރު ނިމޭއިރު މި ފަސް އަހަރު ވާނީ ރާއްޖޭގެ ތާރީޚުގައާއި ވެރިއެއްގެ ޒައާމަތުގައި އެންމެ ގިނަ ކާމިޔާބީތައް އަދި އެންމެ ބޮޑު ފައިދާއެއް މި ގައުމަށް ވާނެ ފަސް އަހަރަށް ކަމަށެވެ. އަދި އެކަމުގެ ޔަގީންކަން އެބައޮތް ކަމަށް އޭނާ ވިދާޅުވިއެވެ.
ކުރިއަށް އޮތް ލޯކަލް ކައުންސިލް އިންތިޚާބަށް ވާދަވެރިކަން ބޮޑުވެފައިވާއިރު، އެ އިންތިޚާބުގައި 681 ކައުންސިލަރުންނާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކަށް 681 މެންބަރުން ހޮވާނެއެވެ.