ބ. އޭދަފުށީގައި ހިނގި ނުރައްކާތެރި އެކްސިޑެންޓެއްގައި އަނިޔާވި އުމުރުން ދުވަސްވީ މީހަކު މިއަދު މަރުވެއްޖެއެވެ.
މި އެކްސިޑެންޓު ހިނގާފައިވަނީ މި މަހުގެ 15 ވަނަ ދުވަހެވެ.
'ސަން'އަށް މައުލޫމާތުދެއްވަމުން އޭދަފުށި ކައުންސިލް ރައީސް މުހައްމަދު ފާތިހު ވިދާޅުވީ، އޭނާ ނިޔާވީ މާލެ ގެންގޮސް އައިޖީއެމްއެޗް ހޮސްޕިޓަލުގެ އައިސީޔޫގައި ފަރުވާދެމުން ދަނިކޮށް ކަމަށެވެ.
މި ހާދިސާގައި ނިޔާވެފައިވަނީ އެ ރަށު ސީސަންގެ، އުމުރުން 82 އަހަރުގެ އަބޫބަކުރު އަބްދުﷲ އެވެ.
އެ ރަށުން 'ސަން'އަށް މައުލޫމާތު ދިން މީހަކު ބުނި ގޮތުގައި އެ ހާދިސާ ހިނގީ މި މަހުގެ 15 ވަނަ ދުވަހުގެ ރޭ މަޣްރިބު ނަމާދަށް ފަހު، އަބޫބަކުރު ހިނގާފައި ގެއަށް ދިޔަ މަގުމަތީ ޕިކަޕެއްގައި ޖެހިގެންނެވެ. މަންޒަރު ދުށް މީހުން ތުހުމަތުކުރާ ގޮތުގައި އެ އެކްސިޑެންޓު ހިނގީ ޕިކަޕު ދުއްވަން އިން މީހާ ބަލަންވާ ވަރަށް ނުބެލުމުގެ ސަބަބުން ކަމަށް އޭނާ ކިޔައިދިނެވެ.
މި މައްސަލައާ ގުޅިގެން ޕިކަޕު ދުއްވަން އިން މީހާ މިހާރު ހުރީ ފުލުހުންގެ ބެލުމުގެ ދަށުގައި ކަމަށް އޭނާ ބުންޏެވެ.