މިދިޔަ އަހަރު ރިލީޒްކުރި ބޮލީވުޑް ފިލްމުތަކުގެ ތެރެއިން އެންމެ ބޮޑު ކާމިޔާބީއެއް ހޯދި ފިލްމު "ދުރަންދަރު" ސްޓްރީމިންއަށް ނެޓްފްލިކްސްއަށް ދޫކޮށްލައިފިއެވެ.
މި ފިލްމު ނެޓްފްލިކްސްގައި ޕްރީމިއާކުރާނެކަން އެކިއެކި މީޑިއާތަކުން ބުނަމުން އައި ނަމަވެސް އިއްޔެއާ ހަމައަށް ވެސް ނެޓްފްލިކްސްއިން އެކަން ކަށަވަރުކޮށްދީފައެއް ނުވެއެވެ. ނަމަވެސް، ރޭ ދަންވަރު 12:00 ޖެހިއިރު ފިލްމު ނެޓްފްލިކްސްއަށް ދޫކޮށްލުމަށް ފަހު، އެކަން ނެޓްފްލިކްސް އިންޑިއާ އިންސްޓަގްރާމް މެދުވެރިކޮށް ވަނީ އިއުލާނުކޮށްފައެވެ.
ނެޝަނަލް އެވޯޑު ކާމިޔާބުކޮށްފައިވާ ކުޅަދާނަ ފިލްމު ޑައިރެކްޓަރު އަދިތިޔަ ދަރުގެ ދެވަނަ ޑައިރެކްޝަން ކަމަށްވާ "ދުރަންދަރު"އަކީ ވަރަށް ވަރުގަދަ ފިލްމު ކާސްޓަކާ އެކު ގެނެސްދިން އެކްޝަން ތުރިލާއެކެވެ. މިދިޔަ ޑިސެންބަރު މަހުގެ ފަސްވަނަ ދުވަހު ސިނަމާތަކުގައި ރިލީޒްކުރި މި ފިލްމަށް މިހާތަނަށް ބޮކްސް އޮފީހުގައި 1،344.74 ކްރޯޑު ރުޕީސް (146.3 މިލިއަން ޑޮލަރު)ގެ އާމްދަނީއެއް ވަނީ ލިބިފައެވެ.
ނެޓްފްލިކްސްގައި 'ދުރަންދަރު' ޕްރީމިއާކުރިކަން އިއުލާނުކޮށް ނެރުނު ޕޯސްޓަރު--ފޮޓޯ/އިންސްޓަގްރާމް
ފިލްމަށް ބެލުންތެރިންގެ ފަރާތުން ލިބުނު ހޫނު ތަރުހީބާ އެކު ޑައިރެކްޓަރު އަދިތިޔަ ދަރު ވެފައިވަނީ ބޮލީވުޑްގެ އެންމެ ވަރުގަދަ ފިލްމު ޑައިރެކްޓަރުންގެ ތެރޭގައެވެ.
ފިލްމު "ދުރަންދަރު" ނެޓްފްލިކްސްއަށް ދޫކޮށްލިއިރު ބައެއް ޑައިލޮގްތައް އަޑާ ނުލައި ގެނެސްދީފައިވާތީ ބެލުންތެރިން ވަނީ އެކަމާ ނުރުހުން ފާޅުކޮށްފައެވެ. ހަމައެއާއެކު ފިލްމުގެ ބައެއް ޑައިލޮގްތައް ސެންސަރުކޮށްފައި ގެނެސްދިންއިރު ފިލްމު ވަނީ 10 މިނެޓަށް ކުރުކޮށްފައި ކަމަށް ވެސް ބެލުންތެރިން ވަނީ ބުނެފައެވެ. މިއީ 'އަންސެންސަޑް ވާޝަން' ކަމަށް ބުނެ ޓުވިޓާގައި ބެލުންތެރިން ވަނީ ޝަކުވާ ކޮށްފައެވެ.
ބަތަލާ ޔާމީ ގޯތަމްގެ ފިރިމީހާ އަދިތިޔަ ދަރުގެ ފިލްމު "ދުރަންދަރު" އަދިވެސް ސިނަމާތަކުން ނުނަގާއިރު މި ފިލްމުގެ ދެވަނަ ބައި މި އަހަރުގެ މާރިޗު މަހުގެ 17ގައި ރިލީޒްކުރާނެކަން ވަނީ އިއުލާނުކޮށްފައެވެ.
ފިލްމު "ދުރަންދަރު"ގެ މައިގަނޑު ކާސްޓުންގެތެރޭ ރަންވީރު ސިންގް، އަކްޝޭ ކަންނާ، އަރުޖުން ރާމްޕާލް، ސަންޖޭ ދަތު، އާރް މާދަވަން އަދި ޒުވާން ބަތަލާ ސާރާ އަރުޖުން ހިމެނެއެވެ. މި ފިލްމުން އެކްޓަރު އަކްޝޭ ކަންނާއަށް ލިބުނު މަގުބޫލުކަމާ އެކު އެކްޓަރަށް ގިނަ ފުރުސަތުތަކެއް ލިބެމުން އަންނަ ކަމަށް ރިޕޯޓުތަކުން ބުނެއެވެ.