އަށް އަހަރުގެ މަސައްކަތުން ދިވެހިރާއްޖޭގައި މިހާތަނަށް ޝާއިއުކުރި އެންމެ ބޮޑު ފޮތް ކަމަށްވާ "އިނގިރޭސި-ދިވެހި ބަސްފޮތް" ޤައުމީ ޔުނިވާސިޓީގެ ކުރީގެ ޗާންސެލަރު ޑރ. ޙަސަން ޙަމީދު ލިޔުއްވައި، ޗާޕުކުރައްވައިފިއެވެ.
މިއީ އޮކްސްފަޑް ޑިކްޝަނަރީގެ ތަރުޖަމާ އެއްކޮށް ނިންމައި، ޗާޕުކޮށްފައިވާ ފޮތެކެވެ.
'ސަން'އަށް މައުލޫމާތުދެއްވަމުން އޭނާ ވިދާޅުވީ، އިނގިރޭސި ކިޔަވަން ބޭނުންވާ މީހުންނަށް މިފަދަ ބަސްފޮތަކީ ވަރަށް ބޭނުންތެރި އެއްޗެއް ކަމަށެވެ.
މި ފޮތުގެ ފުރަތަމަ ބައި، އޭ އަކުރުގެ ރަދީފު، މީގެ ވިއްސަކަށް އަހަރު ކުރިން "ދަރުމަ" މަޖައްލާގައި ޝާއިއުކޮށްފައިވާނެ ކަމަށް އޭނާ ވިދާޅުވިއެވެ. އެ މަޖައްލާ އާއްމުކޮށް ވިކެނީ މަހަކު 3،000 ކޮޕީ ކަމުގައި ވިއަސް އެ ފަހަރު، 5،000 ކޮޕީ ވިކުނު ކަމަށް އޭނާ ވިދާޅުވިއެވެ.
ޤައުމީ ޔުނިވާސިޓީގެ ކުރީގެ ޗާންސެލަރު ޑރ. ޙަސަން ޙަމީދު --
ޙަސަން ވިދާޅުވާ ގޮތުގައި މިއީ ދިވެހި ޤައުމަށް މިހާރު ކޮންމެހެން ބޭނުންވާ ފޮތެކެވެ. މި ފޮތް ވާނީ މި ޖީލުގައި ޝާއިޢުކުރެވޭ އެންމެ މުހިއްމު ޢިލްމީ ފޮތަށެވެ. އޭނާ މި ފޮތް ލިޔުއްވުމުގެ މަސައްކަތުގައި މަދުވެގެން އަށް އަހަރު ހޭދަކޮށްފައިވެއެވެ.
ރައްޔިތުން ބޭނުންވާ މިންވަރު އެނގޭތީ، އެކަމުން ހިތްވަރު ލިބިގެން އަނެއް 25 އަކުރު ނިންމަން މަސައްކަތްކުރީ. މި ފޮތް ލިޔަން ގާތްގަޑަކަށް އަށް އަހަރު ނެގި. މީގެ ތެރެއިން ހަ އަހަރު ހޭދަކުރީ މުޅިންހެން މި ލިޔުމުގައި. ހެނދުނު ފަށާގޮތަށް އިރު އޮއްސެންދެން މިކަމުގައި ޤަރާރުވެ އުޅުނިން، ޑރ. ޙަސަން ޙަމީދު
އޭނާ ވިދާޅުވި ގޮތުގައި މިއީ ކަވި، އަދި އެތައް ދިރާސާތަކެއް ކުރަން ޖެހޭ ކަމެކެވެ. މުޅި ފޮތް ޓައިޕްކޮށް، ޗާޕަށް އަތުރައި، ލޭއައުޓް ހެދީ ވެސް އަމިއްލައަށްކަން ފާހަގަކުރައްވައި އޭނާ ވިދާޅުވީ، އޭނާއަކީ ޕީއެޗްޑީ އޮންނަ އަދި އެއަށް ކިޔަވާ ދަރިވަރުން އަތްދަށުން މަގުދައްކާ މީހެއް ކަމަށެވެ.
ނަމަވެސް، ދެތިން ޕީއެޗްޑީ ހެދުމަށް ވުރެ މި މަސައްކަތުގެ ޢިލްމީ ހައިބަތު ބަރުކަމަށް އޭނާ ވިދާޅުވިއެވެ.
އިނގިރޭސި ބަހުގައި ޢާއްމުކޮށް ބޭނުންކުރާ ހުރިހާ ލަފުޒެއް މި ފޮތުގައި ހިމެނޭނެއެވެ. މަދުވެގެން 120،000 އިނގިރޭސި ލަފުޒުގެ މާނަ މި ފޮތުގައި އޮންނާނެއެވެ. އިނގިރޭސި ލަފުޒުތައް ކިޔާނެ ގޮތާއި، ލަފުޒު ނިސްބަތްވާ ބަހުގެ މައިގަނޑު ބަޔާއި، ލަފުޒުގެ ތަފާތު މާނަތަކާއި، ޒަމާނާ ގުޅިގެން ލަފުޒު ބަދަލުވާ ގޮތް ވެސް މި ފޮތުގައި ވަނީ ހިމަނާފައެވެ.
ލަފުޒެއްގައި ނުރަސްމީ މާނައެއް ވާނަމަ، އެއާއި ވަށްބަހާއި މަޖާޒީ މާނަ ވެސް މިސާލާއެކު މި ފޮތުގައި ވަނީ ލިޔެފައެވެ. އަދި، އިނގިރޭސި ލަފުޒާ މާނަ އެއްގޮތް ދިވެހި ލަފުޒެއް ވާނަމަ، ދިވެހިބަހާ އެންމެ ތިމާގެ ބަސްބަހުގެ ގުޅޭ ލަފުޒު ވެސް ވަނީ ހިމަނާފައެވެ.
ފޮތް ލިޔުމުގައި ޚިޔާލުގައި ބަހައްޓަނީ ކިޔާ މީހާއަށް އެންމެ ފަސޭހައިން މޭރުންވާނޭ ގޮތަށް ލިޔަން. އެހެން ކަމުން، ލަފުޒެއްގެ މާނަ ލިޔާއިރު، އޭގެ މާނަ ލިޔެފައިވާނީ އައްވަލުން ފެށިގެން. މިސާލެއްގެ ގޮތުން އެޕްލް ނަމަ މާނައިގައި ލިޔަނީ އާފަލު މިހެންނެއް ނޫން. ލިޔާނީ އެއީ މޭވާއެއް ކަމާއި އޭގެ ބޭނުމާއި އެހެދޭ ގޮތް ވަރަށް ކުރުކޮށް. މިއަށް ފަހު، ދިވެހިބަހުން އެއަށް ކިޔާ ތަފާތު ނަންތައް ލިޔަން، ޑރ. ޙަސަން ޙަމީދު
މި ފޮތުގައި ބަނޑޭރިގަނޑާ އެކު ވަނީ 2،000 ޞަފުޙާއެވެ. ލިޔެފައިވާނީ 1992 ޞަފުޙާގައެވެ. ކޮންމެ ޞަފުޙާއެއްގައި 36 ފޮޅުވަން އޮންނައިރު މި ފޮތް ވާނީ، އެއް ފޮތެއްގެ ގޮތުގައި ރާއްޖޭގައި ނެރޭ އެންމެ ބޮޑު ފޮތަށް ކަމަށް ޑރ. ޙަސަން ޙަމީދު ވިދާޅުވިއެވެ.
އޭނާ ވިދާޅުވި ގޮތުގައި އެއަށްވުރެ ގަނޑު ގިނަ ނަމަ، އެއް ފޮތެއްގެ ގޮތެއްގައި ޗާޕެއް ނުކުރެވޭނެއެވެ. އެހެންނަމަވެސް މި ފަހަރު ވެސް ފޮތުގެ ގުއްރާސްތައް ފަހާފައިވަނީ މެޝިނުން ނުކުރެވިގެން އަތުން ކަމަށް އޭނާ ވިދާޅުވިއެވެ. ފޮތުގައި ބޭނުންކޮށްފައިވާ ފޮންޓަކީ، ވަރަށް ކުޑަކޮށް ލިޔުނަސް ކިޔަން އެނގޭ ބާވަތުގެ ފޮންޓެއް ކަމަށާއި، އެއީ އެކަމަށް ޚާއްސަކޮށް ފަރުމާ ކޮށްފައިވާ ފޮންޓެއް ކަމަށް ވެސް އޭނާ ވިދާޅުވިއެވެ.
މި ފޮތް މާލެ އަންނާނެ ކަމަށް ލަފާކުރެވެނީ ރޯދަމަހުކަން ފާހަގަކޮށް އޭނާ ވިދާޅުވީ، ފޮތް ޢާއްމުކުރެވޭނީ ރޯދަމަހަށް ފަހު ކަމަށެވެ.
ޑރ. ޙަސަން ޙަމީދަކީ ގިނަ މައުޟޫޢުތަކަށް މަޒުމޫނު ލިޔުއްވާ އަދި ފޮތް ލިޔުއްވާ ބޭފުޅެކެވެ. ގިނަ ޢާއްމުންނަށް އޭނާ އެނގެނީ މޯލްޑިވްސް ކޮލެޖް އޮފް ހަޔާ އެޑިޔުކޭޝަންގެ ރެކްޓަރެއްގެ ގޮތުގައި އަދި ގައުމީ ޔުނިވަސިޓީގެ ވައިސް ޗާންސެލާއާއި ޗާންސެލާގެ ގޮތުގައެވެ.